Nagbalin a Soldado ni Kristo ti Bannuar iti Gubat

KAS INSALAYSAY NI LOUIS LOLLIOT

Idi Agosto 16, 1944, kaduak dagiti Aliado a puersa a simmanglad kadagiti aplaya iti abagatan a Francia bayat ti Gubat Sangalubongan II. Kalpasan ti makalawas a panaglalaban iti Mediterranean Coast, simrek ti eskuadron dagiti tangkek iti sangladan ti Marseilles sada nakirupak agingga iti turod nga agturong iti Notre-Dame-de-la-Garde Basilica. Ti misionmi ket tagikuaen ti sarikedked dagiti Aleman sadiay.

NAKARO ti rinnupak. Napuntaan ti maysa a tangke ti grupok, ket napapatay ti tallo a kakaduak iti dayta. Kalpasanna, maysa a mine ti nangdadael iti metal belt ti tangkek, isu a dimin mausar dayta. Tangay desididokami a mangtagikua iti pakiruprupakanmi, intuloymi ti nakilaban iti simmaganad a sumagmamano nga oras.

Bayat nga awit-awitko ti masinggan iti maysa nga imak ken ti bandera ti Francia iti maysa, ginundawayak ti medio simmardeng a rinnupak ket kaduak nga immabante ti maysa a Free French a mannakirupak. Tangay nabannog ken ngimmisitak gapu iti pulbora, intugkelko ti bandera ti Francia iti ruangan ti basilica.

Ti Pannakawayawaya

Kabayatan ti simmaganad a lawlawas, nagpaamianankami a nangkamat kadagiti agsansanud a tropa ti Alemania. Dagiti sniper agraman dagiti naibanteng a kable a pagat’ ulo iti kalsada ti nakapilitanmi nga umabante bayat a siseserra ti ruangan dagiti tangkemi.

Idi Oktubre, nakadanon ti buyotmi idiay Ramonchamp, bassit nga ili iti Vosges Mountains iti amianan a daya ti Francia. Kasla nagpanawan ti ili. Bayat a nagtakderak iti toresilia ti tangkek a nangsiim iti aglawlaw, kellaat nga adda rocket manipud iti maysa a tawa a nangpuntiria iti tangke, a nakatayan a dagus ti tallo a tattaok idi bimtak dayta. Nakaro ti pannakadunorko ken ti maysa pay a soldado, ket saan a makaabante ti tangke. Iti laksid ti kaadda ti 17 a busak ti granada iti gurongko, naiturongko ti tangke bayat a ginuyodnakami ti maysa pay.

Gapu iti daytoy a pasamak nga immawatak kadagiti naipatulod a komendasion. Sumagmamano nga aldaw kalpasanna, idi pinadayawannak ni General de Lattre de Tassigny, ti komander ti French 1st Army, iti nagapuanak idiay Marseilles, kinunana: “Agkitatanto manen.”

Di nagbayag kalpasanna, natudinganak nga agbalin a personal nga attaché ti heneral. Idi agangay, isut’ kinuyogko idiay Berlin, a sadiay, isut’ nagbalin a pannakabagi ti Francia iti isusuko ti Alemania idi Mayo 8, 1945. Nagserbiak kenkuana iti simmaganad nga uppat a tawen.

Ngem apay a napalalo ti pannakipasetko kadagiti kangrunaan a pasamak ti Gubat Sangalubongan II?

Nasanay iti Relihion ken iti Gubat

Dimmakkelak kas napeklan a Romano Katoliko nga agtarigagay nga agserbi iti Diosko ken iti pagiliak. Idi Agosto 29, 1939, sumagmamano la nga aldaw sakbay a nakipaset ti Francia iti Gubat Sangalubongan II, pinirmaak ti kontratak nga agtrabaho iti motorized cavalry. Agtawenak laeng idi iti 18. Kalpasan ti lima a bulan a panagsanay idiay École Militaire sadi Paris, naibaonak kas agtutubo nga opisial nga awanan ranggo iti makindaya a pakirangrangetan ti Francia.

