Manipud Kadagiti Agbasbasa

Kontrobersia Maipapan ken Shakespeare Ti artikulo a “Ti Misterio ni William Shakespeare,” (Agosto 8, 1998) ad-adda a pinaregtanak nga agsirarak. Dinakamat ni Eric Sams iti libro a The Real Shakespeare: Retrieving the Early Years ti sumagmamano a makapainteres a punto. Kas pagarigan, adu a saludsod ti mailawlawag babaen ti pannakaawat a mabalin a Katoliko ni Shakespeare nga adda iti Protestante nga Inglatera. Ti ngarud panangliklikna iti narelihiosuan a pannakaidadanes ti mangilawlawag iti maaw-awagan a tawtawen a panagpukawna. Kasta met a dagiti makuna a sinurat ni Shakespeare ket addaan iti adu a pakabigbigan iti biagna idi unana. Ti nagnagan ti sumagmamano a karakter ket nagnagan dagiti miembro ti pamilia ken gagayyemna agraman ti nagan a Hamlet​—ti nagan ti barona. Nagadu ti detalye dagiti drama a pinutarna a mabalin a nagtaud iti personal a kapadasanna a kas ti panagparti.

J. A., Estados Unidos

Saan a nalaka a risuten ti kontrobersia maipapan iti dumadaniw. Ngem apresiarenmi dagitoy a komento.​—ED.

Managayat iti Tumatayab Pagyamanan iti makaay-ayo a panangdeskribiryo iti nakaskasdaaw a parsua ni Jehova iti artikulo a “Ti Cock-of-the-Rock​—Napintas a Tumatayab iti Kabakiran ti Amazon.” (Setiembre 22, 1998) Apagdarikmat nga impasiarnak ti artikuloyo iti kabakiran ti Amazon.

E. L. V., Brazil

Uray kaskasano, inallukoy ti artikuloyo ti atensionko iti naiduma a wagas. Nailawlawag dayta iti positibo a pamay-an, ket impaganetgetna nga inaramid amin ni Jehova dagitoy a parsua nga agpaay a pakaragsakantayo!

L. H., Barbados

Nagustuak unay ti artikulo a “Panagbuya iti Tumatayab​—Makaparagsak a Pagesman Agpaay iti Isuamin?” (Hulio 8, 1998) Ngem makita met iti Abagatan nga America ti hummingbird a tinukoyyo kas billit a naggapu iti “Amianan/Sentral America.”

J. P., Argentina

Kurang ti kapsionmi, ket apresiarenmi ti panangilawlawagyo.​—ED.

Panangisentro iti Panunot Marigatanak idi nga agatension no agsasao ti maestromi. Ngem tinulongannak ti artikuloyo nga “Agimtuod Dagiti Agtutubo . . . Kasano a Makapagatensionak?” (Setiembre 22, 1998) a mangbalbaliw iti ugalik idiay eskuelaan. Nanipud idi binasak ti artikuloyo, nasolbarkon daytoy a problema, ket ad-adda itan a disiplinadoak.

M. A. M., Brazil

Marigatanak nga agatension. Diak impagarup a bassit la gayam a pammaregta ken disiplina iti bagi ti kasapulan iti panagatension. Agkasapulanto daytoy iti napinget a panagregget, ngem panagkunak ket kabaelak dayta!

D. R. A., Estados Unidos

Adu nga impormasion ti linaon ti Agriingkayo! a makapainteres kadagiti agtutubo a kas kaniak. Nagunggonaanak iti daytoy nga artikulo agsipud ta adda problemak maipapan iti di panagatension. Naimpusuan nga agyamanak kadakayo.

M. N., Italia

Tren Nagustuak unay a binasa ti artikulo a “Ti Landok a Dalan​—Agtalinaed Ngata?” (Oktubre 8, 1998) Interesadoak kadagiti tren nanipud pay kinaubingko. Umiso unay ti impormasion nga impaayyo maipapan iti pakasaritaan ti teknolohia ti tren nanipud pay idi rugrugi ti dekada 1800 agingga ita. Pagyamanan iti daytoy makaparagsak nga artikulo.

L. M., Estados Unidos

Agtartrabahoak iti maysa kadagiti kaaadelantaduan a paktoria ti tren iti lubong, ket kablaawankayo iti panangisuratyo iti kasta nga ekselente nga artikulo. Pudno ken napnuan ebidensia ti impormasionyo. Kayatko laeng nga ibaga nga aluminum imbes a di aglati nga asero ti maus-usar iti dadduma a napegges-tarayda a tren. Kas impakita ti nabiit pay nga aksidente iti tren idiay Alemania, mabalin a makadidigra ti napegges a panagpataray.

I. D. C., Portugal