No Agbakasion Dagiti Baka!
BABAEN TI KORESPONSAL TI AGRIINGKAYO! IDIAY SWITZERLAND
AMMOM kadin a rinibu a baka idiay Switzerland ti agbakasion iti kada tawen? Makitam koma no kasano a tagiragsakenda unay dayta!
No bulbulan ti kalam-ekna idiay Switzerland, mayapon dagiti agpagpagatas a baka kadagiti kuadra. Anian a bang-ar no dumtengen ti primavera ket makaruaren dagiti baka tapno agarab iti berde a karuotan a napattopattokan kadagiti nakaduyduyaw a dandelion. Agparang a ti pasaray panaglagtolagtoda ti pakakitaan iti naan-anay a kinaragsakda iti panagbalbaliw ti aglawlaw ken paniempo.
No Mayo wenno rugrugi ti Hunio, lumawa ti pagpastoran no marunaw dagiti niebe ket agparangen ti tay-ak kadagiti nangatngato a disso. Panawenen ti pannakaipastor dagiti baka iti kabambantayan kabayatan ti kalgaw.
Pagpastoran a Nasayaat ti Pannakapadanumna
Idiay Switzerland, adda agarup 10,000 a pagpastoran kadagiti nangatngato a disso, a mangsaklaw iti 10,000 a kilometro kuadrado. Katupag daytoy ti kakapat iti intero a kalawa ti daga ti pagilian. Isu a siiinget a masalsalakniban daytoy napateg a gameng.
Agkadua ti tao ken animal nga agtrabaho tapno saan nga agbalin a narugit ken nasamek dagiti nangato a tanap. Gapu iti daytoy a kalat, italek dagiti agtartaraken iti animal ti agarup a 500,000 a baka iti panangaywan dagiti propesional a pastor. Dagiti agpagatas a baka, agraman dagiti urbon, ket maibiahe babaen ti trak wenno tren tapno agbakasionda nga agarab iti kabambantayan kabayatan ti kalgaw.
Tangay saan unay a nangato ti madanon dagiti kalsada ken riles ti tren, masapul a pagnaen ti maudi a paset ti biahe. Agtultuloy a sumang-at dagiti pangen bayat nga agpatpatuloy ti kalgaw. Iti pagpastoran a no dadduma ket 2,000 agingga iti 2,200 a metro iti ngatuen ti patar ti baybay, makapagarab dagiti baka iti nananam a ruot ti kabambantayan agraman nagpipintas ken namaris a sabsabong. Nawadwad ti ubbog iti bantay, isu a saan a nakiddit ti mainum a danum.
Ti nagsayaat a gatas a patauden dagiti baka ket maisalog no dadduma iti bantay tapno mailako wenno maproseso. Ngem kaaduanna, maaramid dayta a mantekilia wenno keso kadagiti kalapaw iti sidiran ti bantay. Bayat nga agngudo dagiti aldaw ti kalgaw, maiturong dagiti pangen kadagiti pagpastoran iti nababbaba a disso. Kamaudiananna, dumtengen ti aldaw—depende iti paniempona, gagangay nga iti arinunos ti Setiembre—tapno agsublin dagiti pangen kadagiti kuadrada no kalam-ekna. Wen, asidegen nga agpatingga ti bakasionda kabayatan ti kalgaw! Ngem maangay nga umuna ti espesial a parada.
Ti Espesial nga Aldaw!
Naurnosen dagiti rekord ti produksion, ket maarkosan dagiti kalaingan a baka sigun iti kaadu ti gatas nga impaayda. Ti kaaduan ti naipaayna a gatas ti mangidaulo iti parada nga agawid. Maarkosan ti ulo dagiti baka iti namaris a papel a sabong, ribon, ken sangsanga ti babassit a saleng. Adu ti maukkoran iti metal a kampanilia, a pakangngegan iti asidegen nga isasangpetda.
Ipakita dagiti pastor ti kinaespesial daytoy nga okasion babaen ti panagkawesda iti puraw a kamisadentro ken bordado a nangisit a velvet a diaket. Kabayatanna, iti tanap a salogan, agaaripuno dagiti umili iti away iti igid dagiti kalsada tapno sitatakder a palakpakanda ti parada.
Apaman a makadanondan iti kapanagan, maisubli manen dagiti baka kadagiti makinkukua kadakuada para iti sabali manen a tiempo ti kalam-ekna. Ngem saan nga agbayag, agbakasionda manen idiay kabambantayan! Talaga a makaparagsak unay a biag!
[Ladawan iti panid 18]