Daydi a tiempo ket nagdinamag a sinsinan a gubat, a naawagan iti kasta agsipud ta ti laeng aramidenmi ket urayen dagiti tropa ti Alemania a makiruprupak iti dadduma a pagrarangetan. Kalpasanna, idi rimmauten dagiti Aleman, innaladak kas balud, idi Hunio 1940. Nakalibasak dua a bulan kalpasanna, ket idi agangay, nabaelak ti nakikadua kadagiti puersa ti Francia idiay Amianan nga Africa.

Iti kampania idiay Tunisia a maibusor kadagiti tropa ti Alemania iti sidong ni General Erwin Rommel, ti Desert Fox, sinagabak ti nauram a nasurok a 70 a porsiento ti bagik ket siam nga aldaw nga awan puotko. Tallo bulan a nayospitalak idiay Sidi-bel-Abbès, iti amianan a laud ti Algeria, nga ayan ti hedkuarter ti French Foreign Legion. Bayat ti kaaddak idiay Amianan nga Africa, naawatko ti Croix de Guerre, ti Military Cross.

Pinaregtadakami dagiti Katoliko a chaplain a mangaramid kadagiti “Nakristianuan” a rebbengenmi. Iti panagtulnogko kadagiti pammaregtada, sisasaganaak idi a mangisakripisio iti biagko para iti Francia. Sadinoman nga ayanko, nagkomunionak sakbay ti pannakidangadang. Ket idi addaak iti kangitingitan ti gubat, nagkararagak iti Dios ken ni Birhen Maria.

Rinaemko dagiti kabusor a soldado, a kaaduan ket napeklan met a Romano Katoliko. Dadduma ti nagsinturon iti addaan hebilia a nasuratan iti Gott mit uns (Adda ti Dios kadatayo.) Saan kadi a karkarna a panunoten a sungbatan ti Dios ti kararag dagiti soldado a makidangdangadang iti agbinnusor a dasig ken agkakarelihionan?

Dagiti Panagbalbaliw Kalpasan ti Gubat

Kalpasan ti gubat, idi Abril 10, 1947, inkallaysak ni Reine, maysa a balasang iti ili ni General de Lattre de Tassigny a Mouilleron-​en-Pareds, idiay Vendée. Ti heneral ti nagserbi kas padrinok. Kalpasan ti ipapatayna idi Enero 1952, inawitko ti banderana iti nangayed a pannakaipumponna.

Kalpasanna, maysa nga agsapa ti Domingo idi arinunosen ti 1952, idi agrubrubbuatkam ken ni baketko a makimisa a kadua ti balasitangmi, dua a Saksi ni Jehova ti nangtimbre iti ridawmi. Ti nasaoda maipapan iti Biblia ti nanggutugot iti panagusiosomi. Nupay relihiosokami nga agassawa, awan aniaman nga ammomi iti Biblia, tangay inupaynakami ti simbaan a mangbasa iti dayta. Ti Saksi a nangitukon nga iyadalannakami iti Biblia ket ni Léopold Jontès, ti manangaywan idi iti sanga nga opisina dagiti Saksi ni Jehova idiay Francia. Bayat ti panagadalmi iti Biblia, naammuak met laengen dagiti sungbat ti salsaludsodko a di nasungbatan sipud kinaubingko.

Kas pagarigan, kanayon a paginteresak ti Amami, wenno ti Kararag ti Apo. Kas Katoliko, patiek nga amin a naimbag a tattao ket mapan idiay langit no matayda, isu a diak maawatan no apay nga ikararagtayo iti Dios: “Maaramid koma ti pagayatam ditoy daga.” (Mateo 6:9, 10, Douay Version; kuami dagiti italiko.) Ti saludsodko maipapan iti daytoy ket iyaw-awan dagiti nakasaritami a papadi wenno ibagada a masungbatan daytoy a kararag inton Romano Katolikon amin a tattao. Ngem diak napnek iti sungbat.

