Ti Panangmatmat ti Biblia

No Kasano ti Agpili iti Pakiasawaan

NAPAGSALUDSODAN TI MAYSA A BALASANG, “PAMPANUNOTEM KADI TI MAKIASAWA?” “PAMPANUNOTEK?” TI DAGUS NGA INSUNGBATNA. “MADANAGANAK.”

TI ABABA a sungbat daytoy a balasang ipaganetgetna ti nasged unay a tarigagay ti tattao nga agayat ken maaddaan iti kaasmang. Ibilang ti adu a ti panagsapul iti pakiasawaan ket maysa kadagiti kapatgan a banag iti biag. Isu nga iti intero a lubong, kellaat nga immadu dagiti serbisio a nadisenio a tumulong kadagiti tattao nga agbirok iti pakiasawaanda. Nupay kasta, iti adu a paset ti lubong, ad-adu nga amang dagiti napaay iti panagasawa ngem kadagiti nagballigi.

Kadagiti Makinlaud a pagilian, gagangay kadagiti tattao nga isuda a mismo ti agpili iti pakiasawaanda. Iti sumagmamano a paset ti Asia ken Africa, iti kasumbangirna, kadawyan pay laeng dagiti naitulag a panagasawa. Aniaman ti kasasaad, ti proseso ket maysa a banag a saan koma a matagtagilag-an. Manmano kadagiti dadduma pay a desision nga aramiden ti maysa a tao iti biagna ti addaan iti nagdakkel a potensial a mangibunga iti kinaragsak ken kinaliday. Ti naayat a panagasawa mabalin a makapabaknang ken makapnek unay. Iti kasupadina, ti nariribuk a panagasawa ket mabalin a naynay a pagtaudan iti sakit ti nakem ken kunsumision.​—Proverbio 21:19; 26:21.

Kas kadagiti sabsabali, kayat dagiti pudno a Kristiano a naragsak ken makapnek ti panagasawada. Ngem tarigagayanda met nga ay-aywen ken padayawan ti Dios. (Colosas 3:23) Tangay isu ti Namarsua ken Namunganay iti panagasawa, ti Dios ammona a naimbag dagiti pudno a kasapulantayo agraman ti kasayaatan nga agpaay kadatayo. (Genesis 2:22-24; Isaias 48:17-19) Malaksid iti dayta, nasaksianna ti minilmilionen a panagasawa, naballigi ken saan a naballigi, iti unos ti rinibribun a tawen a kaadda ti tao. Ammona ti agballigi ken ti saan nga agballigi. (Salmo 32:8) Babaen ti Saona, ti Biblia, isut’ mangted kadagiti nalawag, espesipiko a prinsipio a makatulong iti asinoman a Kristiano a mangaramid kadagiti desision a naibasar iti pannakaammo. Ania ti sumagmamano kadagitoy a prinsipio?

Saan Laeng a ti Langa ti Kitaem

Kadagiti lugar a siwayawaya dagiti tattao nga agpili iti pakiasawaanda, mabalin a maiparna a makaam-ammoda kadagiti potensial a kaparehada wenno iyam-ammo ida dagiti gagayyem wenno ti pamilia. Masansan a ti pisikal a pannakaatrakar ti damo a mangtukay iti romantiko nga interes. Nupay natural laeng ken nabileg a pakatignayan daytoy, parparegtaennatayo ti Biblia a saan laeng a ti langa ti kitaentayo no pangpanggepentayo ti makiasawa.

“Ti imnas manangallilaw, ket ti kinasayaat ubbaw; ngem ti babai nga agbuteng ken Jehova maidaydayawto,” kuna ti Proverbio 31:30. Nasao ni apostol Pedro “ti di agrupsa a pagan-anay ti naulimek ken naalumamay nga espiritu, nga addaan dakkel a pateg iti imatang ti Dios.” (1 Pedro 3:4) Wen, dagiti naespirituan a kalidad ti manamnama nga asawa​—ti debosion dayta a tao iti Dios ken ti panagayatna iti Dios agraman ti Nakristianuan a personalidadna​—ti napatpateg nga amang ngem ti pisikal a kinapintas. Napateg nga iwayaam ti realistiko a panagdesision, a piliem daydiay addaan kadagiti naespirituan a kalat a kas kenka ken mangikagkagumaan a mangipakita kadagiti bunga ti espiritu ti Dios. Dakkel ti maitulong daytoy iti naragsak a panagasawa.​—Proverbio 19:2; Galacia 5:22, 23.

