Naaramid Para iti Nadayag a Panggep

KAS immun-unan a naibaga, nabayagen a tumangtangad dagiti tattao iti langit ket im-imtuodenda, ‘Apay ngata nga addada amin ditoy?’ Maysa a nalaing a musiko idi unana a tiempo ti nagkanta a buyogen ti panangapresiar: “Dagiti langlangit ipalawagda ti dayag ti Dios; ket ti law-ang ipakitana ti aramid ti imana.”​—Salmo 19:1.

Ti nangayed a dagatayo gutugotenna ti kasta met la a rikna. Kas pagarigan, kalpasan ti panagbiahena iti law-ang, inyebkas ti astronaut a ni Charles M. Duke, Jr.: “Ti daga ti kapintasan a mabuya iti law-ang, agraman dagiti amin a kolor ti daga, baybay, ken dagiti ulep.” Kinunana pay: “Idi nakitak dayta a naibaskag iti kinasipnget ti law-ang, nariknak ti kasla espiritual a kapadasan.”

Ania ti riknam no matmatam ti naariwanas, nabituen a langit? Wenno makitam ditoy daga ti makakayaw a natural a kinapintasna? Pampanunotem kadi no kasano a timmaud, wenno apay a timmaud?

Panangipakaammona iti Panggepna

Nangidatag ni Jehova iti saludsod ken ni Job: “Sadino aya ti yanmo idi inkabilko dagiti pamuon ti daga?” (Job 38:4) Ti saludsod ti namagpakumbaba ken Job, ta siempre, isu ket awan pay idi a tiempo. Ngem nabayagen sakbay pay ti tiempo ni Job a nangparsua ti Dios kadagiti annak a lallaki a kaladladawanna​—dagiti espiritu a persona, dagiti anghel. (Salmo 104:4, 5) Isu nga iti panagsalsaludsodna ken Job maipapan iti daga, inimtuod ti Dios: “Asino ti nangikabil iti bato a pasulina, idi dagiti bitbituen ti agsapa [dagiti anghel] nagdaniwda a sangsangkamaysa, ken amin dagiti annak a lallaki ti Dios dimmir-ida gapu iti rag-o?”​—Job 38:6, 7.

Apay a kasta unay ti ragsak dagiti anghel idi naparsua ti daga? Agsipud ta nabatad nga ammoda a naisangsangayan ti daga kadagiti pisikal a parsua ti Dios. Nalabit nangipaay pay ti Dios kadagiti anghel iti panirpatan iti nadayag a panggepna maipapan iti daga. Idi agangay, impalgak ni Jehova iti sangatauan a “pinarsuana [ti daga] a saan nga ongaong, [no di ket] binukelna tapno isu ti pagyanan,” wen, tapno pagnaedan ken tagiragsaken dagiti tattao, iti agnanayon.​—Isaias 45:18.

Kalpasan a pinarsuana ti lalaki ken babai, impakaammo ni Jehova ti panggepna maipapan iti daga idi binilinna ti umuna a pagassawaan: “Agbungakayo, ket agadukayo, ket punnuenyo ti daga, agbalinkayo nga Appo kenkuana; ket iturayanyo dagiti ikan ti taaw, ken dagiti tumatayab kadagiti langit, ken amin a parsua a sibibiag nga aggaraw iti rabaw ti daga.” (Genesis 1:28) Pinarsua ti Dios ti natauan a pagassawaan nga addaan iti namilagruan a pannakabalin nga agpataud iti annak, ken panggepna a mapnonto ti intero a daga kadagiti perpekto a tattao a mangiparangarang kadagiti naimbag a galad ti Namarsua kadakuada.

Pudno nga agnanaed itan ti tattao iti dandani amin a lugar ditoy daga, ngem saanda a pagnanaedan sigun iti pamay-an a pakaidayawan ti Namarsua kadakuada. Agsakit, matmatay dagiti tattao, ken saan nga umiso ti panangaywanda iti daga wenno kadagiti animal nga adda iti dayta. Pinarsua ni Jehova a perpekto dagiti tattao, ken panggepna nga inton agangay, ti intero a daga ket iturayanto ti nalinteg a natauan a pamilia a sangsangkamaysada amin nga agbiag nga agnanayon iti naindagaan a paraiso.

