Kanta a Dina Pulos Nalipatan

“IDIAY eskuelaan kinantak ti himno nga addaan kadagiti sasao a ‘ni naindaklan a Jehova naitrono iti gloriana.’ Masansan a pinampanunotko, ‘Siasino daytoy a Jehova?’”

Dayta a komento ni Gwen Gooch, a maysa kadagiti Saksi ni Jehova, ken ti pakasaritaan ti biagna ket naipablaak iti Pagwanawanan, tinignayna ti interes ti maysa a managbasa.a Malagip ni Vera, a taga Seattle, Washington, E.U.A., “Kasta met laeng ti kapadasak idi addaak iti haiskul.”

Kalpasan a nangngeg ni Vera ti maysa a kanta, kas met ken ni Gwen a naginteres unay no siasino ngata daytoy a Jehova. Napennek ti interes ni Vera idi 1949 idi damo nga imbaga kenkuana ti kabsatna a lalaki maipapan ken Jehova, ti personal a nagan ti Dios iti Biblia.

Ni Vera ket maysa kadagiti Saksi ni Jehova iti unos ti agarup kaguduan a siglo. Ngem dina pulos nalipatan dayta a himno kadagidi aldaw ti panageskuelana iti haiskul. “Adu a tawenen,” kunana, “a pinadasko a sinapul ti nakaadawanna.” Kamaudianna, babaen ti tulong ti maysa a paglakuan kadagiti instrumento ti musika, nasarakanna met laeng. Naadaw ti kanta iti komposision ni Franz Schubert idi 1825. Dagiti sao a napakuyogan iti musika pudno nga idaydayawda ni Jehova. Kas pagarigan, mairaman kadagiti liriko isu ti sumaganad:

“Naindaklan ni Jehova nga Apo! ta ti Langit ken Daga iwaragawagda ti nakaskasdaaw a pannakabalinna. . . . Mangngegmo iti di malapdan, nadawel a bagyo, iti uni ti naungor a baresbes . . . Mangngegmo kadagiti arasaas ti kakaykaywan ken kabakiran, makitam iti panagpayapay ti bimmalitok a mais; iti adu a nagduduma ken nababanglo a sabsabong, kadagiti bituen a nangpunno iti asul a Langit . . . Makapaamak ti gumgumluong a gurruodna, ket ti gil-ayab dagiti kimatna nasiglat a gumilap iti langit. Ngem ad-adda pay nga iwaragawag ti agbitbitik a pusom ti pannakabalin ni Jehova, . . . ti agnanayon nga Apo Dios. Agkiddawka Kenkuana nga adda iti Langit ket manamnamam ti parabur ken asi. . . . Naindaklan ni Jehova nga Apo!”

Kuna ni Vera: “Pasaray usarek dagiti liriko daytoy a kanta tapno ipakitak kadagiti tattao nga idi tawtawen ti 1800, addan dagidiay makaammo iti nagan ti Dios ket nagdaydayawda met kenkuana.” Ti kinapudnona, nanipud idi un-unana, dagiti addaan pammati a lallaki ken babbai natignayda a mangidaydayaw ken Jehova babaen kadagiti kanta. Ugali dayta nga agtultuloyto iti agnanayon, ta nakaad-adu dagiti rason a maidaydayaw ti Namarsua iti langit ken daga.

[Footnote]

[Ladawan iti panid 25]

Vera