Apay Di Padasen ti Agbakasion Idiay Pagtaengan?

ADDA dua lawas a bakasionmo, ket pudno a kasapulam ti panagbalbaliw! Ngem dika kabaelan ti gastos iti panagbiahe iti daytoy a tiempo. Aniat’ maaramidanyo?

Bueno, laglagipenyo, ti bakasion ket panaginana manipud iti inaldaw a trabaho, maysa a maibal-et a panaginana wenno bang-ar. Gapuna apay a dikay padasen ti agbakasion idiay pagtaengan? Pudno nga adu a bambanag nga aramiden sadiay. Mabalinyo ti agpinta, wenno mangala kadagiti retrato, wenno aramiden dagiti dadduma a pakaawisan a bambanag a bassit laeng ti tiempoyo a naipaay iti dayta. Addada luglugar ken bambanag iti mismo a pagtaenganyo a mabalinyo a kitaen ken tagiragsaken. Ti bakasion iti pagtaengan adda adu a pagimbaganna. Manginagankay laeng ti sumagmamano:

▪ Di kasapulan ti passport wenno visa

▪ Di kasapulan a pasukatan ti kuarta

▪ Awan ti parikut iti sabali a pagsasao

▪ Awan ti pakarigatan idiay custom wenno imigrasion

▪ Awan ti panagimpake

▪ Awan ti nagastos a pasahe iti eroplano wenno gasolina

▪ Awan ti napateg a tiempo a mabusbos iti ipapan sadiay

Itatta, saan kadi a nasaysayaat ti riknayo itattan? Ta, makaturogkay pay agingga iti kaykayatyo iti bukodyo a komportable a kamayo a nakairuamanyon!

Ti napateg a banag a mainaig iti aniaman a bakasion isu ti panangiplano iti dayta. Para kadagiti dadduma a tattao ti pananginanama ket kas met laeng ti kapaysuanan. Ti bakasion iti pagtaengan kasapulanna met ti nasayaat a panagsagana tapno makaaramidka iti makagunggona a banag a pudno a tagiragsakem ken makapnek kenka.

Ti Aramidenyo Idiay Pagtaengan

Iti bakasion adu a tattao ti mangala kadagiti retrato kas pakalaglagipan iti okasion. Agbiaheda iti rinibribo a milias a mangretrato kadagiti bambanag nga adda a mismo iti pagtaenganyo. Padasenyo ti mangretrato kadagiti daisies iti tay-ak, iti dandelion iti asideg, wenno ti maysa a bassit a parsua iti maysa a sanga. Nalabit kankanayon a kayatyo a retratuen ti daan nga eskuelaanyo, wenno ti balay a dinakkelanyo, wenno ti kalapaw ni Lola iti talon nga adda laeng iti ruar ti ili, ngem pulos a dikay nakapan sadiay a mangretrato kadakuada. Aramidenyo itan!

Ket no pagsaritaan dagiti retrato, dagiti ngay kinahon a retrato ti pamilia a panggepyo nga ikabil iti maysa nga album iti maysa nga aldaw? Adtoyen ti gundaway a mangaramid iti dayta. Mabalin a tagiragsaken ti pamilia ti panangbuya kadagitoy a pakalaglagipan iti napalabas. No makakitakayo kadagiti napintas a retrato iti pamilia wenno dagiti gagayyem, anian a nagsayaatan ti panangipatulod iti dadduma kadakuada!

Dagiti managbiahe masansan nga agkolektada kadagiti pakalaglagipan. Itan, aniat’ masarakanyo idiay pagtaengan? Nalabit dadduma a naisangsangayan a batbato maipaay iti maysa a terarium wenno ti basta maysa a malukong a nakaitalimengan ti sumagmamano kadakuada. Mabalin a masdaawkayo no kasano ti panagayat dagiti babassit nga ubbing kadagiti batbato laeng! Makapanunotkay kadi kadagiti dadduma a bambanag? Dagiti seashell? Dagiti bulbulong iti otonio? Dagiti babassit a kayo ken mulmula (uray pay dagiti ruruot!) a naipagango nga agpaay a dekorasion?

Dagidiay ngay miembro ti pamilia wenno gagayyem a kayatyo nga umay bumisita? Dawatenyo nga umayda tapno mapakapeyo wenno mapainumyo ida ti tsa. Dawatenyo ti panangisalaysay dagiti lallakayen kadagiti estoria ti kinaubingda tapno pakagunggonaan dagiti agtutubo. Apay a dikay irekord dagiti estoriada? Mabalin a din agpaut pay ni “Lakay Ben.”

No agbakbakasion, adut’ mangipatulod kadagiti postcards kadagiti inay-ayat ken gagayyemda. Maipaay iti bakasion idiay pagtaengan, mabalinyo ti agsurat kadagiti adu a sursurat. Ipakaammoyo kadagiti gagayyemyo nga inay-ayatyo ida ket dikay nalipatan ida.

