Ti Pudno Maipapan Kadagiti Anghel

KAS nakitatayon, dagiti nalatak a kapanunotan ken estoria maipapan kadagiti anghel saan a kanayon a maitunos iti isursuro ti Biblia. Adda kadi pagdaksan ti panagsupadida? Makadangran kadi ti panangawat kadagiti nalatak a pammati maipapan kadagiti anghel? Talaga a makadangran.

Amirisem, kas pagarigan, dagiti kababalin nga iparparegta “ti baro nga espiritualidad.” Dagiti moderno a libro maipapan kadagiti anghel iparegtada ti kas iti ubing a kinatulok, a saanen nga agpampanunot. Manmano a maparegta dagiti agbasbasa a mangsolbar kadagiti parikutda wenno mangsapul iti kaipapanan ti Biblia ken ti pannakaammo iti Dios. Dagiti libro maipapan kadagiti anghel patalgedanda kadatayo a daliasatentayo ti biag a kadua ti naasi ken naayat nga anghel nga adda iti sibaytayo ken awan ti rumbeng a pakadanagantayo, tangay agbibiagtayo iti naragsak a cosmos a sadiay nasayaat ti kasasaad ti amin a banag. No rumsua ti parikut, urayentay laeng ti ibaballaet dagiti anghel. Nupay kasta, no agpayso daytoy, apay nga ibaga kadatayo ti Biblia a ‘makidangadangtayo a sipipinget maipaay iti pammati’?​—Judas 3.

Adu kadagiti libro maipapan iti anghel ti mangpennek iti kinatangsit ken kinaubbaw ti tao. Naipamaysada iti bagi. Sigun kadagita a gubuayan, tarigagayan dagiti moderno-aldaw nga anghel a maammuantayo no kasano ti kinaimnas ken kinaragsaktayo. Nupay naimbag met ti maaddaan iti positibo a panangmatmat iti bagitayo, ti kangrunaan a tema “ti baro nga espiritualidad” ket panagayat iti bagitayo nga awan ti kondisionna. Kunaen ti maysa nga autor a ti umuna ken ti kadakkelan a bilin ket “ayatem ti Apo a Bagim.” Anian ti pannakaikontra daytoy kadagiti sasao ni Jesus! Kastoy ti kinunana: “Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo. Daytoy ti kadakkelan ken umuna a bilin.” (Mateo 22:36-39) Nakaragragsak ti biagtayo no sapulentayo dagiti pagayatan ti Dios a nangnangruna ngem ti pagayatantayo.

Ti panangipangpangrunatayo kadagiti anghel maibusor iti pudno a Kristianidad. Kinondenar ni apostol Pablo ti panangpadayaw kadagiti anghel. (Colosas 2:18) Ti panangpadayaw kaipapananna “ti panagdayaw wenno napalalo a panagraem iti nadibinuan a persona wenno datdatlag a pannakabalin.” Kaskasdi, ti panangpadayaw ken napalalo a panagraem kadagiti anghel ti apag-isu nga iparparegta ti adu a nalatak a libro maipapan iti anghel nga aramiden dagiti agbasbasa. Ngem, lagipem ti napasamak idi kiniddaw ni Satanas ken Jesus a mangipaay iti maminsan la a panangpadayaw. Simmungbat ni Jesus: “Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.” (Lucas 4:8) Kalpasanna, idi nagruknoy ni apostol Juan iti sanguanan ti anghel, kinuna ti anghel kenkuana: “Agannadka! Dika aramiden dayta! Maysaak laeng a padam nga adipen ken pada dagiti kakabsatmo nga addaan iti trabaho a panangsaksi ken Jesus. Agdaydayawka iti Dios.”​—Apocalipsis 19:10.

No Kasano a Matulongandaka Dagiti Anghel

Ti Dios ti asitgantayo a maipaay iti pannakaiwanwan ken tulong, saan a dagiti anghel. Isut’ situtulok ken maragsakan a mangipaay iti ayat kadagiti amin a mangannurot kadagiti nalinteg a kalikagumna. Insurat ni apostol Juan kadagiti padana a Kristiano: “Daytoy ti adda kadatayo a panagtalek kenkuana, nga uray no ania ti dawatentayo a maitunos iti pagayatanna, denggennatayo. Kasta met, no ammotayo a denggennatayo maipapan iti aniaman a dawatentayo, ammotayo a maaddaantayto kadagiti bambanag a dinawattayo yantangay dinawattayo ida kenkuana.”​—1 Juan 5:14, 15.

Adu a banag ti ditay ammo maipapan kadagiti matalek nga anghel ti Dios. Nupay kasta, ammotayo nga agserserbida iti Dios, nga agtrabahoda a maitunos iti panggep ken panangiturongna. Sigagagarda a mangitandudo iti kinapudno maipapan iti Dios. (Apocalipsis 14:6, 7) Saanda a tarigagayan ti panangpadayawtayo. Tangay saantay a makita ida, ditay ammo no kasano kasaknap ti panangusar ti Dios kadagitoy a tumulong iti ilina kadagiti inaldaw a pasamak iti biag. Ngem ammotayo a salakniban ken iturong ni Jehova a Dios ti ilina kas maysa a grupo.

Anian a nagsayaat a pagwadantayo dagiti matalek nga anghel! Itan-ok ken idayawda ti Dios. (Salmo 148:2) Nupay ikutanda ti dakkel a mental ken naespirituan a pannakabalin, napalalo ti panagraemda iti kinasoberano ni Jehova. (Judas 9) Sipapasnek nga aginteresda iti pannakaibanag dagiti panggep ti Dios. (1 Pedro 1:11, 12) Dagitoy a banag ti nasursurotayo iti Sao ti Dios, ti Biblia. Wen, ti Biblia isu ti libro a mangibaga kadatayo ti pudno maipapan kadagiti anghel.

[Blurb iti panid 10]

Sigagagar dagiti anghel a mangitandudo iti kinapudno maipapan iti Dios

[Ladawan iti panid 8, 9]

Idi pinadas ni apostol Juan a dayawen ti maysa nga anghel, kinuna ti anghel: “Dika aramiden dayta!”