Aids Idiay Africa—Ania ti Namnama Para iti Baro a Milenio?
BABAEN TI KORESPONSAL TI AGRIINGKAYO! IDIAY ZAMBIA
ITAY napalabas a Setiembre, naguummong dagiti delegado manipud iti nadumaduma a paset ti Africa idiay Lusaka, Zambia, para iti maika-11 nga International Conference on AIDS and STDs in Africa. Maysa a panggep ti komperensia ket paregtaen ti ad-adda a panagtitinnulong ti nadumaduma a rehion iti panangsungbat iti saludsod a, Kasanotayo a mataming ti panagsaknap ti AIDS iti Africa?
Kinuna ni propesor Nkandu Luo, ti ministro idi iti salun-at idiay Zambia a “nagkaro” ti kasasaad idiay Africa ken iti dadduma pay a napanglaw a pagilian, nga innayonna a dayta ti “mangpaspasardeng ken mangbalbaliw pay ketdi iti dadduma kadagiti naisangsangayan a nagrang-ayan ti salun-at ken ti dadduma pay a tay-ak ti kagimongan ken ekonomia.”
Naipabigbig iti maysa a simposium maipapan iti kinatalged ti dara a mayakar ti AIDS babaen ti pannakayalison. Impatuldo ti maysa a doktor a pannakabagi ti World Health Organization’s Blood Safety Unit a nupay saan a kanayon a makayakar iti HIV ti seksual a pannakidenna iti naimpektaran a kapareha, maakaran ti tao a mayalisonan iti dara a kontaminado iti AIDS—iti tunggal mayalisonan! Buyogen ti naimbag a rason a kinuna daytoy a doktor nga iti kasta a kasasaad, “ti katalgedan isut’ di panangyalison iti dara.”
Impaganetget ti komperensia a ti nakanginngina a gastos iti panangagas ti gapu a marigatan dagidiay addaan iti AIDS nga agpaagas. Iti promedio, kas pagarigan, makategged ti maysa nga agnanaed iti maysa a siudad ti Uganda iti agarup $200 iti kada bulan. Ngem ti panangagas a mangusar kadagiti antiretroviral mabalin a madanonna ti agingga iti $1,000 kada bulan!
Impasimudaag ti komperensia sadi Lusaka nga awan ti nalaka a solusion nga impaay ti itatapog ti baro a milenio iti panagsaknap ti AIDS. Nupay kasta, maamiris dagiti agad-adal iti Biblia a ti kamaudianan a solusion iti amin a sakit ket agpannuray iti Namarsua a ni Jehova a Dios, a nangikari nga iti baro a lubongna, “awanto ti agtataeng nga agkuna: ‘Masakitak.’”—Isaias 33:24.
[Mapa/Dagiti Ladawan iti panid 31]
Ni propesor Nkandu Luo
[Credit Line]
Naretrato babaen ti pammalubos ni E. Mwanaleza, Times of Zambia