Natalged Kadi ti Pagtaengam?​—20 a Banag a Sukimatem

“NAKAAWIDAK met laengen!” Nalabit mabang-aranka no nakaawidkan manipud iti aduan trabaho nga agmalem, a siraragsak ta natalgedka iti pagtaengam. Ngem talaga kadi a natalgedka? Nakaskasdaaw ta mapasaran ti dadduma a tattao dagiti nakaro a peggad iti pagtaengan a mabalin a dida madmadlaw. Rumbeng a sipapanunot nangnangruna dagidiay addaan iti ubbing kadagiti nasakbay a panagannad tapno mapabassit ti bilang dagiti aksidente iti pagtaengan. Babaen ti panangusarmo iti sumaganad a listaan, apay a dika sukimaten ti pagtaengam tapno makitam no adda aniaman a masapul a balbaliwam?

✔ Mulmula. No adda ubbingmo, siertuem nga awan ti makasabidong kadagiti mulam. Laglagipem a dandani aniaman a banag ket isakmol dagiti nausioso nga ubbing.

✔ Dagiti Kortina. Kitaem a saan a magaw-at dagiti kurdon ti kortina. Mabalin a dagitoy ti pakasimbaludan​—ken pakabekkelan pay ketdi​—dagiti ubbing.

✔ Dagiti uuyosan ken estante. Panunotem no masapul a kabitam kadagiti natalged a panulbekan. Daytoy ti manglapped iti panangiggem dagiti ubbing kadagiti natadem nga alikamen ken napeggad a produkto a pagdalus.

✔ Agdan. Nalawag kadi ken awan madalapus? Nangikabitka kadin kadagiti natalged a barandilias tapno saan a matnag dagiti ubbing?

✔ Paglutuan. Kanayon koma a makinlikud ti pagiggaman dagiti kaserola ken pariok, nangnangruna no madama nga aglutlutoka.

✔ Pagtunuan. Masansan a dalusam. Ti namanteka a broiler pan ti pagtunuan ket mabalin a pangrugian ti uram iti kosina.

✔ Fire extinguisher. Kanayon nga adda koma uray maysa laeng iti pagtaengan, ket siertuem a tunggal adda nakemnan ammona no kasano nga usaren dayta.

✔ Kona. Agdedekket koma ti pannakasuelona. Saan koma a dakkel ti espasio iti aglawlaw ti kudson a mabalin a pakailumloman ti ulo ti maladaga.

✔ Dagiti tawa. Dagiti natalged a rehas ti mangsalaknib kadagiti ubbing manipud pannakatnagda ken nalaka laeng a maikkat ti adulto no adda uram.

✔ Dagiti bitamina ken agas. Idulinmo dagitoy iti matulbekan nga estante wenno iti disso a di magaw-at dagiti ubbing.

✔ Bathtub. Dimo pulos ibatbati ti ubing iti tub nga is-isuna. Uray apagbiit​—ken bassit la a danum​—mabalinen a malmes ti ubing.

✔ Dagiti microwave oven. Laglagipem a nabiit a pumudot ti taraon iti microwave. Ti gatas ti ubing, kas pagarigan, ket mabalin a makadilnak uray no kalkalainganna ti kapudot ti mismo a mamador.

✔ Urno. Pasaray sukimatem ti urno iti balaymo para iti agadiwara a carbon monoxide.

✔ Pagtunuan iti barbecue. Siguraduem a natalged ti kaadayo dagiti ubbing manipud iti pagtunuan no napudot dayta.

✔ Ridaw ti garahe. Isurom kadagiti ubbing a dida pulos agtaray iti baba ti rikep ti garahe no madama nga agluklukat wenno agserserra, nangnangruna no koriente ti mangpapaandar iti dayta.

✔ Smoke detector. Pagtalinaedem a nadalus, ken regular a sukimatem dagitoy. Sukatam dagiti bateria iti kada tawen.

✔ Dagiti kurdon ti koriente ken saksakan. Ibellengmon dagiti nakulatlatan a kurdon. Nasayaat no adda natalged a kalub wenno sigpit dagiti di maus-usar a saksakan.

✔ Dagiti de koriente nga appliance. Pagtalinaedem nga adayo dagiti appliance manipud iti tub wenno lababo. Dagiti ground fault circuit interrupter malapdanda ti pannakakoriente.

✔ Dagiti kahon ti abalbalay. Ikkam ti kada kahon ti abalbalay iti maysa wenno ad-adu nga abut a pagserkan ti angin ken bisagraam tapno saan a dagus nga agserra.

✔ Plansa. Pagtalinaedem a di magaw-at dagiti ubbing ti plansam​—agraman ti aguy-uyaoy a kurdonna.