Kasano ti Rumbeng a Pannaturog ti Maladaga?

ADU a maladaga iti intero a lubong ti natayen gapu iti Sudden Infant Death Syndrome (SIDS). Idiay Estados Unidos, daytat’ gagangay unay a pakatayan dagiti maladaga nga adda iti nagbaetan ti edad a 1 a bulan ken 12 a bulan. Adda kadi pamay-an a pangkissay iti peggad? Sigun iti The Journal of the American Medical Association (JAMA), ipakita ti panagsirarak a kasla dakkel ti bimmassitan ti peggad ti ipapatay gapu iti SIDS kadagiti kallabes a tawen idi a nakadata a maturog dagiti maladaga imbes a nakapaklebda. Nangirusat ti sumagmamano a pagilian iti programa a mamagsiput kadagiti nagannak iti nakainaigan ti posision a maturog ken ti SIDS. Idiay Australia, Inglatera, Denmark, New Zealand, ken Norway, di kumurang a 50 a porsiento ti bimmassitan dagiti natay gapu iti SIDS kalpasan ti maysa aginggat’ dua a tawen a kampania iti publiko a mangiparegta iti nakadata a panangpaturog kadagiti maladaga.

Saan pay a naammuan ti eksakto a nakainaigan ti SIDS iti nakapakleb a pannaturog ti maladaga, ngem sigun kadagiti dadduma a managsirarak, daytoy a nakairuaman a posision mabalin nga angsen manen iti maladaga ti ipugpug-awna, isu nga umadu ti carbon dioxide iti darana. Mabalin met a pumudot unay ti bagi ti maladaga agsipud ta saanna a mairuar ti pudot no nakapakleb. Aniaman ti gapuna, dagiti maladaga a napaidda a nakadata wenno nakapakleb masansan nga agtalinaedda iti kasta a posision. Ipakita pay dagiti panagadal a ti panangpadata iti normal, nasalun-at a maladaga ket nasaysayaat ngem iti ballikid a panangpaidda.

Apay a nadumaduma a posision iti pannaturog ti mapili dagiti inna? Sigun iti JAMA, masansan a suroten laeng dagiti inna ti nakairuamanda​—paiddaenda ti maladagada iti wagas nga umasping iti panangpaidda dagiti mismo nga innada wenno dagiti dadduma pay iti lugarda. Wenno nalabit tultuladenda ti nakitada idiay ospital. Ipagarup met ti dadduma nga inna a kaykayat ti maladagada wenno nasaysayaat ti pannaturogda iti partikular a posision. Kanayon a padataen ti adu nga inna ti maladagada iti umuna a bulan ngem papaklebendanton inton agangay. “Makapadanag unay daytoy a pagannayasan,” kinuna ti JAMA, “agsipud ta nagdakkelan ti peggad a mapasamak ti SIDS kadagiti maladaga a 2 aginggat’ 3 a bulanda.” Ikagkagumaan dagiti doktor nga ipakaammo kadagiti agtagtagibi a nagannak ti awaganda a simple, nasamay a pamay-an a pangkissay iti peggad ti SIDS​—nakadata a panangpaturog kadagiti nasalun-at a maladaga.a

[Footnote]