Manipud Kadagiti Agbasbasa
Mapagtalkan ti Siensia? Dagiti serye ti artikuloyo a “Pagpatinggaan ti Panagtalekmo iti Siensia?” (Marso 8, 1998) ket naintiempuan a pakdaar. Tinulongannak nga agbalin nga ad-adda a realistiko kadagiti imbension ken nasientipikuan a takuat, a kaaduan ket makadangran iti tao ken iti aglawlawna. Maigiddato, dagiti serye inturongna dagiti agbasbasa iti Biblia—banag a naan-anay a mapagpiaran.
A. I. B., Brazil
Dagiti Apache Interesadokam unay iti pakasaritaan dagiti Indian ket adun a libro ti nabasami maipapan kadakuada. Isu a kayatmi ti agyaman kadakayo iti artikulo nga “Ania Ngatan ti Napasamak Kadagiti Apache?” (Marso 8, 1998) Nalawag ken makakombinsir ti panangisalaysayna iti daytoy a tema.
G. C. ken R. S., Italia
Pannakaklaseklase ti Panagbiag Agtawenak iti 12, ket idi la kalman nga adda naituding nga schoolwork-ko maipapan iti pannakaklaseklase ti panagbiag. Maysaak a mestiso Indian. Naawatko ita ti artikuloyo a “Dagiti Kristiano ken ti Pannakaklaseklase ti Panagbiag.” (Marso 8, 1998) Saan nga inlawlawag dagiti librok idiay eskuelaan daytoy a tema a kas ti kinabatad ti panangilawlawagyo.
S. S. N., Estados Unidos
Panangdaer iti Panagsikor Addan dagiti artikulo a nabasak kadagiti nalatak a magasin maipapan iti panangdaer iti pannakabannog, pannakapaksuy, ken panagdandanag. Ngem masansan a pagpanunotendak no kabaelak ngata a daeran! Naragsakanak a nakakita a kadagiti 15 a singasingyo maipapan iti panangdaer iti panagsikor, awan ti naisingasing a sumuko ken agpakniak. (“Madaeram ti Panagsikor!,” Marso 22, 1998) Impakitada ketdi no kasano a makissayan ti panagsikor bayat nga agtultuloy ti panagbiag.
J. B., Bolivia
Naipablaak dagiti artikulo iti umiso a tiempo, tangay madandanaganak. Maysaak nga amin-tiempo a managebanghelio, ket impagarupko nga awan koma ti kasta a problemak. Bayat a binasak dagitoy nga artikulo, timrem ti lua kadagiti matak. Naamirisko a sidudungngo nga ay-aywanan ni Jehova dagiti adipenna ken maawatanna ti mapaspasarantayo.
D. M., Italia
Dayta ti masapul a basaek, tangay agsagsagabaak iti psoriasis, maysa a makapasikor a kasasaad. No dadduma, ipagarupko nga awan kaimudingak ken Jehova, ngem impakita ti artikuloyo a saan a husto dayta. Agpayso a maseknan kaniak—maseknan unay ta impaayannak iti amin nga impormasion a kasapulak maipapan iti panagsikor.
S. S., Brazil
Kayatko ti naimpusuan nga agyaman iti kahon a “PTSD—Normal a Reaksion iti Abnormal a Kapadasan.” Nasaem ti kinaubingko, ket nupay malaglagipko pay laeng dagiti napalabas a kapadasak, agpayso a liniwliwanak ti artikulo.
R. N., Estados Unidos
Nalawlawaganak unay kadagiti artikulo. Tangay umad-adu dagiti pakarigatan manipud ken Satanas, kasapulantay daytoy a kita ti impormasion tapno agtalinaedtayo iti pammati. Impabigbigna kaniak nga interesadokayo kadagiti parikutmi ken ipaayandakami kadagiti kasapulanmi tapno madaeranmi ida.
V. T., Fiji