Manipud Kadagiti Agbasbasa

Teolohia ti Kinarang-ay Para kaniak, sidadayaw a makunak a makaallilaw unay ti benneg a “Teolohia ti Kinarang-ay” iti “Panangmatmat iti Lubong.” (Hunio 22, 1999) Iparparegta dagiti Pentecostal ken karismatiko a relihion iti sadinoman a lugar ti pannangted a naibasar kadagiti nasimbeng a prinsipio ti Biblia. Manangipato ti wagas ti pannakaisurat ti artikulo.

C. B., Estados Unidos

Siuumiso ken realistiko nga inadaw ti bennegmi ti sasao ti Luterano a teologo a ni Wanda Deifelt sigun iti pannakaisuratda iti pagiwarnak ti World Council of Churches nga “ENI Bulletin.” Kas nailanad, ti artikulo iti dayta a pagiwarnak ket saan a maipapan kadagiti amin a Pentecostal ken karismatiko a relihion no di ket espesipiko a maipapan iti sumagmamano a kakasta idiay Latin America.​—ED.

Vinland Kayatko ti agyaman kadakayo iti artikulo a “Sadino ti Ayan ti Sarsarita a Vinland?” (Hulio 8, 1999) Nabayagen nga interesadoak kadagiti Viking ket ninamnamak a salaysayenyo koma daytoy a tema. Napatgan met laengen ti kalikagumko.

S. S., Japan

Makaisuro dagiti artikuloyo. Nupay kasta, kayatko a malawlawagan ti maysa a punto. Us-usaren ti adu a historiador ti nalatak a termino a “Viking” para laeng kadagiti pirata ti Scandinavia a nangraut iti kosta ti Europa.

J. S., Estados Unidos

Nakiuman ti “Agriingkayo!” iti sumagmamano a mapagraraeman a historiador idiay Norway ken Greenland maipapan iti daytoy a banag. Nagnunumuanda a nupay mabalin nga adda sumagmamano a di panagkikinnaawatan dagiti historiador maipapan iti panangusar iti termino a “Viking,” dandani agpapada ti kaipapanan dagiti termino a “Viking” ken “Norseman” kadagiti pagilian nga agsasao iti Ingles.​—ED.

Nakalasat a Balud Naimpusuan nga agyamanak kadakayo gapu iti artikulo a “Ti Dios ti Katulonganmi.” (Hunio 22, 1999) Nagsangitak gapu iti rag-o bayat a binasak no kasano a naammuan ni Francisco Coana ti kinapudno ken no kasano nga impangpangrunana iti biagna ti panagserbi ken Jehova. Talaga a makapabileg iti pammati ti panagbasa maipapan kadagiti suot a napasaran dagiti Kristiano a kakabsat idiay Mozambique.

J. H., Estados Unidos

Masaksakit a Nagannak Natignayak iti artikulo nga “Agimtuod Dagiti Agtutubo . . . Apay a Grabe ni Nanang?” (Hulio 22, 1999) Diak impagarup a nagadu gayam ti dadduma pay nga agtutubo a kas kaniak nga addaan iti pribilehio a mangaywan iti masaksakit nga ing-ingungoten iti biag. Kabbalaymi ni lolak, ket uppat a bulanen a naidalit. Mangrugrugi idin a madagsenan ken mapaksuyanak a mangaywan kenkuana. Gapu iti panangbasak iti artikulo, nagun-odak ti kasapulak unay a pammabileg. Pinaregtanak nga agtalek iti panangsaranay ni Jehova.

J. P., Pilipinas

Dakkel a liwliwa kaniak ti artikulo, ket pinabilegnak a mangsaranay ken nanangko, nga agsagsagaba iti panagleddaang. Nausarko dagiti singasing ti artikulo tapno ad-adda a maawatak a naimbag ti kasasaad ken tapno maipakitak ti ad-adu a pannakipagrikna, pannakaawat, ken kinataktika.

G. L., Italia

Dimteng ti artikulo iti umiso a tiempo. Adda kanserko, ket kabbalayko ti barok. Nakaro ti sagsagabaen ti barok ket diak ammo no kasanok a liwliwaen. Siuumiso ti panangdeskribir ti artikulo iti rikriknana. Dagitoy nga artikulo ket saan laeng a para kadagiti agtutubo. Salaysayenda ti biag a mismo.

R. Z., Alemania

Tinulongannak daytoy nga artikulo a mangamiris no kasano kapateg ti panagtalinaed nga aktibo iti naespirituan. Naawatak a matulongam laeng ti maysa a tao a masaksakit no kanayon a naipamaysa ti mismo a biagmo iti Pagarian ti Dios.

P. E., Austria