Manipud Kadagiti Agbasbasa
Kinauyong Kadagiti Animal Nakapagsuratak tapno ibagak a nagsayaat ti panangputaryo iti artikulo a “Ti Panangmatmat ti Biblia: Kinauyong Kadagiti Animal—Dakes Kadi?” (Nobiembre 8, 1998) Komendarak ti panangilawlawagyo a di anamongan ti Dios ti kinauyong kadagiti animal, nangnangruna ti kinauyong dagidiay agkunkuna a Kristianoda.
J. L. C., Estados Unidos
Agtutubo nga Awanan iti Nagannak Agyamanak unay iti artikulo nga “Agimtuod Dagiti Agtutubo . . . Apay a Masapul nga Agbiagak nga Awan Dagiti Nagannak Kaniak?” (Nobiembre 22, 1998) Agtawenakon iti 39. Ngem idi 11 ti tawenko, natay ni nanangko ket pimmanaw ni tatang. Agingga ita, diak maipaawat kadagiti tattao ti nakapimpiman a biag a napasaranmi nga agkakabsat. Ngem patiek a maawatandakamin dagiti dadduma. Pagyamanan.
K. Y., Japan
Natay ni tatangko idi siam a bulanko pay laeng, ken uray ni nanang idi sakbay nga agtawenak iti 12. Makaliwliwa unay ti artikuloyo ket inlawlawagna ti agpayso a marikrikna dagiti ulila. Nagsayaat ketdin a maammuan a pagungarenton ni Jehova dagiti pimmusayen nga ipatpategtayo!
M. S. S., Brazil
Agtawenak iti 40 ken naulit-ulitkon a binasa ti artikulo. Makaluaak manipud rugi agingga iti ungtona tangay ulilaak metten nanipud pay idi dua ti tawenko. Agingga ita, makasangitak latta kada kitaek ti retrato da Nanang ken Tatang. Pagyamanan iti panagsuratyo kadagiti kasta nga artikulo!
J. C. V., Francia
Sibibiag dagiti nagannak kaniak, ngem agsagsagabaak iti manic-depression (bipolar) ken interesadoak iti aniaman nga artikulo a mangilawlawag no kasano a madaeran dagiti pakarigatan. Kayatko laeng nga ipakaammo a magustuak dagiti pudno a kapadasan ken dagiti naibasar iti Biblia a balakad a masarakan iti “Agimtuod Dagiti Agtutubo . . . ”
S. H., Canada
Panangsukog iti Kayo Pinulpullon a tawen nga agbasbasaak iti daytoy a magasin, ket agminar a kanayon a sumaysayaat ti linaon, estilo ti pannakaisurat, ken pannakapili dagiti temana. Ngem adda makunak iti artikulo a “Panangsukimat iti Agpaut a Kinapintas ti Kayo.” (Nobiembre 8, 1998) Pangngaasiyo ta pakdaaranyo dagiti agbasbasa a mabalin a magargari a mangpadas iti daytoy a trabaho ta ti pandaras ket napeggad unay a remienta. Iti kinaagtutubok idi dekada 1920, maus-usar pay laeng ti gagangay a pagaammo kas foot adz. Kas naipakita iti retratoyo, ti kayo ket tenglen dagiti saka, ket natadem ti remienta. Ngem maawagan met dayta a foot evil agsipud ta masansan a madunor ti saka dagiti agus-usar iti dayta. Patiek a napeggad unay dayta iti agdadamo a mangusar.
W. G., Estados Unidos
Apresiarenmi daytoy mamagannad a palagip.—ED.
Nataktika a Reyna Ti naisangsangayan nga artikuloyo maipapan ken ni Catherine Parr (“Ti Nataktika a Reyna a Nangparukma iti Manangisikat nga Obispo,” Nobiembre 8, 1998) impalagipna kaniak ti salaysay ti Biblia maipapan ken Reyna Ester. Anian a kinasirib ti impakita dagitoy a babbai! Nupay saanak a Saksi ni Jehova, awan pay ti nalibtawak a ruar ti Agriingkayo! Sangkapanunotko no apay a saan nga apresiaren dagiti dadduma ti literaturayo a kas iti panangapresiarko.
M. D. S. F., Brazil
Makapainteres unay ti historikal a salaysay maipapan ken Henry VIII ken iti asawana a ni Catherine Parr. Kablaawankayo. Nagsayaat ti pannakasirarakna, ababa, ken nalawag ti artikulo.
C. G., Italia
Ti pannakaisalaysay ti artikulo ti nangiparikna a kas man la kanayon a kaduami ni Queen Catherine. Pagyamanan iti panangipablaakyo kadagiti artikulo a kas iti daytoy tapno maammuan dagiti kas kadakami nga agnanaed iti daytoy a deppaar ti lubong ti nadumaduma a kultura dagiti agnanaed iti addayo a luglugar.
L. G. ken L. G., Venezuela