Manipud Kadagiti Agbasbasa
Panangpasayaat Kadagiti Grado Maysaak nga estudiante, ket kayatko ti agyaman iti artikulo nga “Agimtuod Dagiti Agtutubo . . . Mabalin Ngata a Nasaysayaat Pay ti Maaramidak Idiay Eskuelaan?” (Marso 22, 1998) Nupay kanayon a nangatngato dagiti gradok ngem iti promedio, talaga nga awan a pulos ti pamkuatak idi a rumang-ay pay. Ngem gapu iti daytoy makapainteres ken makaparegta nga artikulo, naamirisko a naimbag nga ad-adu pay ti maaramidak no agaramidak kadagiti nainkalintegan a kalat.
B. R., Estados Unidos
Agtawenak iti 14, ket talaga a diak ammo idi no kasano ti agadal. Patiek a diakto mausar ti dadduma a banag iti masakbayan ket impagarupko nga awan serserbina no adalek ida. Nagbalbaliw ti panunotko idi nabasak daytoy nga artikulo. Kayatko met ti agyaman iti praktikal unay a panangilawlawagyo no kasano ti agadal!
K. F., Japan
Panagngaretnget Maibagay unay ti artikulo nga “Agngaretngetka Kadi?” kadagiti problemak. (Marso 22, 1998) Gapu ta agsagsagabaak iti daytoy a parikut, natakuatak a makaisuro ken makaparegta dayta. Pulos a diak impagarup nga adda ipablaakyo maipapan iti daytoy a tema. Babaen ti kasta a kinanadumaduma ti impormasion, maimpluensiaanyo ti tunggal agbasbasa.
A. M. N. C., Brazil
Babbai Nakasangitak bayat a rinugiak a binasa dagiti serye a “Babbai—Ania ti Masakbayanda?,” iti Abril 8, 1998, nga Agriingkayo! Ita laeng a natukay unay ti riknak. Pagyamanan unay iti pammaregtayo a mangnamnamakami iti masakbayan inton agpatinggan ti mangirurumen a panangtrato.
C. J., Estados Unidos
Napikapikak iti nagririgat nga estilo ti panagbiag ti adu a babbai iti intero a lubong. Pinagsangitnak a nangammo iti amin a banag a kapilitan nga aramiden dagitoy a babbai—mamin-adu a daras nga is-isuda ti agibtur. Dua ti annakko, ket masansan nga agsangitak gapu iti adu a rigatko. Daytoy nga artikulo ti timmulong kaniak a mangamiris a nasaysayaat ti kasasaadko ngem iti adu a sabsabali pay.
K. S., Estados Unidos
Panangsaranget iti Kinabalo Kayatko nga iyebkas ti napasnek a panangapresiarko iti pakasaritaan ni Barbara Schweizer a napauluan iti “Pannakaliwliwa iti ‘Ginget ti Sipnget.’” (Abril 8, 1998) Saanak a balo no di ket naulilaak iti ama, ina, ken manong iti las-ud ti tallo a tawen. Kinuna ni Barbara Schweizer a “sagpaminsan a sumken ni liday.” Agyamanak a nakabasa nga adda makarikna iti marikriknak.
H. T., Hawaii
Maysaak a 17-anyos nga amin-tiempo a managebanghelio, ket uray no awan aniaman a dadakkel a problemak, pinaregtanak daytoy a pakasaritaan a maaddaan iti naragsak ken determinado nga espiritu. Impaawatna kaniak a tartarabayennak ni Jehova ken pulos a dinak baybay-an.
T. C., Italia
Orthodontics Pagyamanan iti artikulo iti Abril 8, 1998 nga “Orthodontics—Ania Dayta?” Agtawenak iti 12 ken nabiit pay a nangrugiak nga agusar iti brace kadagiti ngipenko. Diak unay magagaran iti dayta a banag. Ngem inlawlawag ti artikuloyo no kasano a tulongandak ken di rumbeng a mabainak tangay adu a tattao ti agus-usar iti brace.
J. L., Canada
Naragsakanak unay iti artikulo maipapan iti orthodontics! Nanipud ubingak, kayatko ti maaddaan iti napipintas a ngipen! Itay nabiit, natuppol ti maysa kadagiti makinsango a ngipenko, ken masapul a mayaramidan iti crown, a nakanginngina. Ditoy Yugoslavia, masansan nga awanan dagiti dentista kadagiti nesesita a materiales para iti trabahoda. Ket nakanginngina dagiti pribado a dentista para kadakami nga awan makukuartana. Matektekanakon nga agur-uray iti masakbayan inton addaantay aminen iti perpekto a ngipen!
B. E., Yugoslavia