Agpatinggan ti Nuklear a Peggad?
ITI nasurok nga 40 a tawenen, nagpeggad ti lubong iti nuklear nga armagedon. Kalpasanna, idi 1989, narbek ti Berlin Wall—a nangrugian ti pannakatnag ti Komunismo a Soviet. Di nagbayag, nagtutulag dagiti nabibileg a nasion nga isardengdan ti panagpipinnaturongda kadagiti missile-da. Gapu ta kasla simmardengen ti nuklear nga “Armagedon,” wenno uray kaskasano naitantan, inyebkasen ti lubong ti nabayagen nga ur-urayenna a pannakabang-ar.
Ngem patien ti adu nga eksperto a nasapa pay unay nga agrambakda. Idi 1998 nayabante ti nalatak a doomsday clock ti The Bulletin of the Atomic Scientists iti lima a minuto, agingga iti siam a minuto sakbay ti ibebettak ti nuklear a gubat—a nalawag a mangipamatmat nga adda pay nuklear a peggad.a Agpayso a nagbalbaliwen ti kasasaad ti lubong. Saan laeng a ti dua a nabibileg a nasion nga addaan nuklear nga igam a temporario a simmardeng a rumaut ti agam-amak. Ita sumagmamanon a nasion ti makabael nga agaramid kadagiti nuklear nga igam! Kasta met, agamak dagiti eksperto a di agbayag, sumagmamano a grupo dagiti terorista ti makagun-od kadagiti material a radioaktibo ket mangaramidda iti simple a bomba atomika.
Kasta met, nupay adun ti naksay, addaan pay laeng ti Estados Unidos ken ti Russia kadagiti nakaam-amak nga arsenal ti nuklear nga igam a pakigubat. Sigun iti maysa a grupo dagiti managsirarak a naawagan ti Committee on Nuclear Policy, adda 5,000 a nuklear nga igam a naipaturong itatta a madadaan a mausar. “Ngarud,” kuna ti reportda, “no adda espesipiko a bilin a mausar dagitoy iti sidong dagiti agdama a kasasaad, 4,000 [intercontinental ballistic missile] nga igam a pakigubat (sag-2,000 iti tunggal dasig) ti maipatayab kadagiti puntiriada iti sumagmamano laeng a minuto ken ti sabali pay a 1,000 [dagiti ballistic missile nga ipatulod ti submarine] nga igam a pakigubat ti maipatayaben kadagiti puntiriada kalpasan la unay dayta a panangibilin.”
Ti kaadda daytoy nga arsenal gargarienna a mapasamak ti aksidente wenno uray pay ketdi ti naiplano a gubat. Kastoy ti impakdaar ti nalatak a Ruso a nalaing iti estratehia a ni Vladimir Belous: “Maikontra iti pagayatan dagiti lider iti politika, ti makadidigra nga aksidente isagmakna ti lubong iti thermonuklear a didigra.” Isu a nupay mabalin a nalpasen ti Cold War, talaga nga adda pay laeng ti pangta ti nuklear a holocaust. Ngem kasano kapeggad dayta a pangta? Maikkatto pay ngata ditoy daga dagiti nuklear nga armas? Tamingen dagiti sumaganad nga artikulo dagitoy nga isyu.
[Footnote]
a Ti doomsday clock iti parupa a panid ti The Bulletin of the Atomic Scientists ket maysa a simbolo ti naipagarup a kinaasidegen ti lubong iti “ibebettak” ti nuklear a gubat. Bayat ti pinulpullo a tawen, nayakaren ti minute hand ti relo tapno iparangarangna dagiti panagbalbaliw iti kasasaad ti politika iti lubong.
[Picture Credit Line iti panid 3]
Dagiti retrato ti panagbettak kadagiti panid 2 ken 3: rinetrato ti U.S. National Archives