Agpatinggan ti Panangdadael
BABAEN TI KORESPONSAL TI AGRIINGKAYO! IDIAY BRITANIA
“Kakatlo iti natural a lubong ti dinadaelen ti gapuanan ti tao iti napalabas a 25 a tawen.”
KASTA ti impadamag ti World Wide Fund for Nature. Naipalgak daytoy a makapakigtot nga estadistika idi nairuar ti Living Planet Index, maysa a kabbaro a panangsukimat iti aglawlaw ti lubong.
Impadamag dagiti managitalimeng a 10 a porsiento ti binassitan dagiti kabakiran iti planeta. Ngem daytoy a bilang abbonganna ti dakdakkel pay a binassitan nga agpadpada dagiti tropikal a napuskol a kabakiran ken dagiti kabakiran kadagiti lugar a napaut ti kalgaw, malaksid pay ti pannakapukaw ti nalabit nasurok a 10 a porsiento a kita ti biag iti kabakiran, kuna ti periodiko ti London a The Independent. Bimmassit iti 30 a porsiento ti pagdakdakiwasan dagiti biag iti baybay, nga iparangarang ti irarasay dagiti kita ti biag a kas iti bluefin tuna iti Atlantiko ken ti leatherback a pawikan kadagiti taaw ti Asia. Ti kadaksan iti amin isu ti 50 a porsiento a binassitan ti Freshwater Ecosystems Index (ti pagdakdakiwasan ti nadumaduma a kita ti biag iti tamnay), a maigapu a nangnangruna iti umad-adu a polusion nga aggapu iti agrikultura ken iti industria agraman ti umad-adu a konsumo iti danum.
“Ti panangitalimeng iti natural nga ecosystem ket saan a kinaluho a kabaelan laeng dagiti babaknang,” kuna ni Sir Ghillian Prance a direktor ti Royal Botanical Gardens idiay Kew, London, England, “no di ket nasken dayta tapno masigurado ti pannakataginayon ti panagandar dagiti napateg a maaramidan ti ekolohia iti planetatayo a pagpampannurayantay amin tapno agbiagtayo.” Mairaman ti tunggal agnanaed iti daytoy a planeta. Isu a kasano a maibanag ti manayon a solusion iti sangalubongan?
Makapainteres ta ti Apocalipsis a maudi a libro ti Biblia, tukoyenna dagidiay mangdaddadael iti daga. Ipadtona ti tiempo a madadaelto a mismo dagita. (Apocalipsis 11:18) Addanto kadi dagiti makalasat? Adda, agsipud ta maibanagto daytoy babaen ti pannakibiang ni “Jehova a Dios, a Mannakabalin-amin,” nga addaan ti kakaisuna a solusion kadagiti parikut ti daga maipapan iti aglawlaw ken ti pannakabalin a mangibanag iti dayta. (Apocalipsis 11:17) Iladawan ti Apocalipsis 21:3 ti tiempo inton ti Dios “makipagnaedto [iti sangatauan], ket isudanto dagiti tattaona.”
Kasano nga agbalinka a maysa kadagiti ‘tattaona’ ket maaddaan iti namnama a makakita iti pannakabaliktad ti agdama-aldaw a pannakadadael ti aglawlaw ti daga? Pangngaasim ta makiumanka kadagiti Saksi ni Jehova iti lugarmo babaen ti panagsuratmo iti maysa kadagiti direksion iti panid 5. Wenno makisaritaka kadakuada iti sumaganad nga isasarungkarda iti pagtaengam. Maragsakandanto a tumulong kenka a mangammo iti ad-adu pay maipapan iti mabalinmo nga aramiden itatta tapno sisasaganaka inton makibiang ti Dios iti mabiiten.