Manipud Kadagiti Agbasbasa
Dati a Kriminal Masapul nga agsuratak tapno iyebkasko ti kasta unay a panangapresiarko iti kapadasan ni Enrique Torres, Jr., a napauluan “Ti Ngumerngernger a Leon Nagbalin a Naamo a Karnero.” (Agosto 8, 1999) Impaganetgetna ti ayat ken asi ti Diostayo a ni Jehova, ken ti kinaanusna kadatayo. Impakitana met a kas nagannak, pulos a ditay koma maawanan ti namnama kadagiti annaktayo, uray nakaron ti pananglabsingda kadagiti pagalagadan ti Dios.
J. F., England
Napadakkelak a maysa a Kristiano, ngem gapu iti dakes a pannakikadkadua, nasumokko ti droga ken kinaranggas. Iti edad a 18, nasentensiaanak a maibalud iti 25 a tawen. Nupay naisubliakon iti kongregasion Kristiano, masansan a mariknak nga awan serserbik. Ngem kalpasan a nabasak daytoy nga artikulo, maapresiarko nga asideg ni Jehova kadagidiay agbirbirok kenkuana. Nupay addaak pay laeng iti pagbaludan, pinaregtanak daytoy a kapadasan tapno agtalinaedak a natibker.
R. B., Estados Unidos
Dagiti Hummingbird Nagsayaat ti artikulo a “Ti Billit a Mangbisong Kadagiti Sabong.” (Agosto 8, 1999) Nagpaliiwak idin kadagiti hummingbird, ngem diak impagarup a nagbabassitda gayam. Babaen ti sasao ken retrato, naallukoyyo ti interesko kadagitoy nakaskasdaaw a parsua.
R. H., Alemania
Nagustuak ti impormasion ken dagiti napintas nga ilustrasion. Kabayatan ti kalgaw, masansan a sarungkaran dagiti hummingbird ti hardinko. Talaga a makaparagsak a buyaen dagitoy nakaskasdaaw a billit. Namin-adun a naragsakanak uray iti panangbuybuyak laeng kadakuada.
C.S.S., Brazil
Kinatalged ti Agdan Pagyamanan iti artikulo a “Panangusar Kadagiti Agdan—Sigsiguraduem Kadi no Natalgedka met Laeng?” (Agosto 8, 1999) Nabiit pay a natnagak iti agdan isu a naopera ti tumengko. Apresiarek ti sangapulo a singasingyo ket laglagipekto dagitoy inton sumaganad nga agusarak iti agdan.
D. N., Mexico
Space Station Agtawenak iti 16, ket pagay-ayatko ti panagsukisok iti law-ang. Isu nga agyamanak iti artikulo a “Ti International Space Station—Agrikrikus a Laboratorio.” (Agosto 22, 1999) Magustuak unay dagiti artikulo a kas iti daytoy!
K. E., Estados Unidos
Padayawanyo daytoy nga space station nga awan man la uray maysa a sao a pangkondenaryo iti dayta. Saan a dinakamat ti Dios daytoy kas paset ti planona para iti tao. Ket nakababain ti magastos iti maminsan a panagpatayab, idinto ta minilion ti mabisbisinan. Ibabainyo ti Dios no padayawanyo dagita a bambanag.
P.N.M., England
Kuna ti Biblia a ‘naited ti daga kadagiti annak ti tattao.’ (Salmo 115:16) Ngem awan ti Nainkasuratan a pagibatayan iti panangibaga a dakes no aginteres ti tao iti law-ang. Kinapudnona, paregtaen ti Biblia dagiti tattao nga addaan pammati a paliiwenda ti langlangit kas pamay-an ti panangkita iti kinasirib ken pannakabalin ti Dios a mangparsua. (Salmo 8:3, 4; 19:1) Nupay kasta, saanmi a panggep a padayawan ti naiplano nga space station; impadamagmi laeng dagiti plano ti pannakaibangonna. Panawen laeng ti makaibaga no makapataudto ti space station iti panagsirarak a mangikalintegan iti nagdakkel a gastosna.—ED.
Ilalasat Manipud Pannakaidadanes Kabasbasak ti artikulo a “Panagserbi iti Dios Nupay Maipasango ken Patay.” (Agosto 22, 1999) Gapu iti panagibtur dagiti kakabsat idiay Angola iti nasurok a 17 a tawen, ti daga a kasla natikag idi iti naespirituan ket naparaburanen iti nawadwad nga apit!
R. Y., Japan