Bugguam ken Pamagaam Dagiti Imam!

KASANOTAY a maakaran iti panateng ken dadduma pay nga impeksion? Sigun iti U.S. Association for Professionals in Infection Control and Epidemiology, di kumurang a 80 a porsiento kadagita a sakit ket iyakar dagiti imatayo, saan a babaen ti angin. Kinapudnona, ti panangbuggo iti ima ket ibilang ti adu a ti kakaisuna a pamay-an a panglapped iti panagwaras ti sakit. Ngem adu ti saan a kanayon nga agbuggo kalpasan a nagusarda iti kasilias wenno nagpangres wenno sakbay a manganda. Siempre, adu a sabsabali pay ti kanayon nga agbuggo iti imada kadagita a tiempo. Ngem saan a mapukaw ti posible nga impeksion kalpasan ti nadaras, parparawpaw a panagbuggo iti ima.

Napateg met ti umno a panangpamaga kadagiti ima. Natakuatan dagiti managsirarak idiay University of Westminster sadi Inglatera nga adu a tattao ti saan a mangpampamaga a naimbag kadagiti imada kalpasan a nagbuggoda, nangnangruna no agus-usarda kadagiti hot-air dryer. Adu ti naan-anay nga agpamaga babaen ti panangipunasda kadagiti imada iti kawesda. Mangiwaras daytoy iti aniaman a napeggad a mikroorganismo a nabati kadagiti ima. Sigun kadagiti managsirarak, kasayaatan no naan-anay a pamagaan dagiti ima, babaen ti panangusar kadagiti maibebelleng a papel de banio wenno nadalus, saan pay a nausar a tualia.

Isingasing ti U.S. Centers for Disease Control and Prevention ti sumaganad a balakad iti panangbuggo kadagiti ima:

• Kanayon nga usarem ti apaganem-em a danum ti gripo ken sabon. No kapilitan nga agusarka iti planggana imbes a gripo, innawam dayta kada usarem. Saan a nasamay dagiti premoistened towelette a pangdalus kadagiti ima.

• Pagrinnasrasem dagiti imam agingga a maikkat ti galisda a gapu iti sabon, ket itultuloymo ida a pagrinnasrasen iti di kumurang a 15 a segundo. Lidlidem ti rabaw ken dakulap dagiti imam agraman ti nagbabaetan dagiti ramay ken iti uneg dagiti kuko.

• Balnawam dagiti imam iti apaganem-em a danum iti gripo.

• Pamagaam iti maibebelleng a papel de banio, wenno saan pay a nausar a tualia, ket saanmo nga isagid dagiti imam iti gripo wenno pagsalapayan iti tualia.

• Iggamam ti tualia a mangiserra iti gripo tapno saanmo a masagid ti gripo.

• Masapul nga agbuggo dagiti ubbing iti maabut ti katayagda a sadiay mabugguanda a naimbag dagiti imada iti gripo. Tulongam ti ubing a mangaramid iti amin a nadakamat nga addang, ket kalpasanna bugguam dagiti imam.