“Spiderweb Lace”—Ti Naisangsangayan nga Aramid-Ima a Produkto ti Paraguay
BABAEN TI KORESPONSAL TI AGRIINGKAYO! IDIAY PARAGUAY
ASUNCIÓN, PARAGUAY. Maidisdiskarga dagiti bagahemi, isu a mabalinmi ti agpasiar iti sumagmamano a minuto iti eropuerto. Kellaat a ginuyodnak ni baketko tapno kitaek ti maysa a display ti diding. “Nagpintas!” kinunana bayat nga intudona ti maysa a nagpintas a lace a mantel a komplikado unay ti diseniona. Dagus a dinamagna no kasano ti pannakaaramid dayta a mantel.
Idiay Arabia ti nagtaudan ti spiderweb lace. Sigun iti libro a Paraguay, Touristic and General Information, “naipan dayta idiay Canary Islands ken idiay España, ket idi nagbaetan ti maika-17 ken maika-18 a siglo, nayeg dayta ditoy Paraguay. Ditoy a napanaganan ti maaw-awagan a lace ti init manipud Tenerife kas ti lace ti Paraguay, wenno nanduti.” Ditoy Paraguay, ti pannakaaramid daytoy a napintas a lace ket sigun iti magustuan ti agar-aramid iti lace, ken mainayon iti disenio dagiti kalidad ti mulmula ken an-animal iti daytoy a lugar. Nupay ti lace ket saan a partuat daytoy a lugar, talaga a pinapintas dagiti taga Paraguay ti lace-da babaen kadagiti naiduma a pannakaabel. Ti panagabel iti lace ti nagbalin a panggedan ti adu a katutubo.
Kasanoda nga aramiden daytoy komplikado a lace a kaasping ti saput? Tapno maammuanmi, impannakami ti giyami iti bassit nga ili ti Itauguá, 30 a kilometro iti daya ti Asunción. Imbagana kadakami a mapataud ditoy a lugar ti kaaduan kadagiti spiderweb lace ditoy Paraguay. Kinapudnona, adu a naabel a banag ti nai-display kadagiti tiendaan iti igid ti kangrunaan a kalsada.
Sibabara a kinablaawannakami ti makinkukua ti maysa a tiendaan ket impakitana kadakami ti sumagmamano kadagiti nagpipintas a tagilakona. Kastoy ti inlawlawagna: “Maklasipikar ti aramid-ima a lace sigun iti pannakaaramidna. Ti spiderweb lace’ ket interamente a naaramid babaen ti pannakaitudok ti dagum iti papel a pagtuladan. Kabesado ti kaaduan a taga Paraguay nga agar-aramid iti lace dagiti disenioda, nupay agus-usar ti dadduma iti pagtuladan. Agusarda amin iti lupot a cotton a naibastidor sada aramiden ti lace babaen ti dagum ken sinulid. Bayat ti kinaubingda, masursurodan daytoy a paglaingan manipud kadagiti nanangda ket kalpasanna, isurodanto metten dayta kadagiti annakda.”
Ti maysa a kita ti lawwalawwa a maawagan orb weaver aramidenna ti balayna iti dua wenno tallo laeng nga oras. “Kasapulan ti dua agingga iti tallo a bulan tapno maaramid ti mantel iti lamisaan a makaanay ti walo a tattao no napuskol a sinulid ti mausar. Innem met agingga iti walo a bulan ti kasapulan tapno maaramid ti kasta met la a mantel no pino a sinulid ti mausar,” kinuna ti nangpasangbay kadakami. “No napimpino ti sinulid, napimpintas ti resultana.”
Bayat nga impakitana ti puraw a doily a lace, kastoy ti kinunana: “Adda makintengnga a diseniona a sabong ti bayabas, ket masapul a mabilang dagitoy a sinulid bayat a maar-aramid. Daytoy a disenio ti karirigatan nga aramiden, ket dua a lawas a maaramid babaen ti pino a sinulid. Idi damo, pino laeng a sinulid ti us-usaren dagiti agar-aramid iti lace isu a nakanginngina amin a lace. Gapuna, rinugian ti adu nga agar-aramid iti lace ti nagusar iti napuskol a sinulid tapno nabibiit ti panagaramid kadagiti produkto ken nalaklaka ti presioda.”
Naka-display dagiti de-kolor ken puraw a placemat, mantel, doily a kas iti serbilyeta, coaster wenno pagiparabawan iti bambanag a kas iti baso, plorera, ken dadduma pay a kagawaan iti balay. Idi nagdamagkami maipapan iti badbado, dagus a nangiruar ti nangpasangbay kadakami iti gagangay a kawes, a kukua ti balasangna. Nabatad a pagpannakkelna dayta a nagpintas ken bimmullalayaw ti kolorna a bestida. Iti dadduma a tiendaan, nakakitakami iti sumagmamano a nagpipintas ti pannakaaramidna a postcard nga addaan iti napino a lace. Di pakasdaawan a ti spiderweb lace ket maibilang a kalatakan nga aramid-ima a produkto ti Paraguay.
[Ladawan iti panid 18]