‘Nakalkaldaang a Kasasaad ti Salun-at ti Isip’
“Iti laksid ti nakaskasdaaw nga irarang-ay ti medisina iti adu nga aspeto ti pannakaaywan ti salun-at,” kuna ti artikulo a naipablaak iti Synergy, maysa a pagiwarnak ti Canadian Society for International Health, “sangsanguentayo ti nakalkaldaang a sangalubongan a kasasaad ti salun-at ti isip.”
Kinuna ti maysa a report a 1 iti kada 4 a tattao iti intero a lubong ti adda depektona iti isip, rikrikna, wenno kababalin. Impakita ti maysa pay a panagadal nga agpadpadoktor ti 1 iti kada 3 a pasiente agsipud ta malmaldaang wenno madandanagan. Ket kuna dagiti managsirarak nga umad-adu dagidiay a bilang.
Apay? Sigun iti panagadal nga indaulo ti Department of Social Medicine ti Harvard University, umad-adu dagiti addaan iti sakit a kas iti clinical depression, schizophrenia, ken dementia agsipud ta “umad-adu dagiti lumaklakay ken bumakbaket.” Nupay kasta, ti panagbiag a napapaut saan laeng nga isut’ makagapu. Dagiti problema iti ekonomia ti maysa pay a makagapu, ta paaduenna dagiti pakasikoran iti moderno a panagbiag.
Kasano a mabalbaliwan daytoy nakalkaldaang a ladawan? Iti laksid ti adu nga aspeto ti panangaywan iti salun-at, kuna dagiti eksperto a masapul a maipangpangruna ti salun-at ti isip agsipud ta “irepresentarna ti kaudian a benneg a mausar iti irarang-ay ti natauan a kasasaad.”