No Sadinot’ Papanan Idiay Pagtaengan

No addaankay kadagiti bisita iti ili wenno siudadyo, sadinot’ pangipananyo kadakuada? Aniat’ mabalinda a makita? Iti damo mabalin a pagarupenyo nga awan ti adu a makapainteres a banag, ngem ti makagapu ket kasla ditay ikankano ti pagtaengantayo. Usigenyo no ania ti adda sadiay. Kitaenyo no ania ti irekomendar ti lokal a tourist bureau wenno chamber of commerce kadagiti turista. Mabalin nga agsiddaawkayo no ania dagiti magun-odan.

Adda kadi maysa a museo iti asideg? Wenno maysa a paktoria a mangitukon kadagiti panagpasiar? Dadduma a paktoria ti kendi wenno tsokolate mangipaayda saan laeng a kadagiti panagpasiar no di ket dagiti pay sample! Kasta met dagiti dadduma a pagaramidan iti arak. Maysa a lokal a mannalon mabalin a situtulok a mangipakita kadagiti animal kadagiti ubbing—no kasano ti mangurnong kadagiti itlog kadagiti manok, wenno no kasano ti pananggatas iti baka. Nasayaat no maammuanda no ti gatas saan nga agtaud iti bote wenno karton.

Mabalin a dikay paglutuen ni Nanang babaen iti ipapan iti maysa a restaurant iti ili. Babaen iti partikular a taraon—Insik, Hapones, Italiano, Griego—ken ti dekorasionda, ken nalabit ti musika, nalakayo laeng a panunoten a mangmangankayo iti ganggannaet a daga.

Ngem ania ngay no awan dagiti restaurant iti iliyo? Ngarud apay a dikay aramiden dayta iti pagtaengan? Manipud iti libreria makagun-odkayo iti impormasion maipapan iti panagkawkawes ken pannangan dagiti tattao. Panunotenyo nga addakayo idiay India, kas pangarigan. Maysa a cookbook nga addaan kadagiti putahe nga Indian curry ti mangipaay kadakayo iti taraon a saan a narigat a lutuen. Mabalin pay a tuladenyo ti panagkawkawesda iti rabii.

‘Ah,’ kunayo, ‘ngem dagiti agayat iti panagkampo iti pamilia dida ibilang dayta a bakasion no saanda nga agkampo.’ Matuladyo kadi dayta itoy a tawen babaen ti panagkampoyo iti likudan ti balay? Mabalin met nga agpasiarkayo a di agap-apura iti asideg nga away ket bayat ti kaadda sadiay agkolekta kadagiti atap a sabsabong ken agbuya kadagiti tumatayab ken an-animal.

Yantangay ti panawen ti bakasion ket gagangay a nasayaat a tiempo maipaay iti panangpabileg iti singgalut ti pamilia ken ti agkakadua a panangaramid kadagiti bambanag, saan kadi nga ad-adda a makagunggona no aramiden dayta idiay pagtaengan iti pagaammon nga aglawlaw? Padasenyo.

Pannakabang-ar Manipud iti Panangaramid

Kalpasanna adda dagiti amin a trabaho iti balay a kasla awan tiempoyo a mangaramid kadakuada. Ngem pudno kadi a makabang-ar dayta a pisikal a trabaho? Bueno, saan kadi a makabang-ar ti panangrugi manen iti regular a trabahoyo kalpasan ti bakasion a kontento ta natarimaanen dayta agtedted nga atep, naikapeten dagiti amin a serradora iti uyusen, ken dagiti agranetret a bisagra naulimekdan? Mabalin a saan unay a makabannog dayta a trabaho ngem ti nagay-ayamkayo, naglangoy, wenno nagpasiar a nagnagna.

Ket siasino ti di agtarigagay nga agbasa ken agadal iti ad-adu pay? Daytat’ saan a makauma. Sukimatenyo ti aniaman a tema a paginteresanyo. Alaenyo ti maysa a tomo ti Ti Pagwanawanan wenno Agriingkayo! iti libreriayo. Dikay masdaaw no masarakanyo ti bagiyo a maisiasi ket basaenyo dagiti dadduma a makaay-ayo nga artikulo. Ket kellaat a tiemponton ti pangngaldaw wenno panangrabii. Dikay mamati a nakaparpartak a limmabas ti tiempo. Ngem agrelaks! Laglagipenyo, agbakbakasionkayo.

Rag-o iti Panangpataud iti Bakasion iti Pagtaengan

Managparnuaykay koma, agpanunotkayo, ket mabalin a no nalpaston daytoy agdama a bakasion, mabigbigyonto: ‘Pudno a tinagiragsakko daytoy! Aramidekto manen!’

Gapuna itatta, ania ngarud ti pagarupyo? Nalabit tarigagayanyo ti mangummong iti pamilia ket agplano iti bakasion iti pagtaengan. Imtuodenyo ti kapanunotanda. No agsolsolokayo, awisenyo ti naimbag a gayyemyo a mangiplano iti dayta. Kalpasanna padasenyo ti agbakasion iti pagtaengan. Daytat’ agserbi met laeng a kas ti adayot’-pagtaengan a bakasion a mangipaay kadakayo iti matarigagayan a panagbaliw ti aramidyo iti okupado a panagbiagyo.

[Dagiti Ladawan iti panid 23]

Ti panagpasiar iti away, panangbisita iti talon wenno maysa a museo, wenno uray pay ti nabannayat a panagbasa, mabalin a mairaman iti bakasion nga agtalinaed iti pagtaengan