Ania ti Ibaga ti Biblia Maipapan iti Nuklear a Gubat?

Agtultuloy ti posibilidad nga adda mapasamak a nuklear a gubat ditoy lubong gapu ta manmanteneren ken papaaduen dagiti nabibileg a nasion dagiti nuklear nga armasda. Normal a mapanunot dagiti tattao a no ad-adu ti nuklear nga armas, dakdakkel ti posibilidad ti nuklear a gubat. Madanagan pay ketdi ti dadduma a ti panangusar iti maysa a bassit a nuklear a bomba ket pangrugian ti nuklear a gubat a mangdadael iti lubong. Ibaga ti Bulletin of the Atomic Scientists a “kanayon nga adda posibilidad a mapasamak ti nuklear a gubat iti panawentayo.”

Posible kadi nga addanto nuklear a gubat? No wen, makalasatto kadi ti planetatayo? Ken ania ti aramidentayo tapno saantayo unay a madanagan maipapan iti posibilidad nga addanto nuklear a gubat? Ania ti ibaga ti Biblia?

Iti daytoy nga artikulo

Imbaga kadi a nasaksakbay ti Biblia nga addanto nuklear a gubat?

Awan ti espesipiko nga ibaga ti Biblia maipapan iti nuklear a gubat. Ngem imbaga ti Biblia dagiti kababalin ken paspasamak a posible nga agresulta iti nuklear a gubat.

Panunotem a naimbag dagitoy a bersikulo ti Biblia sa ikomparam iti mapaspasamak iti lubong ita:

Bersikulo ti Biblia: Insaludsod dagiti adalan ni Jesus: “Anianto ti pagilasinan ti kaaddam ken ti panungpalan daytoy a sistema ti bambanag?” Insungbat ni Jesus: “Bumusorto ti nasion iti sabali a nasion ken ti pagarian iti sabali a pagarian.”—Mateo 24:3, 7.

Paspasamak iti lubong: Dagiti pagilian, a pakairamanan dagiti addaan kadagiti nuklear nga armas ken kayada ti agaramid kadagita, ket masansan nga agusar iti armas no makilabanda.

“Iti nabiit pay a tawtawen, ad-adda a nagbalin a bayolente ti lubong. Immadu ti bilang dagiti panaglalaban.”—The Armed Conflict Location & Event Data Project.

Bersikulo ti Biblia: “Iti tiempo ti panungpalan, makidinnuronto [iti ari ti amianan] ti ari ti abagatan.”—Daniel 11:40.

Paspasamak iti lubong: Kas nasaksakbay nga imbaga ti Biblia, agdidinnuron wenno agkikinnompetensia dagiti agkakaribal a pagilian ken dagiti kaaliadoda tapno agbalinda a kabilgan a nasion. Uray no saan a direkta nga aglalaban dagiti pagilian nga addaan kadagiti nabibileg a nuklear nga armas, itultuloyda latta ti agar-aramid kadagiti napigpigsa a nuklear nga armas.

“Iti napalabas a sangapulo a tawen, nagtultuloy nga immadu ti bilang ti panaglalaban dagiti pagilian, a tunggal maysa kadagiti aglalaban a pagilian ket supsuportaran dagiti nabileg a pagilian.”—The Uppsala Conflict Data Program.

Bersikulo ti Biblia: “Iti maudi nga al-aldaw, dumtengto dagiti delikado ken narigat a tiempo. Ta . . . dagiti tattao [ket] . . . saanda a kayat ti makitulag, manangpadakes, awanan panagteppel, [ken] nauyong.”—2 Timoteo 3:1-3.

Paspasamak iti lubong: Kas iti kaaduan a tattao ita, masansan a saan met nga agtutunos dagiti lider ti lubong. Imbes nga urnosenda ti dida pagkikinnaawatan iti natalna a pamay-an, mabalin a mangbutbutengda wenno usarenda pay ketdi ti pannakabalinda, ket lallalo a marubroban ti posibilidad a mapasamak ti nuklear a gubat.

“No awan ti maaramid a pamay-an tapno maadda ti panagtutunos, umadu nga umadu dagiti makadangran a panaglalaban.”—S. Saran ken J. Harman, World Economic Forum.

Ipalubos kadi ti Dios ti nuklear a gubat?