Saan met a makapnek ti naisungbat dagiti papadi kadagiti saludsodko maipapan iti Trinidad. Sagudayen daytoy a pannursuro dagiti Katoliko, sigun iti sasao ti kredo ti simbaan, a ‘ti Ama ket Dios, ti Anak ket Dios, ken ti Nasantuan nga Espiritu ket Dios, ngem kaskasdi a saanda a tallo a Dios no di ket maysa a Dios.’ Isu a naragsakankam unay nga agassawa idi nadiskobremi ti nalawag a pannursuro ti Biblia a ni Jesus ket Anak ti Dios ken saan a Mannakabalin Amin a Dios.​—Marcos 12:30, 32; Lucas 22:42; Juan 14:28; Aramid 2:32; 1 Corinto 11:3.

Mamatikami a dua nga ita laeng a nalukatan ti matmatami ken nakasarakkami iti di magatadan a perlas, a maikari iti aniaman a sakripisio. (Mateo 13:46) Naamirismi a masapul nga agpilikami tapno magun-odanmi daytoy a kinabaknang. Di nagbayag, tinuladmi ti panangmatmat ni apostol Pablo, a nangibaga nga imbilangna “dagiti amin a bambanag a pukaw maigapu iti naringbaw a pateg ti pannakaammo ken Kristo Jesus.” Binalbaliwanmi ngarud ti panagbiagmi tapno agserbikami iti Dios.​—Filipos 3:8.

Panangaramid iti Pangngeddengko

Idi Abril 1953, sumagmamano la a bulan kalpasan a nangrugikami a nakipagadal iti Biblia kadagiti Saksi, nakaawatak kadagiti pammilin a makikaduaak iti buyot dagiti agekspedision a Pranses a maibaon a makidangadang idiay Indochina. Maigiddato iti dayta, agserserbiak idi nga adjutant iti commanding officer iti Senado idiay Paris. Tangay naawatakon ti prinsipio ti Biblia maipapan iti neutralidad, naamirisko a rumbeng nga agdesisionak. (Juan 17:16) Pinakaammuak dagiti superiorko iti panagkedkedko nga agtulnog kadagiti pammilin a makidangadang idiay Indochina, sa dinakamatko ti tarigagayko a pulos a din makigubat.​—Isaias 2:4.

“Naamirismo kadin a dakeston ti pakasarsaritaam ken awanton ti aniaman a gundawaymo iti masakbayan?” inyimtuod dagiti superiorko. Sipud iti daytan a kanito, arigna naipaspasuliakon. Ngem salaknib daydi, tangay diak naayabanen kadagiti namilitariaan a panagsanay. Saan idi a maawatan ti adu a kakabagian ken gagayyemmi no apay nga inidiak ti ibilangda a nangato a saad iti kagimongan.

Gapu iti rekordko iti militar, ipangpangrunadak dagiti autoridad, a mangraraem kaniak iti laksid ti pammatik. Iti simmaganad a dua a tawen, pinalubosandak nga agbakasion tapno agpaagas, ket din masapul nga ituloyko ti aniaman nga annongek. Kabayatanna, tinabunuanmi nga agassawa dagiti gimong iti kongregasion dagiti Saksi ni Jehova iti lugarmi ken inranudmi payen ti kabarbaro a pammatimi kadagiti sabsabali.

Soldado Met Laengen ni Kristo!

Kamaudiananna, idi kattapog ti 1955, nawayawayaanakon iti aniaman a pagrebbengak iti militar. Sangapulo ket lima nga aldaw kalpasanna, idi Marso 12, insimbolomi nga agassawa ti dedikasionmi ken Jehova a Dios babaen ti pannakaitaneb iti danum iti asamblea idiay Versailles. Tangay nagbalbaliwen ti propesional a takderko, rumbeng nga agsapulak iti nadumaduma a pagtrabahuan tapno mabiagko ti pamiliak. Iti simmaganad nga uppat a tawen, nagtrabahoak kas kargador idiay Halles (ti tiendaan sentral), idiay Paris. Nupay narigat ti kasta a panagbalbaliw, binendisionan ni Jehova dagiti panagreggetko.

