Manipud Kadagiti Agbasbasa
Operasion Naimpusuan nga agyamankami nga agassawa ken Jehova gapu iti artikulo nga “Operasion a Din Kasapulan a Maabrean.” (Pebrero 22, 1998) Nayeskediul idin a maopera ti utek ni lakayko gapu iti arteriovenous malformation wenno kasasaad a dagiti arteriana ket nasimbalud kadagiti urat. Ti artikulo ket kas man la sungbat dagiti kararagmi. Naopera ni lakayko iti pamay-an a nadakamat iti artikulo, ket naballigi dayta.
L. J., Estados Unidos
Warnakan ti Russia Agyamankam unay iti artikulo a “Dayawen ti Warnakan ti Russia Dagiti Saksi ni Jehova.” (Pebrero 22, 1998) Kayatko laeng nga ipakaammo a saan la nga ita a timrem dagiti luak a nangbasa kadagiti nagsasayaat nga artikuloyo. Makaparagsak a maammuan nga addanto aldaw a pumintas ti intero a daga a kas iti kabbaro a pasilidad ti sanga dagiti Saksi ni Jehova idiay Solnechnoye.
I. C. S. A., Brazil
Agbalbaliw ti Di Manamati nga Ama Impalagip kaniak ti artikulo a “Natignay ti Pusona” (Pebrero 22, 1998) ti mismo a pamiliak. Saan met a manamati ni lakayko. Ti artikulo ti nangsiray kaniak iti namnama nga addanto aldaw a nalabit matignay ti pusona.
S. M., Estados Unidos
Pamilia a Nangparmek Kadagiti Nazi Pulos a diak pay nakabasa iti mas naisangsangayan a kapadasan ngem iti kapadasan ni Horst Henschel, iti artikulo a “Natignayak Gapu iti Kinasungdo ti Pamiliak iti Dios.” (Pebrero 22, 1998) Namin-adu a kapilitan nga agsardengak nga agbasa iti baet dagiti parapo tapno medmedak ti panagsangitko. Talaga a nakaandur iti rigat ti tatang ni Horst, ket apresiarekto a kanayon ti ulidanna.
A. K., Estados Unidos
Makaparegta unay ti kapadasan ni Horst Henschel. Naparegtaak gapu iti tured ken ayatna ken ni Jehova. Diakto pulos malipatan dagiti sasao a nangparegta kenkuana kabayatan ti pannakaibaludna: “Mamapatay di pagbutngan.”
J. V. S., Brazil
Sangapulo ti tawenko, ket kayatko nga ibaga kadakayo nga anian a makaparegta a maammuan no kasano idi ti panagbiag dagiti Saksi ni Jehova—kasano ngatan no dida imbaga ti “Heil Hitler!” nalabit napukawda ti biagda. Ngem nagtalinaed a natured dagiti Saksi ket dida imbaga dayta.
R. B., Estados Unidos
Panangipannakkel iti Puli Naragsakanak a nangbasa iti artikulo nga “Agimtuod Dagiti Agtutubo . . . Ania ti Maipapan iti Panangipannakkel iti Puli?” (Pebrero 22, 1998) Namin-adun a napagsaludsodanak iti, “Ania ti nasionalidadmo?” Tangay diak ammo ti pamilia a nagtaudak, iyangawko nga isungbat ti “Mestiso!” Kinuna ti maysa nga agdaldaliasat a ministro, “No adda mangdamag no ania ti pulim, basta ibagam a ‘Maysaak kadagiti Saksi ni Jehova.’” Pagpannakkelko ti agbalin a miembro ti organisasion a mangbigbig nga agpapada amin a puli.
D. H., Estados Unidos
Agtawenak iti 14 ket kayatko ti agyaman kadakayo iti artikulo. Ti panangipannakkelko iti pulik ket nagbalin a panangidumduma iti puli. Impaawat kaniak ti artikulo nga agpapadatay amin iti imatang ni Jehova.
I. P., Italia
Idi ubingak, adu a kaeskuelaak ti mangipannakkel iti puli ken kolorda, a kunkunada a kadaraanda dagiti Español, idinto ta nagtaudak iti grupo ti minoria. Nagbalinak a managbabain ken awan panagraemko iti bagik. No dadduma ‘Kagurak ti kolorko!’ Tinulongannak ti balakad iti daytoy nga artikulo a mangpataud manen iti panagraemko iti bagik ken mapnekak iti impaay ni Jehova kaniak.
A. G., Pilipinas
Talaga nga adda tiritir a panangmatmatko, ta pampanunotek a natantan-ok dagiti tattao a naipasngay kadagiti nabakbaknang a pagilian. Tinulongannak ti artikuloyo a mangtarus nga adda maymaysa a puli—ti puli ti tao.
L. G., Brazil