Awan ti ibaga ti Biblia. Ngem ibagana nga adda dagiti “nakabutbuteng a buya,” wenno nakaam-amak a pasamak, iti panawentayo. (Lucas 21:11) Maysa kadagita ket ti panagpabettakda kadagiti atomiko a bomba idi Gubat Sangalubongan II. Ilawlawag ti Biblia no apay nga ipalpalubos ti Dios ti panaggugubat. Tapno maammuam ti ad-adu pay, buyaem ti video nga Apay nga Ipalpalubos ti Dios ti Panagsagaba?

Makalasatto kadi ti planetatayo a Daga?

Wen. Uray agusar manen dagiti tattao kadagiti nuklear nga armas, saan nga ipalubos ti Dios a kumaro ti situasion nga uray la madadael ti intero a lubong. Ibaga ti Biblia a saan a madadael ti planetatayo no di ket pagyanan dayta dagiti tattao iti agnanayon.

“Ti daga agtalinaed iti agnanayon.”—Eclesiastes 1:4.

“Ti pudno a Dios, ti Nangporma iti daga, . . . saanna a pinarsua [dayta] nga awan serserbina, no di ket pinormana a pagnaedan.”—Isaias 45:18.

Pampanunoten ti dadduma a manmanonto laengen ti agyan ditoy daga iti masanguanan ken marigatandanto pay nga agtultuloy nga agbiag ta saanen a nabunga ti daga a resulta ti polusion gapu iti nuklear a gubat. Ngem aniaman a pannakadadael ti daga gapu kadagiti gubat, ibaga ti Biblia a naan-anayto a maisubli iti dati a kasasaadna.

“Agragsakto ti let-ang ken ti natikag a daga, ket agrag-onto ti desierto ken agsabongto a kas iti safron.”—Isaias 35:1.

Tattao a maragragsakan nga agtrabtrabaho iti paraiso a daga. — Kayat ti Dios nga agbiagtayo a naragsak iti nakapimpintas a daga

Dinisenio ti Namarsua ti daga nga addaan iti nakaskasdaaw nga abilidad a makarekober no madadael. Ngem usarento ti Dios ti pannakabalinna a mangisubli iti dati a kasasaad ti daga, ket agbalinto dayta a nakapimpintas a pagyanan dagiti tattao iti agnanayon.—Salmo 37:11, 29; Apocalipsis 21:5.

Kasanom a malabanan ti panagdandanag gapu iti posibilidad ti nuklear a gubat?

Adda dagiti madandanagan wenno mabutbuteng gapu iti posibilidad a mapasamak ti nuklear a gubat ken dagiti mabalin nga epektona. Makatulong dagiti kari ken pammagbaga ti Biblia tapno malabananda dayta. Kasano?

Ibaga ti Biblia nga adda nasayaat a masakbayan ti daga ken dagiti aggigian iti dayta. No ammotayo dayta a namnama, agbalin dayta kas “angkla ti biagtayo” a mangkissay iti panagdandanagtayo. (Hebreo 6:19, footnote) Maksayan met ti panagdandanagtayo no agpokustayo laeng iti mapaspasamak iti kada aldaw, ken saantay a sangkapanunot dagiti dakes a banag a mabalin a mapasamak iti masanguanan. Kas imbaga ni Jesus, ‘ti laeng problema ita nga aldaw ti panunotentayo.’—Mateo 6:34.

Nagpateg nga aywanantayo ti mental ken emosional a salun-attayo. Maaramidtayo dayta no liklikantayo dagiti saan nga importante nga impormasion a mangpadanag kadatayo, kas kadagiti diskusion, prediksion, ken opinion maipapan kadagiti kaudian a panagrang-ay iti panagaramid iti nuklear nga armas. Saanna met ketdi a kayat a sawen a ditay kayat a sanguen ti realidad. Imbes ketdi, mangar-aramidtayo laeng kadagiti pamay-an tapno saantayo a sangkapanunot dagiti pasamak a saantayo a kontrolado ken posible a saan met a mapasamak.

“Madagsenan ti puso ti tao gapu iti danag, ngem maragsakan dayta gapu iti naimbag a sao.”—Proverbio 12:25.

Agpokuska kadagiti positibo a bambanag iti biagmo tapno saan a dagiti dakes a damdamag ti mapampanunotmo.

“Sapay koma ta ti Dios a mangted iti namnama punnuennakayo iti kasta unay a ragsak ken talna gapu ta nagtalekkayo kenkuana.”—Roma 15:13.