Makapagtalektayo a matungpalto daytoy a panggep. Apay? Gapu iti kari ni Jehova a ti pinanggepna “tungpalennanto.” (Isaias 46:11; 55:11) Ipasiguro ti Saona: “Ti sililinteg tawidennanto ti daga, ket agtaengto kenkuana nga agnanayon.” (Salmo 37:29; Apocalipsis 21:3, 4) Nalabit adut’ makalagip nga inkari ti Anak ti Dios a ni Jesu-Kristo iti agbabbabawi a managdakdakes a kaduana a natay: “Makikaduakanto kaniak idiay Paraiso.” (Lucas 23:43) Kasano a matungpal dayta?

No Kasano a Matungpal ti Panggep ti Dios

Inton naan-anayen nga iturayan ni Kristo ti daga, mapagungarto dayta a managdakdakes nga agbiag ditoy daga iti sidong ti nabayagen a maikarkararag a nailangitan a turay. (Salmo 72:1, 5-8; Mateo 6:9, 10; Juan 18:36, 37; Aramid 24:15) Nupay kasta, sakbay a mapagungar dagiti natay, madalusanto ti daga kadagidiay amin nga agkedked nga agdayaw iti Dios. Ikari ti Biblia: “Ti Dios ti langit mamangonto iti maysa a pagarian a kaanoman dinto madadael.” Ken innayonna: “Burakennanto ken ibusennanto amin dagitoy a pagpagarian, ket isu agtalinaedto iti agnanayon.”​—Daniel 2:44.

Sigurado a ti kasisiriban a Namarsua iti engrande nga unibersotayo matungpalna ti panggepna a mangpunno itoy a daga kadagiti tattao a mangiparangarang kadagiti nasayaat a galadna! (Genesis 1:27) Tapno maaddaan dagiti tattao iti gundaway a makaammo no kasano nga ibanagto ti Dios daytoy, nangipaay iti maysa a libro a mabasa dagiti tattao iti amin a lugar.a Imutektekam no kasano ti panangdeskribir ti maysa a lalaki idiay Dayton, Ohio, E.U.A.:

“Diak malpas a mabasa daytoy a libro bayat ti panagbiagko. Nangrugi daytoy babaen ti panangisalaysayna iti kaadda idi ti maysa a napintas a pagtaengan a nadadael gapu iti iyaalsa. Rigat, didigra, ladingit, panagpipinnatay, ken ipapatay ti imbungana. Bayat ti panagadu daytoy a pamilia, kimmaro ti pannakaisagmakda iti pannakaupay ken kinasipnget. Iti panaglabas dagiti siglo, timmaud ken natnag dagiti nasnasion, timmaud ti rinibu a kita dagiti tattao, naiparangarang ti tunggal emosion ti tao manipud iti nakaro a gura agingga iti panagayat ti maysa a martir. Ti namnama a rissik laeng idi unana ket dimmakkel a nagbalin a naan-anay a kinatalged. Ipasdekto manen ti maysa a perpekto a gobierno ti napintas a pagtaengan. Ti agturayna isu ni Kristo Jesus nga Ari. Ti gobierno isut’ Pagarian ti Dios.Ti pamilia isut’ natauan a puli. Ti libro isut’ Biblia!”

Paregtaendaka nga amirisem daytoy kapatgan a libro, ti Biblia. Mainayon pay, awisendaka nga amirisem ti ad-adu pay a detalye dagiti ebidensia a daytoy nga uniberso ken dagiti adu a pasetna saanda laeng a naiparna a timmaud. Masarakam ti panangamiris dagiti edukado iti daytoy a banag iti libro nga Is There a Creator Who Cares About You? Iti panid 32 daytoy a magasin, maammuam no kasanoka a makagun-od iti maysa a kopia.

[Footnote]

[Ladawan iti panid 10]

“Ti kapintasan a buya iti law-ang”

[Credit Line]

Rinetrato ti NASA