2. Pagtalinaedem a Nadalus

MASALAKNIBAN ti siruhano dagiti pasientena no bugguanna dagiti imana, iyesterilisadona dagiti instrumentona, ken pagtalinaedenna a nadalus ti siled a pagoperaanna. Maprotektaram met ti pamiliam no pagtalinaedem a nadalus ti bagim, kosinam, ken taraonmo.

● Agbuggoka.

Kuna ti Public Health Agency of Canada nga “iwaras dagiti ima ti agarup 80% kadagiti kadawyan a makaakar a sakit kas iti panateng ken trangkaso.” Isu a sabonam ken bugguam a naimbag dagiti imam sakbay a manganka, no naggapuka iti kasilias, ken sakbay nga agisaganaka iti taraon.

● Pagtalinaedem a nadalus ti kosinam.

Sigun iti maysa a panagadal, nupay ti kubeta ti masansan a madaldalusan a paset ti balay, “dagiti espongha/lupot a paginnaw iti kosina ti bambanag iti pagtaengan a kontaminado iti kaaduan a bakteria ti takki.”

Nasken ngarud a masansan a sukatam dagiti lupot a paginnaw. Agusarka iti sabon ken napudot a danum wenno pagpatay iti mikrobio no dalusam ti kosinam. Ngem saan a kanayon a nalaka nga aramiden dayta. Awan gripo iti balay ti maysa a babai nga agnagan Bola. “Nupay narigat,” kunana, “kanayon latta a siertuenmi nga adda nakasagana a sabon ken danum tapno agtalinaed a nadalus ti kosina ken balaymi.”

● Bugguam dagiti prutas ken nateng.

Sakbay a mailako dagiti prutas ken nateng, mabalin a kontaminadodan iti narugit a danum, an-animal, takki, wenno dadduma pay. Isu nga uray no ukisamto dagiti prutas wenno nateng, bugguam a naimbag tapno maikkat dagiti mikrobio. Kasapulan ti adu a tiempo. “Diak agdardaras no agisaganaak iti salad tapno masiertok a mabugguak a naimbag dagiti nateng a laokna,” kuna ni Daiane a maysa nga ina a taga-Brazil.

● Isinam ti di pay naluto a karne.

Tapno di agwaras dagiti bakteria, balkutem a naimbag ti amin a di pay naluto a karne ken produkto iti baybay. Isinam dagita iti dadduma a taraon. Agduduma a langdet ken kutsilio ti usarem para kadagita a taraon, wenno is-isam a naimbag ti langdetmo ken kutsiliom iti sabon ken napudot a danum sakbay ken kalpasan nga aramatem.

Ita ta nadaluskan ken nadalus metten dagiti alikamem ken ramen a kasapulam, kasano ti natalged a panangisagana kadagiti taraonmo?

[Kahon iti panid 5]

SANAYEM TI ANNAKMO: “Insuromi kadagiti annakmi a bugguanda dagiti imada sakbay ti pannangan ken bugguan wenno ibellengda ti natnag a taraon.”​—Hoi, Hong Kong