Iti panaglabas dagiti tawen, adu a tattao ti natulonganmi nga agassawa a mangakseptar iti mensahe ti Biblia. Naaddaanak iti gundaway a nangilawlawag iti Nakristianuan a panangmatmat iti neutralidad kadagiti nadumaduma nga autoridad iti militar ken iti ili. Masansan a nakatulong ti dati a karerak kas soldado a nangparmek iti panangidumduma dagiti adu maipapan kadagiti Saksi ni Jehova. Inikkannak iti gundaway a mangilawlawag iti Nakristianuan a takdermi maipapan iti neutralidad a pakainaigan ti panaggugubat dagiti nasion, a mangipakpakita a kastoy met laeng ti takder nga innala idi dagiti pasurot ni Kristo idi unana a panawen. Kas pagarigan, nagsurat ni Propesor C. J. Cadoux iti librona a The Early Church and the World: “Agingga iti panagturay ni Marcus Aurelius [161-180 K.P.], iti aniaman a kasasaad awan ti Kristiano a nagsoldado kalpasan a nabautisaran.”

Maysa kadagiti karirigatan a suot a sinarangetko ket ti ipapatay ni baketko idi 1977. Natay kalpasan ti makatawen a panagsakit, a sibibileg nga inranudna ti pammatina agingga idi aldaw ti ipapatayna. Ti nakaskasdaaw a namnama ti panagungar ti nangpabileg kaniak. (Juan 5:28, 29) Ti maysa pay a nakatulong iti panangdaerko iti panagladingit ket ti panagpalistak kas regular pioneer, kas pangawag kadagiti amin-tiempo a ministro dagiti Saksi ni Jehova. Inaramidko daytoy idi 1982 kalpasan ti panagretirok iti trabahok. Kamaudiananna idi 1988, anian a yamanko ta nagserbiak kas instruktor ti eskuelaan a mangsanay kadagiti payunir!

Nanipud idi natay ni baketko, kapilitan a masapul a sarangtek ti pasaray panagleddaangko. Ngem dagiti nadekket, napigsa ti espiritualidadda a gagayyem ti nakatulong kaniak a mangiliwag. Iti unos dagita a pakasuotan, kanayon a nariknak ti bileg ken naayat a kinamanangngaasi ni Jehova, a mangay-aywan kadagiti amin nga agtalek kenkuana. (Salmo 18:2) Patiek met a dagiti pakasuotan a mapasarantayo ti mangsansanay kadatayo a mangitultuloy iti naespirituan a pannakidangadangtayo. (1 Pedro 1:6, 7) Kas panglakayen iti kongregasion, matulongak met dagiti sabsabali a malmaldaang.​—1 Tesalonica 5:14.

Idi ubingak, arapaapko ti agsoldado, ket arigna nagtalinaedak a soldado agingga ita. Pinanawak ti maysa a buyot ket simrekak iti sabali a buyot, tapno agbalinak a “soldado ni Kristo Jesus.” (2 Timoteo 2:3) Ita, iti laksid ti kumapkapuy a salun-at, ikagkagumaak nga usaren ti amin a kabaelak a mangitultuloy iti pannakidangadang kas soldado ni Kristo iti “nasayaat a pannakigubat” nga agturongto inton agangay iti balligi, a pakaidayawan ken pakaipadayagan ti Diostayo, ni Jehova.​—1 Timoteo 1:18.

Natay ni Louis Lolliot idi Marso 1, 1998, bayat a maisagsagana ti pannakaipablaak daytoy nga artikulo.

[Ladawan iti panid 13]

Idi panagkallaysami a tinabunuan ni General de Lattre de Tassigny

[Ladawan iti panid 15]

Ni Louis Lolliot ken ni baketna a Reine, idi 1976