Panangusar Kadagiti Agdan—Sigsiguraduem Kadi no Natalgedda met Laeng?
Babaen ti koresponsal ti Agriingkayo! idiay Ireland
MASAPUL a sukatan ni Paul ti bombilia iti ruar ti balayna. Masapul met a dalusanna ti makinruar a paset ti tawa iti ngato—namin-adun nga imbaga ni baketna daytoy kenkuana. Ngem kanayon nga intantan ni Paul dagitoy a trabaho. Apay? Agsipud ta masapul nga agusar iti agdan.
Nainkalintegan ti panagamakna. Ammona a dagiti aksidente gapu iti panagusar kadagiti agdan ket mabalin a pakaigapuan dagiti grabe ken makapapatay pay ketdi a pannakadangran. Masansan a mapasamak dagitoy agsipud ta ti trabahador dina pinanunot a naimbag no kasano ti umiso a panangusar iti agdan.
Sakbay nga inaramidna dagitoy a trabaho, ania ti masapul nga usigen ni Paul maipapan kadagiti agdan? Adtoy ti sangapulo a singasing a nakatulong kenkuana a mangaramid a sitatalged kadagiti bambanag.
Natalged Kadi ti Agdan?
1 Mangalaka iti umiso nga agdan. Nalabit masapul a gumaw-atka no ababa unay ti agdan. Mabalin a ti pangisaadam napeggad no atiddog unay dayta. Liklikam ti mangusar iti makupinkupin nga agdan tapno makapanka iti attic. Mangaramidka iti umiso nga agdan a maitutop iti atticmo, wenno agusarka iti nakasadag nga agdan.
2 Sukimatem a naimbag ti agdanmo. Kanayon kadi nga adda ti agdan iti ruar? Bumlad dagiti agdan a kayo no mabasa ken kumsenda no mamagaan. Inton agangay, lumukay dagiti tukadna, a mamagbalin iti agdan a saan a natalged. Adda kadi birri kadagiti kayo a tukadna, wenno adda kadi makita nga agrunrunot? Masansan nga adda metal a nangtapaya iti tunggal kayo a tukad. Naikabit kadi a naimbag ken natalged? Nabungtol kadi wenno naglati dagiti tornilio a pangikabit kadagiti metal a tukad iti hardinera (upright)? Mabalin nga adda kararet ken tali dagiti daddadakkel a mapaatiddog nga agdan. Nasayaat kadi ti panagandar dagiti kararet? Madlaw kadi a narunoten dagiti talina, ken umdas pay kadi ti kaatiddogna? Tarimaanem amin wenno sukatam a dagus.
Mabalin nga adda gerger dagiti tukad tapno dida agligsay. Siguraduem nga ikkaten ti aniaman a rugit a mabalin a naurnong kadagiti gerger. Adda koma ap-ap idiay dapan ti amin nga agdan tapno dida agligsay. Siguraduem no adda dagitoy ken saanda pay a narunot.
3 Sitatalged nga iyakarmo dagiti agdan. No iluganmo, sitatalged nga igalutmo ti agdan iti umno a pakaikabilanna, wenno igalutmo iti trailer ti dua a pungtona. Nalabit agsawasaw ti atiddog nga agdan iti likudan ti lugan, isu a mangigalutka iti lupot iti pungtona a mamakdaar ken nalaka a makita ti sumarsaruno kenka.
Nataltalged nga amang no dua a tao ti mangawit iti atiddog nga agdan. Ngem no masapul nga awitem a bukodmo ket kayatmo nga ibaklay, tenglem a naimbag no ibaklaymo ket timbengem babaen ti maysa pay a takiagmo. Tapno saanmo a madungpar ti siasinoman, taginayonem a nangatngato ngem ti ulom ti makinsango a pungtona. Ngem laglagipem nga agpada koma ti kaatiddog ti agdan iti likudam ken iti sanguanam! Kadagiti komedia, kasla nakakatkatawa no adda tattao a madungpar ti agdan. Iti kinapudnona, nupay kasta, saan a pulos a nakakatkatawa daytoy—nangnangruna no sika ti nadangran.
No bagkatem ti agdan a sitatakder, nadagdagsen koma ti awit iti makinngato a paset ti bagim, maysa nga imam ti mangbagkat ket ti sabali nga imam itag-ayna iti ngato ti abagam tapno agtimbeng. Liklikam dagiti barut ti koriente, permanente a pagikapetan ti silaw, ken karatula iti ngato!
4 Ipuestom a siuumiso ti agdan. Tapno natalged, saan koma a nakairig ti agdan iti sikigan ken masapul a nakapuesto iti 75 degree manipud iti suelo.
5 Mangikabilka iti pagsadaganna iti ngato ken iti arsadanan. Annadam no sadino ti pangisaadam iti makinngato a paset ti agdan. Siguraduem a natalged ti makinngato a pagsaadan ti agdan ken saan nga agligsay. Pulos a dika isaad ti agdan iti sarming wenno plastik. No mabalin, igalutmo a sitatalged iti permanente a paset ti patakder, a ti makinngato a paset ti agdan ket agsawasaw iti agarup maysa a metro manipud iti pagsaadanna.
