Agpannuray iti Inted-Dios a Pigsa
Dagiti Tampok Manipud Maikadua a Timoteo
IKKAN ni Jehova dagiti ad-adipenna ti pannakabalin tapno makapagibtur ti susuot ken pannakaidadanes. Ken anian ti pannakasapul ni Timoteo ken dagiti dadduma a Kristiano iti inted-Dios a pigsa! Maysa nga uram ti nangdadael ti Roma idi 64 K.P., ket kuna ti sayangguseng a ni Emperador Nero ti responsable. Tapno masalaknibanna ti bagina, pinabasolna dagiti Kristiano, ket kaawatan a daytoy ti nangtignay iti allon ti pannakaidadanes. Mabalbalin nga idi (agarup 65 K.P.), ni apostol Pablo naibalud manen idiay Roma. Nupay naipasango ken patay, insuratna ti maikadua a suratna ken Timoteo.
Ti surat ni Pablo ti nangisagana ken Timoteo a sarangten dagiti apostata ken agtakder a sititibker iti sango ti pannakaidadanes. Daytat’ nangparegta kenkuana nga agtultuloy iti naespirituan nga irarang-ay ket insalaysayna dagiti sirkumstansia ni Pablo iti pagbaludan. Ti surat tumulong met kadagiti managbasa nga agpannuray iti pigsa nga itden ti Dios.
Makipagsagaba iti Dakes ken Mangisuro iti Kinaemma
Ti Dios ikkannatayo ti pigsa a mangibtur ti pannakaidadanes kas manangiwaragawag ti naimbag a damag. (2Ti 1:1-18) Ni Pablo saanna a linipatan ni Timoteo iti karkararagna, ket malaglagipna ti pammatina nga awan panaginsisingpetna. Ti Dios inikkanna ni Timoteo ‘saan a ti espiritu ti kinatakrut, no di ket ti pannakabalin, ayat, ken nasin-aw a panagpampanunot.’ Gapuna bay-an nga isut’ saan nga agbain iti panangaskasaba ken panagsagaba ti dakes maipaay iti naimbag a damag. Naigunamgunam met kenkuana a “salimetmetan a pagwadan dagiti nasayaat a sao” a nangngeganna ken Pablo, kas met ti rebbeng a panangpetpettayo a naimbag iti umiso a Nakristianuan a kinapudno nupay dagiti dadduma sumiasida iti dayta.
Dagiti bambanag nga insuro ni Pablo ti maipakumit koma kadagiti matalek a lallaki a mangisuro met kadagiti dadduma. (2:1-26) Naigunamgunam ken Timoteo nga agbalin a naimbag a soldado ni Kristo, a matalek no agsagaba ti dakes. Ni Pablo a mismo nagsagaba iti pagbaludan gaput’ panangikaskasaba ti naimbag a damag. Pinaregtana ni Timoteo nga aramidenna ti inggat’ kabaelanna nga isango ti bagina kas naanamongan a mangmangged iti Dios, a lisianna dagiti palpalawag a di mainugot iti nasantuan. Ken naibaga kenkuana a ti adipen ti Apo masapul a sursuruanna met dagiti dadduma a sieemma.
Ikaskasaba ti Sao!
Kasapulan ti pigsa nga itden ti Dios tapno sanguen dagiti maudi nga al-aldaw ken itandudo ti kinapudno ti Kasuratan. (3:1-17) Manipud kadagiti managdakdakes rumsuanto dagiti tattao ‘a kanayon nga agad-adalda ket ni kaanoman dida makagteng iti pannakaammo iti kinapudno.’ Dagita a ‘tattao a dakes ken dagiti mangul-ulbod dumakesdanto la a dumakes, a mangal-allilawda ket maallilawda met laeng.’ Nupay kasta, ni Timoteo ‘agtalinaed kadagiti bambanag a sinursurona.’ Kasta met koma kadatayo, gapu ta pagaammotayo nga ‘amin a Kasuratan ket impaltiing ti Dios ken naimbag a pakasursuruan, pakatinggaran, pakababalawan, ken pakaadalan ti kinalinteg, tapno ti tao ti Dios naan-anay koma ken masursuruan a naimbag iti isuamin nga aramid a nasayaat.’
Ni Timoteo sarangtenna met dagiti apostata ken tungpalenna ti ministeriona. (4:1-22) Maaramidanna dayta babaen ti ‘panangikasabana ti sao’ ken panagtalinaed iti dayta. Nasken daytoy, yantangay ti kongregasion naipasango iti “nariribuk a tiempo” agsipud ta dadduma isursurodat’ ulbod a doktrina. Dagiti met Saksi ni Jehova salimetmetanda ti Sao ti Dios itan, nga ikaskasabada a sigaganat dayta iti kongregasion ken kadagiti tattao iti ruar, uray kadagiti di makaay-ayo a kasasaad. Ni Pablo “inaywananna ti pammati,” nupay isut’ pinanawan dagiti dadduma. Ngem ‘ti Apo ti nangpapigsa kenkuana, tapno babaen kenkuana ti panangasaba maan-anayen.’ Sapay koma ta agpannuraytay met iti pigsa nga itden ti Dios ken itultuloytay nga ikaskasaba ti naimbag a damag.
[Kahon/Ladawan iti panid 31]
Maysa a Nasayaat a Soldado: Ni Pablo inggunamgunamna ken Timoteo: “Makipagsagabaka a kas naimbag a soldado ni Kristo Jesus. Ti agsoldado saan a maringgoran kadagiti pagsapulan daytoy a biag, tapno mabalinna nga ay-ayuen daydiay nangilista kenkuana a soldado.” (2 Timoteo 2:3, 4) Ti soldado a Romano a magmagna ‘agsagaba ti kinadakes’ no agawit kadagiti nadagsen nga ig-igam, kas ti wasay, basket, rasion iti uneg tallo nga aldaw, ken dadduma pay a gargaretna. (Wars of the Jews ni Josephus, Libro 3, kapitulo 5) Saan a maringgoran kadagiti intereses ti komersio, ta daytat’ di mangay-ayo kadagiti appona, ken naabbonganen amin dagiti gastosna. Kasta met, ti maysa a Kristiano agsagaba ti susuot a nainaig iti panagbalin a “naimbag a soldado ni Kristo.” Nupay isut’ mangged tapno matungpalna dagiti Nainkasuratan nga obligasionna, saanna koma a palubosan dagiti di maikari a pannakairaman kadagiti material a bambanag a mamagsardeng kenkuana iti naespirituan a pannakidangadang. (1 Tesalonica 2:9) Iti panangaskasabana iti binalaybalay, usarenna “ti kampilan ti espiritu, kayatna a sawen, ti Sao ti Dios,” ken tulonganna a wayawayaan dagiti tattao manipud narelihiusuan a kinaulbod. (Efeso 6:11-17; Juan 8:31, 32) Yantangay nakapusta ti biagna, bay-an nga amin koma dagiti Kristiano a soldado ay-ayuenda ni Jesu-Kristo ken ni Jehova a Dios iti daytoy a pamay-an.