Dagiti Kurbata Idi ken Ita

NABAYAGEN a pagay-ayat dagiti lallaki nga arkosan dagiti tengngedda. Kas pagarigan, idi agarup 1737 K.K.P., nangted ni Faraon ti Egipto ken Jose iti kuentas a balitok.​—Genesis 41:42.

Iti adu a paset ti lubong itatta, agusar dagiti lallaki iti kunaentayo a kurbata. Sigun iti nagduduma a reperensia, nagparang dagiti immuna a kurbata idiay Inglatera ken Francia idi arinunos ti maika-16 a siglo. Nagusar dagiti lallaki iti diaket a naawagan a doublet. Nagusarda iti ruff a dekorasion iti tengnged. Kaaduanna, ti ruff a mabalin a sumagmamano a sentimetro ti kapuskolna, ket akaba a kas man la sirkulo a maipulipol iti tengnged. Daytat’ nasikkil a puraw a lupot tapno agtalinaed ti pormana.

Idi agangay, nasukatanen ti ruff iti aguyaoy a kuelio. Daytat’ puraw a kuelio a mangabbong iti intero nga abaga agingga iti ngato ti takiag. Naawagan met dagitoy a kuelio iti Vandyke. Karaman dagiti Puritan a nagusar kadagitoy.

Idi maika-17 a siglo, maus-usar ti makin-uneg nga atiddog nga amerikana a naawagan a waistcoat a gagangay a maparabawan iti atiddog nga amerikana. Agusar ti agamerikana iti bufanda, wenno cravat. Saan la a mammaminsan a maibarabad daytoy a lupot iti tengnged. Aguyaoy ti murdongna iti sango ti kamisadentro. Ipakita dagiti lamina idi arinunos ti maika-17 a siglo a nakalatlatak idi dagiti cravat.

Naaramid dagiti cravat iti manta, lienso wenno cotton, ken uray pay lace. Nangina dagiti naaramid iti lace. Naipadamag a nagbayad ni James II iti Inglatera iti 36 a pound ken 10 a shilling para iti lace a cravat-na idi nakoronaan. Daytat’ dakkel a gatad idi a tiempo. Dadakkel ti dadduma a lace a cravat. Ti ladawan ni Charles II iti Westminster Abbey ipakitana a ti cravat-na ket 15 a sentimetro ti kaakabana ken 86 a sentimetro ti kaatiddogna.

Adu a pamay-an ti panangisiglot kadagiti cravat. No dadduma adda maiparabaw a seda a laso iti cravat tapno matengngel dayta sa mapaglaso iti baba ti timid. Solitaire ti pangawag iti daytoy nga estilo ti kurbata. Kaasping dayta ti moderno a kasla laso a kurbata. Naibaga nga adda di kumurang a sangagasut a pamay-an ti panangisiglot iti cravat. Naipadamag nga intero nga agsapa ti binusbos ni Beau Brummell, maysa nga Ingles a nangimpluensia iti panagkawes dagiti lallaki, a nangigalut iti cravat-na tapno umiso ti pannakaiplastarna.

Idi dekada 1860, ti cravat nga atiddog ti murdongna kaaspingen ti moderno nga aruaten iti tengnged ket naawagandan iti kurbata. Naawagan met daytoy iti four-in-hand. Daytoy a nagan ti naggapu iti siglot nga inusar dagiti kutsero iti grupo a buklen ti uppat a kabalio. Uso idin dagiti kamisadentro. Maisiglot ti kurbata iti baba ti timid, ket aguyaoy ti at-atiddog a murdongna iti sango ti kamisadentro. Nagparang idi ti moderno a kurbata. Naglatak ti sabali pay a kita ti kurbata, ti bow tie, idi dekada 1890.

Itatta, adut’ agkuna a ti kurbata nasken a mangpasayaat iti langa ti agusar. Mabalin nga adda pay maibaga dagiti tattao maipapan iti maysa a ganggannaet babaen ti kita ti kurbatana. Isu a nainsiriban ti agusar kadagiti kurbata a nadalus ken maibagay ti prenta wenno kolor ti isuotmo a kamisadentro, pantalon, ken diaketmo.

Naurnos koma ti pannakaigalutna. Nalabit ti four-in-hand ti kalatakan a wagas ti pannakaigalut. (Kitaem ti diagrama iti panid 14.) Naurnos ken naemma ken maibagay kadagiti pormal nga okasion. Ti pannakaigalut a Windsor ket sabali pay a nalatak a kurbata. Daytat’ dakdakkel bassit. Gagangay a lumnek dayta iti baba la bassit ti pannakasiglotna.

Adut’ lallaki a saan a komportable nga agkurbata. Dida kayat a mareppet ti tengngedda. Ngem naammuan ti dadduma nga addaan ti kastoy a parikut, a ti gapu a saanda a komportable ket mabalin a nailet ti kamisadentroda. No parikutmo daytoy, siguraduem a saan a nailet unay ti kueliom. No husto ti kalawana, dika pay ketdi madmadlaw a nakakurbataka.

Iti adu a pagilian maibilang ti kurbata a nasken a paset ti kawes idiay pagtrabahuan wenno pormal a kawesda. Gapu iti daytoy, adu a Kristiano ti agkurbata no makipaspasetda iti ministerio. Wen, ti bassit a lupot a maipulipol iti tengnged ti maysa a lalaki ket mangnayon iti dignidadna ken mamagbalin iti langana a mararaem.

[Diagram iti panid 14]

(Para iti aktual a pannakaurnosna, kitaem ti publikasion)

No Kasano nga Igalut ti Four-in-Handa

1 Rugiam iti akaba a murdong ti kurbata agarup 30 a sentimetro nga agpababa iti akikid a murdong, ket iballasiwmo nga ipasirok dayta.

2 Iballasiwmo manen ti akaba a murdong, sa isuksokmo iti pakasirotanna.

3 Tenglem iti tammudom ti pakasirotanna sa guyodem ti akaba a murdongna iti sango.

4 Iggamam ti akikid a murdong, sa siiinayad a sirotem, agingga iti kuelio.

[Footnote]

[Dagiti ladawan iti panid 15]

Dagiti estilo ti kurbata nanipud iti maika-17 a siglo agingga itatta