Nakaskasdaaw a Pabuya Dagiti Naglayag a Barko — Watchtower ONLINE A LIBRARIA

Nakaskasdaaw a Pabuya Dagiti Naglayag a Barko

BABAEN TI KORESPONSAL TI AGRIINGKAYO! IDIAY FRANCIA

NAIMATANGAN IDI HULIO 1999 TI ADU KADAGITI KAPIPINTASAN A NAGLAYAG A BARKO ITI LUBONG A NAGUUMMONG IDIAY ROUEN, ITI MAKIN-AMIANAN A FRANCIA, PARA ITI NADAEG A PIESTA A NAAWAGAN ARMADA ITI SIGLO. TALLOPULO A DADAKKEL A NAGLAYAG A BARKO TI NAISANGLAD ITI PITO A KILOMETRO A SANGLADAN A NAISAGANA NGA AGPAAY ITI OKASION.

Ti okasion ket naipadamag a “ti nakaskasdaaw a pabuya ti panaglayag iti milenio.” Nayeskediul dagiti konsierto, pabuya ti luses, pabuya iti panaglayag, ken pannakaipabuya dagiti lamina ken retrato ti panaglayag bayat ti okasion.

Ti Biernes, Hulio 9, ket naisangsangayan gapu iti nadaeg nga isasangpet dagiti naglayag a barko. Bayat ti simmaganad a sangapulo nga aldaw, minilion a bisita manipud Francia ken dadduma pay a pagilian iti Europa ti nagdudupudop kadagiti sangladan.

Dadduma kadagiti barko—kas iti Dar Młodziezy (Poland), ti Khersones (Ukraine), ti Statsraad Lehmkuhl (Norway), ken ti Libertad (Argentina)—ket nagdadakkel a lugan a 100 a metro ti kaatiddogda, a tumangkayag ti katayagan a paloda iti 50 a metro iti ngato ti danum.

Adda dagiti natayag a barko a naggapu iti 16 a pagilian, a pakairamanan ti Alemania, Belgium, Ireland, Portugal, Russia, Uruguay, ken Venezuela. Ti Netherlands ti pagilian a kaaduan ti nangirepresentar, ta innem ti barkona. Mairaman kadagitoy ti nagpipintas a tallo ti palona a barko a Europa ken ti daanen nga Oosterschelde, tallo ti palona a lugan nga addaan iti nagtengnga a layag a nangrugi nga agibiahe idi 1918 iti kayo, buro a tamban, damili, bukbukel, garami, ken prutas iti nagbabaetan ti Africa, ti Mediteraneo, ken amianan a Europa.

Ti Armada nangipaay iti naisangsangayan a gundaway a pakapnekan ti panagusiuso dagiti bisita. Naibaba dagiti tabla nga andamio, ket libre a makapan ti tunggal maysa kadagiti kubierta.

Naipabuyan ti dadduma kadagiti barko iti sine. Ti barko ti Norway a Christian Radich, kas pagarigan, ket prominente ti pasetna idi 1958 iti pelikula a Windjammer. Ti daanen a kayo a barko a Kaskelot (“sperm whale” iti Danes) ket naipabuyan iti sumagmamano a sine, agraman ti pelikula dagiti Pranses a Beaumarchais l’insolent ken ti napabaro a bersion ti pelikula a Treasure Island.

Naisalsalumina ti tallo ti palona a barko ti Poland nga Iskra ta naiduma ti baskag ti layag ti tallo a palona. Kuadrado ti baskag ti layag ti makinsango a palo, trapezoid ti kangrunaan a palo, ket Bermuda wenno trianggulo ti layag ti sumaruno iti kangrunaan a palo.

Dadduma kadagiti daanen a barko nga adda idiay Rouen ket naaon iti danum a nakalnedanda. Kas pagarigan, dagiti naregget inaonda ti Capitán Miranda ti Uruguay babaen ti panangpabaroda iti nagdaeg a lugan. Ti Étoile Molène, a limned idi kattapog ti 1980 idiay puerto ti Douarnenez, Brittany, ket naaon manen ken naikkan iti baro a gundaway gapu iti naayat unay a pannakaseknan.

Inkeddeng ti kabarbaro nga asosasion dagiti opereytor ti radio a kabayatan ti piesta, mangikonektarda iti radio iti nagbaetan ti barko a Mir ken ti agrikrikus nga estasion ti Russia iti law-ang, ti Mir. Kamaudiananna, idi alas 10:27 ti rabii, idi Hulio 17, naikonektaren ti tallo ti palona a barko iti “kabsatna a lugan” iti law-ang. Nakasarita ni Kapitan Zorokhov ni Komander Afanassiev nga adda iti estasion idiay law-ang nga agarup 350 a kilometro ti kaadayona.

Nakagteng ti Armada iti kangitingitanna idi Domingo, Hulio 18, babaen ti parada nga agpababa iti Karayan Seine, nga aggapu iti Rouen sa mapan iti nalawa a baybay. Ginasut a ribu a tattao ti nakalinia iti 120 a kilometro a dalan, nga agpaypayapay kadagiti tripolante iti barko bayat a lumabasda iti kadaanan a purok ti Normandy, kadagiti monasterio, ken kadagiti kastilio.

Kalpasan dayta, pimmanaw dagiti nadaeg a naglayag a barko a makipaset iti salisal ti panaglayag, pelikula, wenno dadduma pay a nakaskasdaaw a pabuya iti adayo a puerto. Nagsublin ti gagangay nga aktibidad kadagiti sangladan. Ngem malaglagipto ti Rouen nga, iti di kumurang a sangapulo nga aldaw, dayta idi ti nagsasabatan dagiti barko iti aramid a panaglayag.

[Mapa iti panid 10]

(Para iti aktual a pannakaurnosna, kitaem ti publikasion)

Honfleur

Seine

Rouen

[Credit Line]

[Ladawan iti panid 10]

Ti tallo ti palona a barko ti Mexico a “Cuauhtemoc”

[Ladawan iti panid 10]

Ti nangayed nga “Étoile Molène” ket naaon manipud iti nakalnedanna

[Credit Line]

[Ladawan iti panid 10]

Naipinta a ladawan ti puerto ti Rouen idi 1855, idi aglaylayag dagiti barko iti Seine

[Credit Line]

[Ladawan iti panid 11]

Rouen, “ti siudad dagiti sangagasut a torre,” nagbalin a kabakiran dagiti palo

[Credit Line]