Collage: Lalaki a mangnamnama iti nasayaat a masanguanan. 1. Iti likudna, adda panaggugubat. Makita dagiti eroplano a pakigubat, missile, ken kasla uong nga ulep. 2. Iti sangona, makita ti nadalus ken natalna a daga, berde a katantanapan, agay-ayus a karayan, ken dagiti billit. — Sigurado a mapasamak ti ibagbaga ti Biblia a nasaysayaat a masanguanan

No ad-adu ti maammuam maipapan kadagiti kari ti Dios, maaddaanka iti namnama, naragragsakka, ken adda talna ti panunotmo.

Naipadto kadi iti Biblia a ti Armagedon ket nuklear a gubat?

Pampanunoten ti dadduma a ti Armagedon ket nuklear a gubat iti intero a lubong. Baka maim-imadyinda a nakaro a didigra ti resulta dayta.

Ngem iti Biblia, ti sao nga “Armagedon” ket tumukoy iti gubat iti nagbaetan ti Dios ken ‘dagiti ari iti intero a daga,’ wenno dagiti gobierno ti tao.a (Apocalipsis 16:14, 16) Ti Armagedon ket saan a kas iti panagusar iti nuklear a bomba nga awan pilpilienna, ken basta lattan dadaelenna dagiti tattao ken ti daga. Imbes ketdi, dagiti laeng managdakdakes ti dadaelen ti Dios inton Armagedon, isu a siguradonto nga adda pudpudno a talna ken seguridad.—Salmo 37:9, 10; Isaias 32:17, 18; Mateo 6:10.

Ania ti ibaga ti Biblia a solusion iti gubat?

“Pagsarsardengenna dagiti gubat iti intero a daga. Tukkolenna dagiti pana ken putdenna dagiti pika; puoranna dagiti lugan ti militar.”—Salmo 46:9.

Ipakitanto ni Jehovab a Dios ti pannakabalinna kadagiti aggugubat a nasion. Pasardengenna ti panaggugubatda ken dadaelenna dagiti armasda a pakigubat. Aramidennanto dayta babaen ti Pagarianna, ti nailangitan a gobierno a mangsukat iti amin nga agtuturay ditoy daga.—Daniel 2:44.

Suruanto ti Pagarian ti Dios dagiti tattao nga agbiag a natalna ken agtutunos. Gapu ta maymaysanton a gobierno ti mangituray iti intero a daga, awanton dagiti agririri a gobierno. Saanton a sursuruen dagiti tattao ti makigubat. (Mikias 4:1-3) Anianto ti resultana? “Agtugawto ti tunggal maysa iti sirok ti ubasna ken iti sirok ti kayona a higos, ken awanto ti pagbutnganda.”—Mikias 4:4.

a Kitaen ti artikulo nga “Ania ti Gubat ti Armagedon?”

b Jehova ti personal a nagan ti Dios. (Salmo 83:18) Kitaen ti artikulo nga “Asino ni Jehova?”

Ti kadi libro ti Biblia nga Apocalipsis ket tumukoy iti nuklear a gubat?

Para iti dadduma, ti libro nga Apocalipsis ket tumukoy iti interamente a pannakadadael gapu iti nuklear a gubat. (Apocalipsis 6:14; 8:7-12; 16:1-21) Kas pagarigan, mabasatayo nga ‘adda apuy manipud langit a nagtinnag iti daga.’ (Apocalipsis 13:11-13) Naawatan dagiti Saksi ni Jehova a tumukoy daytoy, saan nga iti nuklear a gubat iti intero a lubong, no di ket iti pannakausar dagiti atomiko a bomba idi Gubat Sangalubongan II.

Uray no deskribiren ti libro nga Apocalipsis dagita a pasamak, saanna a panggep nga idetalye dagitoy a nakabutbuteng a pasamak. No basbasaem ti libro nga Apocalipsis, laglagipem:

Nagusar ti libro iti adu a pagilasinan, wenno simbolo, a saan a literal ti kaipapananna.—Apocalipsis 1:1.
Ti libro ket saan a nairanta a mangbutbuteng kadagiti mangbasa iti dayta. Imbes ketdi, agbalin a naragsak dagidiay makaawat ken mangyaplikar iti mensahena.—Apocalipsis 1:3.

Para iti kanayonan nga impormasion, kitaem ti artikulo nga “Ania ti Kaipapanan ti Libro nga Apocalipsis?”