‘Makiasawaka Isuna Laeng ta iti Apo’

Nakapatpateg no kapadpadam dagiti kalat ken patpatien ti tao a kayatmo a pakiasawaan. Ti panagasawa ket pudno a maysa a karit, nga agkalikagum iti adu a pannakibagay iti kababalin ken ugali ti dua a partido. Nainkalintegan a no ad-adun ti pagpadaanyo iti manamnama a kapareham, nalaklakanto dagitoy a pakibagayan.

Daytoy ti makatulong kadatayo a mangtarus no apay nga indagadag ni apostol Pablo kadagiti Kristiano a liklikanda ti agbalin a “di agkaasmang a naisangol kadagiti di manamati.” (2 Corinto 6:14) Ammo ni Pablo a ti pannakiasawa iti di kapammatian ken saanmo a kapadpada ti pannakaawat kadagiti prinsipio ti Biblia ti mabalin a mangpartuat iti riri ken di panagtinnunos. Nainkalintegan ti pammagbaga a ‘makiasawaka isuna laeng ta iti Apo.’ (1 Corinto 7:39) Iparangarangna ti panagpampanunot ti Dios. Dagidiay nainsiriban a mangtungpal iti dayta maliklikanda ti adu a nakaro a parikut ken kunsumision.​—Proverbio 2:1, 9.

Dagiti Naitulag a Panagasawa

Kadagiti ngay lugar a kadawyan pay laeng dagiti naitulag a panagasawa? Idiay makin-abagatan nga India, kas pagarigan, adda dadduma a nangpattapatta a 80 a porsiento kadagiti amin a panagasawa ket intulag dagiti nagannak. Maysa a personal a desision no suroten wenno saan dagiti Kristiano a nagannak daytoy a tradision. Nupay kasta, agballigi dagita a naitulag a panagasawa no maipangpangruna dagiti naespirituan a prinsipio.

Dagidiay umanamong kadagiti naitulag a panagasawa patienda a daytoy ti mangipabaklay iti proseso ti panagdesision kadagidiay aduan iti kapadasan ken nataenganen a tattao. “Patien ti dadduma a nagannak a gapu iti edad ken kinaawan pay kapadasan dagiti annakda, saanda a mapangnamnamaan iti umiso a panangikeddeng iti naespirituan a kinanataengan ti manamnama nga asawada,” kuna ti maysa a Kristiano a panglakayen idiay Africa. “Awanan pay dagiti agtutubo iti kapadasan iti biag ken mabalin nga emosional ti panagdesisionda,” kuna met ti maysa nga agdaldaliasat a ministro a taga India. Tangay mas am-ammo dagiti nagannak ti katatao ti annakda ngem ti siasinoman pay, patienda nga addada iti naisangsangayan a kasasaad a mangpili a nainsiriban para kadagiti annakda. Masiribda met no usigenda dagiti panangmatmat ti baro ken ti balasangda.

Nupay kasta, no saan nga ipangag ti nagannak dagiti prinsipio ti Biblia, mabalin a sagabaenda dagiti epektona no agproblema ti agassawa inton agangay. Agsipud ta masansan a bassit ti gundaway para iti panaginnammo a naimbag dagiti manamnama nga agassawa, mabalin a tumaud dagiti problema. Ket no kasta ti mapasamak, ilawlawag ti maysa a Kristiano nga ama a taga India, a “ti pagannayasan ket mapabasol dagiti nagannak.”

Para kadagiti Kristiano a nagannak a mangitultulag iti panagasawa, masapul met nga usigenda ti motiboda. No maipangpangruna dagiti materialistiko a kalat wenno ti tarigagay a maitan-ok iti panagpili ti pakiasawaan, tumaud dagiti problema. (1 Timoteo 6:9) No kasta, kastoy ti masapul nga iyimtuod dagidiay mangitultulag iti panagasawa iti bagida, ‘Daytoy aya a pili ti mangipasiguradonto iti kinaragsak ken naespirituan a kinasalun-at ti dua a partido? Wenno, tapno ad-adda a mapasayaat ti takder ti pamilia wenno mapaadu ti kinabaknang wenno tapno makagun-od iti sumagmamano a pinansial a gunggona?’​—Proverbio 20:21.

Nalawag ken makagunggona ti balakad ti Biblia. No mausig ti maysa nga agbalinto nga asawa, ti naimbag a kababalin ken espiritualidad ti manamnama nga asawa ti kanayon koma a maipangpangruna, kasanoman ti pannakaaramid ti desision. No kastoy ti maaramid, mapadayawan ni Jehova a Dios, ti Autor ti urnos iti panagasawa, ket mabalin a nalagda ti naespirituan a pundasion a pangrugian dagidiay agassawa. (Mateo 7:24, 25) Dakkelto ti maitulong daytoy iti naragsak, makapabaknang a panagasawa.