Dikay Agsanud

DUA a dakkel a buyot ti nagsango iti maysa ken maysa. Ti linea ti paggugubatan ti naiyugeden. Dakkel a panagdanag ti mangpetpetpet ti tunggal soldado bayat nga ur-urayenna ti bilin a rumaut. Ti kinasiglat ken determinasion isuda iti kasapulan itan. Saan a maawat ti aniaman a panagbuteng, ti laeng panunot ti panagballigi. Mabigbigbig ti kada soldado a mabalin a daytat’ pakapukawan ti biagna. Kaskasdi ammona a ti panagsanud iti daytoy kangitingitan a kanito ket mabalin a makadadael a maipaay iti gapuananda. Masapul a laglagipenna dagiti ipatpateg nga isut’ itantandudona ken agtuloy a sisusungdo iti annongenna.

Dagiti pudno a Kristiano naiyarigda kas soldado ni Kristo. Agsurat ni apostol Pablo ken ni Timoteo: “Makipagsagabaka a kas naimbag a soldado ni Kristo Jesus.” (2 Timoteo 2:3) Wen, masapul a ti soldado isaganana ti bagina a sumango kadagiti panagsagaba ket masapul nga agtalinaed a natibker iti determinasionna a mangtungpal ti annongenna. Maitunos iti daytoy, ti Kristiano a soldado saanna ipuera. Isut’ mangitantandudo iti katan-okan, sapasap a panggep ti Dios.

Kasanot’ panagbalin ti maysa a soldado ni Jesu-Kristo? Babaen panangakseptarna ti urnos ti Dios a pakaisalakanan baeten ken Jesu-Kristo ken panangidedikar ti bagina nga awan ikedkedkedna iti Kangatuan Unay aginggat’ tungpal biag. Ti indibidual, kaiyariganna, kasla ipirpirmana ti naganna iti kasta a dedikasion, babaen iti bautismo iti danum.

Aniat’ ramanen ti pannakidangadang ti soldado a Kristiano? Ti ulidan ni Jesu-Kristo ken dagiti apostolesna ipakitana a ti soldado a Kristiano saan nga autorisado a mangusar kadagiti pisikal nga igam. Imbes ketdi, aramaten ti Kristiano ti kampilan ti espiritu (kayatna a sawen ti Sao ti Dios) a maibusor kadagiti puersa dagiti dakes nga espiritu ti langlangit. (Efeso 6:12, 17) Ti kasta a naespirituan a pannakidangadang lawlawaganna dagiti tattao a maibusor kadagiti puersa ti kinasipnget, a mangirepresentar ti kinadakes. Ti indibidual umanamong a makipaset iti daytoy naespirituan a pannakidangadang inton idedikarna ti biagna iti Dios.​—Mateo 5:14-16; Roma 13:12.

Ti soldado a Kristiano ti sumarungkar kadagiti tattao kadagitt balbalayda, nga agsapsapul kadagiti interesado a tattao. (Lucas 10:5, 6; Aramid 5:42) No nasarakan dagitoyen, sarungkaranna ida a linawan-lawas, a sursuruan ida ti kinapudno ti Sao ni Jehova. Iti kasta ti soldado a Kristiano tultulonganna ida a mawayawayaan manipud kadagiti narelihiusuan a kinaulbod. (Idiligyo iti Juan 8:31, 32.) Apaman nga apresiaren dagitoy interesado a tattao ti kinapudno ti Biblia, uray isuda met, agbalindanton a soldado ni Kristo.

Kanayon a Matmatan ti Kalat

Saan a kas kadagiti nailubongan a panagsusuppiat a pakapukawan dagiti adu a biag, ti naespirituan a pannakigubat alaenna ti langa iti trabaho a mangispal a di mangyeg ti aniaman a pakadangranan ti asinoman. Gapu itoy a rason, ti nabara a tarigagay a mangispal kadagiti biag, agraman panagayat iti Dios ken iti pada a tao, ti naskenda tapno makapagtultuloy kas dagiti matalek a mannakigubat iti sidong ti panangiwanwan ni Jesu-Kristo.

