Manipud Kadagiti Agbasbasa
Agpegpeggad nga Ubbing Kayatko nga iyebkas ti apresiasionko iti serye iti Abril 8, 1999 a ruar nga “Agpegpeggad nga Ubbing—Siasino ti Mangsalaknib Kadakuada?” Patiek a ti nabatad a tema maipapan iti pannakaabuso ti ubbing isut’ kanayon koma a mangriing iti opinion ti publiko. Rebbengentayo a salakniban ti lubong dagiti annaktayo. Sapay koma ta itultuloyyo ti nasayaat nga aramidyo.
P. P., Councillor’s Office for Children, Siudad ti Roma, Italia
Makaaligaget a panunoten nga iti panangrugi ti maika-21 a siglo, adu pay laeng nga ubbing ti matagtagabo ken maus-usar a pumatay kadagiti sabsabali. Narigrigat pay nga akseptaren ti kinapudno a bassit ti pangnamnamaan ti kaaduan kadakuada a maaddaan iti nasaysayaat a biag. Siuumiso manen nga inlawlawag ti Agriingkayo! ti kasasaad dagiti ubbing iti lubong.
S. R. B., Brazil
Diborsiadaakon kalpasan ti 36 a tawen a panagasawa. Naammuak a ginundawayan ni lakayko dagiti mismo a patpatgek a babbalasang iti adun a tawen. (Saan a Kristiano ni lakayko.) Nariribukanak unay idi naammuak daytoy. Kasla awan ti makatarus iti kinakaro ti seksual a panangabuso wenno ti di mailadawan a saem a sagsagabaen dagiti inosente. Isu nga agyamanak ken Jehova ta nakapagsuratkayo maipapan iti daytoy nga epidemia.
N. M., Estados Unidos
Panangaywan Kadagiti Lallakay ken Babbaketen Talaga nga apresiarek ti benneg nga “Ipakitam a Maseknanka.” (Abril 8, 1999) Adu a lallakay ken babbaketen kadagiti balay a pagtaraknan ti nalipatanen dagiti pamiliada. Ngem sumagmamano a bulanen ti napalabas, inkeddeng ti sumagmamano kadakami nga isaritami ti Biblia iti dadduma a tattao iti kabangibangmi a balay a pagtaraknan. Kalpasanna, nagpianokami ken kinasaritami ida. Planomi itan a sarungkaranmi ida a regular.
C. V., Estados Unidos
Bagyo Idiay Africa Sangapulo ket dua ti tawenko, ket kayatko ti agyaman kadakayo iti artikulo a “Kalpasan ti Bagyo, Naitandudo ti Kinakristiano.” (Marso 8, 1999) Para kaniak, mapagulidanan dagiti kakabsat a timmulong kadagidiay nagpeggad ti kasasaadda! Impalagipna kaniak ti wagas a panangtulong dagiti kakabsattayo iti dadduma kalpasan ti napigsa a ginggined ditoy Hanshin, Japan. Pinaregtanak ti artikulo nga agbalin a natured ken agaramid iti naimbag kadagiti sabsabali.
R. K., Japan
Dagiti Matmaturog a Maladaga Pagyamanan iti artikulo a “Kasano ti Rumbeng a Pannaturog ti Maladaga?” (Marso 22, 1999) Naulilaak iti inauna nga anakko a dua ket kagudua a bulannan gapu iti sudden infant death syndrome (SIDS). No addaanak la koma idin iti daytoy nga impormasion! Nupay addaanakon iti dua a nagpipintas nga annak, marikriknak pay laeng ti nakaro ken di mailadawan a saem.
A. D., Italia
Adu dagiti nakadkadlaw a peggad a nainaig iti SIDS. (Kitaenyo ti “Panangmatmat ti Lubong” iti Enero 22, 1997 a ruar ti “Agriingkayo!”) Kaskasdi, nga iti adu a wagas, misterio pay laeng ti SIDS iti medisina. Dagiti nagannak a natayan iti anak gapu iti SIDS dida koma ngarud pabasolen ti bagida iti dayta a trahedia. Napaneknekanen a makaliwliwa kadagiti adu a malmaldaang a nagannak ti naan-anay a pannakailawlawag ti SIDS iti Enero 22, 1988 a ruarmi.—ED.
Celiac Disease Naawatmi ti artikulo a “Panangdaer iti Celiac Disease” (Marso 22, 1999) tallo a bulan kalpasan a naammuanmi nga addaan iti kasta a sakit ti innem ti tawenna a balasangmi. Ditoy Russia, dandani saan pay laeng nga ammo uray dagiti doktor daytoy a sakit. Anian a makaliwliwa a maawatanton dagiti Kristiano a kakabsatmi no apay nga espesial ti taraon ti balasangmi! Daytoy nga artikulo ti nangpabileg ken nangipasigurado kadakami a kanayon a maseknan ni Jehova iti kasapulan ti tattaona.
V. P. ken L.P., Russia
Panagtarigagay Kadagiti Dimo Magun-odan Kabasbasak ti artikulo nga “Agimtuod Dagiti Agtutubo . . . Apay a Diak Magun-odan Dagiti Banag a Kayatko?” (Marso 22, 1999) Kayatko ti agyaman kadakayo iti daytoy nga artikulo agsipud ta impaamirisna kaniak a diak magun-odan ti amin a kayatko. Ngem kas iti kinuna ti artikulo, ammo ni Jehova dagiti kasapulantayo, ket maragsakanak unay ta simple ti biagko.
C. K., Canada