Manipud Kadagiti Agbasbasa

Dagiti Lolo ken Lola Pagyamanan iti naayat a panangtamingyo iti tema a “Dagiti Lolo ken Lola​—Dagiti Rag-o ken Karit Kadakuada.” (Marso 22, 1999) Agsolsoloakon a lola a mangpadpadakkel iti dua nga appoko a lallaki. Agdrogdroga pay laeng ni nanangda. Kas dinakamat ti artikulo, masapul a pakibagayak ti rurod dagiti appokok. Diak maawatan ti rikna ti nabaybay-an iti ama ken ina. Ngem itay napan a tawen, kinuna kaniak ti in-inaudi nga apokok, “Pagyamanan iti panangaywanyo kadakami.” Dagidiay nga ebkas pinagbalinna a makagunggona ti amin a rigat ken luluak.

D. B., Estados Unidos

Gapu iti ayat ken kinamatalek ti patpatgenmi a lola, nalasatanmi kada manongko dagiti tawen ti panangbaybay-a ken panangabuso dagiti nagannak kadakami. Dagiti kinapudno ti Biblia nga intukitna iti pusomi pinabilegnakami nga agtultuloy. Ita, dedikado aminen a Kristiano ti tallo nga appokona ken ti pito nga appokona iti tumeng.

B. L. B., Brazil

Addaanak iti anak a 17 ti bulanna, ken adda ririmi ken katugangak a babai maipapan iti pannakaaywanna. Agimonak unay nga uray la a nagtengko ti punto a diak payen matagiragsak dagiti Nakristianuan a gimong. Ngem tinulongannak daytoy nga artikulo a mangtarus a saan a dakes ti panggepna ken dina padpadasen a tagikuaen ti anakko. Agyamanak ken Jehova ta naawatko daytoy nga impormasion idi kasapulak unay dayta.

M. Z. C., Mexico

Lima a Babbaro Para kaniak, makapainteres ti artikulo nga “Agyamanak ken Jehova iti Lima a Babbarok” (Marso 22, 1999), ta adda sumagmamano a pagaspingan ni Helen Saulsbery ken ni nanangko. Agpadada a nabautisaran iti isu met la a tawen. Kas ken Helen, nagnaed ni nanang idiay balay ket inaywanannakami idi adda rigat ti pamiliami iti pinansial​—nabangkarote ti kompania ni tatangko. Kasta met a nagserbi kas payunir, amin tiempo a managebanghelio, ket kanayon nga inyestoriana kadakami dagiti makapainteres a kapadasanna iti tay-ak. Gapu itoy, nagbalin a makaay-ayo unay kaniak ti serbisio a kinapayunir. Ita ta addaanak metten iti dua a babbalasang, maawatakon ti kasta unay a panagregget nga impakat ni nanang kadakami.

M. S., Japan

Iyebkasko ti naisangsangayan a panagyamanko gapu iti artikulo. Kas maysa nga ama, ikagkagumaak a suroten ti balakad ti Biblia, ngem masansan a diak masurot. Pinabilegnak ti kapadasan ti pamilia Saulsbery tapno agtultuloyak.

R. M. R., Brazil

Panagtarigagay Kadagiti Banag Maysaak a balasitang nga agtawen iti 12. Kayatko ti agyaman kadakayo iti artikulo nga “Agimtuod Dagiti Agtutubo . . . Apay a Diak Maaddaan Kadagiti Banag a Kayatko?” (Marso 22, 1999) Adda bambanag a kayatko​—kas iti bisikleta ken gitara. Ngem di kabaelan ni tatangko a gatangen dagitoy para kaniak. Daytoy ti pakaupayak. Nupay kasta, talaga a pinaregtanak ti artikuloyo. Pagyamanan iti panangipablaakyo iti daytoy a naamaan a balakad.

C. U., Nigeria

Dagiti Masel Kalpasan ti panagehersisiok ita nga agsapa, nagtugawak a nangbasa iti artikulo a “Dagiti Masel​—Obramaestra a Disenio.” (Abril 8, 1999) Rinugiak a pinanunot dagiti masel iti matak nga agkutikuti bayat a basbasaek ti tunggal panid, dagiti masel iti takiagko nga umir-irteng ken agrelrelaks bayat nga in-inumek ti kapek, dagiti masel iti gurongko nga aggargaraw bayat nga agkutikutiak iti tugawko. Wow! Anian a nakaskasdaaw a disenio!

N. T., Belize

Ipalgak dagiti maseltayo ti bassit a paset ti kasta unay a kinasirib ken kinasaririt ti Naindaklan a Namarsua kadatayo, ni Jehova a Dios. Kanayon a makapainteres kaniak ti agbasa maipapan iti natauan a bagi. Ngem ita laeng a nabasak ti kasta nga artikulo a nagsayaat ti pannakaisuratna ken nalaka a maawatan.

P. J. O. S., Brazil