Siempre, dagiti dakes nga espiritu aramidenda ti amin a kabaelanda a mangsinga iti naespirituan a pannakidangadang ti Kristiano. Addada iti kaparanget iti daga ken ipampamaysada ti panagreggetda tapno maisina ti sangatauan manipud iti Dios. (Apocalipsis 12:12) Dagiti material a bambanag a bendision koma kadagiti tattao isudat’ pamay-an ni Satanas ken dagiti demoniona tapno pangsilo. Agpadpada ti nabaknang ken napanglaw mabalin a mabiktimada iti panagbiag a mangipakpakita iti napalalo a panagagawa iti material a bambanag. Uray pay dadduma kadagiti ad-adipen ti Dios mabalin a mangrugida nga ayaten ti lubong ken ti ituktukonna, a matnagda iti “derrep ti mata ken ti kinapalangguad ti panagbiag.”​—1 Juan 2:15, 16.

Ti nakaro a pannakairaman kadagiti material a bambanag ti makagapu kadagiti dadduma a naitimpuyog iti kongregasion nga agsardeng wenno bumannayat iti pannakidangdangadangda a naespirituan. Anian a nagladingit daytoy! No kabarbaraan ti gubat, saan a mabalinan ti soldado a maikapis ti atensionna kadagiti dadduma a bambanag. Ti interesna masapul nga isut’ pannakagun-odna ti panagballigi. Yantangay biag ti nakapusta, saan a mabalinan ti soldado a Kristiano a mailisi ti matana manipud iti kalatna iti naespirituan a pannakidangadang. Kinuna ni apostol Pablo ken Timoteo: “Daytoy a bilin italekko kenka, . . . kas maiyannurot kadagiti kadaanan a padto a maipapan kenka agsoldadoka koma gapu kadakuada iti nasayaat a kinasoldado; a taginayonem ti pammati ken ti naimbag a nakem.” (1 Timoteo 1:18, 19) Daytoy a kita ti pannakidangadang dumegdegto pay a maipaay iti Kristiano agingga a ni Jehova a Dios, babaen iti Anakna, dadaelenna amin a bumusbusor iti Kinasoberanona.​—Apocalipsis 19:11-16.

Nasken ti Kinasungdo

Anian a nagpateg para iti Kristiano ti panagtalinaedna a nasungdo! Ngem aniat’ mangtulong kenkuana? No ti maysa a soldado a makigubgubat iti gagangay a pannakibakal ket dumarup a maibusor iti buyot dagiti rinibo, awan namnamana nga agballigi. Uray pay kasanot’ kinamaingelna, isunto ti madaeran. Kasta met laeng ti mapasamak iti Kristiano a soldado a naipasango kadagiti buyot dagiti demonio. Laglagipenna koma nga isut’ saan nga agmaymaysa, babaen tulong ni Jehova a Dios, ni Jesu-Kristo ken dagiti linaksalaksa nga anghel, ti Kristiano, agraman dagiti kapammatianna, magun-odanda ti panagballigi.

Nasken a gundawayantayo ti makapabileg a tulong nga ipapaay ti organisasion ti Dios kadatayo, babaen iti regular a pannakitimtimpuyog iti maysa kadagiti nasurok a 46,000 a kongregasion dagiti Saksi ni Jehova, umawat ti maysa a tao iti pannakasanay iti panangusar kadagiti naespirituan nga igam ken kabal. (Efeso 6:10-20) No pilien ti maysa a manamati nga iputongna ti bagbagina manipud kadagiti kapammatianna, ti indibidual naiyarig a kas soldado a naipasango kadagiti rinibo nga agmaymaysa. Gapuna, nainsiriban a makitunostayo iti organisado nga ili ti Dios iti panangitungpal ti naespirituan a pannakibakal, a liklikan ti aniaman a panangallukoy a mabalin mangikapis kadatayo manipud Nakristianuan nga ar-aramidtayo.

Dikay koma liplipatan ti kinapudno a ti pannakidangadang ti Kristiano ket panangispal-biag, agraman biagna. (1 Timoteo 4:16) Dikay agsansanud manipud iti pannakidangadang a naespirituan babaen iti naregta a trabaho a panangasaba ken panangisuro. “Kas naimbag a soldado ni Kristo Jesus” maparmekyo ti lubong.​—2 Timoteo 2:3, 4; Hebreo 10:38; Juan 16:33.