Agannadka a nangnangruna iti damo nga iyuulim iti agdan, igalutmo iti makinngato a murdong. Peligroso dayta umuna nga iyuulim, ken kasta met no umulogka, no naikkatmon ti galutna iti ngato. Tapno nataltalged ti umuna nga iyuulim ken ti iyuulogmo, adda koma katulongam a mangtengngel iti arsadanan ti agdan no umulika. Nupay kasta, epektibo laeng daytoy no ti agdan ket ab-ababa ngem 5 a metro.
No agsalog ti daga manipud iti patakder, mangikabilka iti nadagsen a banag iti arsadanan ti agdan wenno igalutmo ti makimbaba a tukad iti permanente a paset ti patakder. No saan a patag ti daga ngem natangken, tingalam tapno agpatas. Mangikabilka iti tabla wenno aniaman a natangken a banag iti arsadanan no nalukneng ti daga wenno naruka.
No agusarka iti makupkupin nga agdan, siguraduem a ti uppat a dapanna ket nakadisso a naimbag iti daga, a ti dua a dapanna nasayaat ti pannakaukapda ken sitatalged a naiserra dagiti pasetna a mamagbalin iti dayta a natalged.
Natalgedka Kadi?
6 Sukimatem ti sapatosmo. Sakbay nga umulika iti agdan, siertuem a namaga dagiti suelas ti sapatosmo. Ikkatem ti aniaman a kas iti pitak a mabalin a mangigalis kenka.
7 Siaannad nga awitem dagiti bambanag. Tapno nawaya dagiti imam no umulika, isaluksok iti sinturonmo ti pagkargaam kadagiti rimientam. Ipamuspusam ti panangyulim kadagiti napadiwakal a banag, ngem no masapul nga usarem ti agdan, kanayon koma a nawaya ta imam nga agkapet iti agdan tapno makakapetka iti sikigan ti agdan bayat nga umulika. Agpanunotka ken agbalinka a manangipamusposan, ken dika agap-apura.
No agusarka iti rimienta a de koriente, dika pulos usaren ti dua nga imam a mangpaandar kadagitoy. Kas pagarigan, ti barrena mabalin a di mapakpakadaan nga agsardeng wenno maligsay a pakaigapuan ti pannakatnagmo. Dika pulos i-set dagitoy nga agandar; mabalin a matnagda no agan-andarda pay laeng.
8 Agbalinka a nakonsiderasion kadagiti sabsabali. No agtartrabahoka iti lugar a publiko, naparang koma ti agdan ken, no mabalin, palawlawam iti tali. No masapul nga iyakarmo ti agdan iti maysa a lugar, ammom koma a di ammo dagiti sabsabali daytoy. Ipakaammom ti nainggayyeman a pakdaar, ket kitaem no nawaya ti dalan.
No addaka iti agdan ket adda awitmo a rimienta, laglagipem nga uray laeng ti bassit nga screwdriver ket mabalin a makadangran no matnag manipud iti ngato. No masapul a pumanawka gapu iti aniaman a rason ket dika naigalut ti agdan a sitatalged, adda koma pagbantayem, wenno ipaiddam pay laeng ti agdan agingga nga agsublika. Dika baybay-an nga awan ti agbantay iti dayta.
9 Sukimatem ti salun-atmo. Tangay masapul ti kinatimbeng ken bansag iti iyuuli, dika umuli no makasaksakitenka wenno marurusokka wenno maul-ulawka.
10 Umulika a sitatalged. Kanayon koma a sipapanunotka iti kinatalged. Dika pulos ipalubos nga aggiddan nga umuli ti dua wenno ad-adu a tao iti agdan. Dika pulos umuli iti agdan no napigsa ken bumanesbes ti angin. Dika pulos agtakder iti kangatuan a tukad ti makupkupin nga agdan wenno iti ngato ti maikapat a tukad manipud iti murdong ti atiddog nga agdan. Dika pulos labsen a paatiddogen ti mapaatiddog nga agdan; kanayon nga adda koma tallo a tukad nga agsaip. Dika pulos gaw-aten ti adayo unay. No agsadagka iti adayo unay no addaka iti agdan, nalaka a maawananka iti kinatimbeng ket matnagka. Imbes nga irisgom ti pannakadangranmo, iyakarmo laengen ti agdan, uray no mabaybayag a malpas ti trabaho. No umulika, diretso ti kitaem.
Kasano man ti panagannadmo, adda latta peggad no agusarka iti agdan. Nalabit makissayam dagitoy babaen ti tulong dagitoy a singasing. Nakatulong dagitoy ken Paul. Babaen ti panangsurot kadagitoy, sitatalged a naikabilna ti baro a bombilia nga adda iti ruar. Ket ti ngay panangdalusna iti tawa? Bueno, nalabit aramidennanto dayta iti sabali a tiempo!
[Dagiti ladawan iti panid 22, 23]
1 Mangalaka iti umiso nga agdan
2 Sukimatem a naimbag ti agdanmo
3 Sitatalged nga iyakarmo dagiti agdan
4 Ipuestom a siuumiso ti agdan
5 Mangikabilka iti pagsadaganna iti ngato ken iti arsadanan
6 Sukimatem ti sapatosmo
7 Siaannad nga awitem dagiti bambanag
8 Agbalinka a nakonsiderasion kadagiti sabsabali
9 Sukimatem ti salun-atmo
10 Umulika a sitatalged