Nakasaganakayo Kadin nga Agbakasion?
ASIDEGEN ti kalgaw idiay Northern Hemisphere. Di agbayag minilionen ti agbakasion. Ngem saan laeng a maaramid iti kalgaw ti panagbakasion. Nagbalinen nga intero a tawen a negosio ti turismo, a mangpastrek iti binilion a doliar iti tinawen. Nupay kaaduan a bakasionista ti agbiahe iti pagilianda met laeng, gagangayen ita ti panagbiahe iti ganggannaet a lugar, a naipamaysa laeng idi kadagiti babaknang.
Nagduduma ti tiempo ti bakasion nga ipaay dagiti nangyempleo iti nadumaduma a pagilian. Idi 1979, 2 laeng a porsiento kadagiti trabahador nga Aleman ti nakaawat iti innem a lawas a bakasion, ngem ita kaaduan ti agbakasionen iti kasta. Nasurok a lima a lawas ti promedio a bakasion dagiti trabahador ti industria iti Makinlaud a Europa.
Adda Pagimbagan ti Bakasion
Idi unana naiduma ti kaipapanan ti bakasion iti kaipapananna ita. Ilawlawag ti The New Encyclopædia Britannica: “Ti moderno a panagbakasion . . . maisupadi ti kaipapananna iti kadaanan a relihioso a kalendario a Romano. Nasurok a 100 nga al-aldaw iti tawen dagiti piesta a naidedikar iti nadumaduma a didios ken diosa dagiti Romano. Kadagiti aldaw ti sagrado a pipiesta, nga isu dagiti nasantuan nga aldaw, aginana dagiti tattao iti inaldaw nga ar-aramidda. Maawagan a dies vacantes, bakante nga al-aldaw, dagiti aldaw a saan a maibilang a sagrado, a kabayatan dagitoy agtrabaho dagiti tattao.” Imbes nga al-aldaw a panagtrabaho, dagiti “bakante nga aldaw” iti moderno a tiempo isu ti al-aldaw a panaginana.
Dagiti Aleman kayatda nga awagan dagiti bakasion a “ti kasayaatan a lawlawas iti tawen.” Dagiti workaholics, iti kasumbangirna, mabalin nga ibilangda dagiti “bakante nga aldaw” ita a pudno a bakante, awan dagiti makagunggona nga aramid. Ngem nakalablabes a panangmatmat daytoy. Ti maysa a natimbeng a panangmatmat awatenna ti kinasirib ti panapanawen a panagsardeng iti kadawyan nga aramid, panangaramid iti naiduma a banag, ken panagrelax.
Napaneknekan dagiti positibo a paset ti bakasion iti survey idi 1991 kadagiti ehekutibo ti negosio iti Europa, 78 iti tunggal 100 kadakuada ti nagkuna a dagiti bakasion “naan-anay a nasken tapno malapdan ti pannakapaksuy ti ehekutibo.” Interamente a tallo a kakapat ti agkuna a pinarang-ay dagiti bakasion ti naaramidan iti trabaho, ken nasurok a dua a kakatlo ti nagkuna a dagiti bakasion pinarang-ayda ti kinamanagpataudda. Ti ad-adda pay a nakaay-ayat, 64 porsiento kadagiti babbai ken 41 porsiento kadagiti lallaki ti immanamong iti sasao a: “Agmoriadoak no awan ti regular a bakasion.”
Panagbiahe, Edukasion a Mismo
Nagsurat ti Ingles a doktor ken mannurat idi maika-17 a siglo a ni Thomas Fuller: “Ti adut’ mabiahena adut’ maammuanna.” Ti panagbiahe palubosannatayo a makiam-ammo kadagiti tattao iti sabali a lugar, maam-ammo dagiti ugali ken wagas ti panagbiagda. Ti panagbiahe kadagiti pagilian a nababbaba ti kasasaad ti panagbiagda ngem ti panagbiagtayo isuronatayo nga agbalin a managyaman iti adda kadatayo ken riingenna ti pannakipagriknatayo iti tattao a nakurkurapay ngem datayo.
No palubosantayo a mangimpluensia kadatayo, makorehir ti panagbiahe dagiti di umiso a pagarup ken kissayanna ti panangidumduma. Mangipaay dayta iti gundaway a mangsursuro a mismo uray bassit laeng iti baro a pagsasao, mangpadas iti naiduma a taraon a makaay-ayo iti panagramantayo, wenno gundawaytayo a mangpasayaat iti album ti pamilia, koleksion nga slide, wenno libraria ti video nga addaan kadagiti pagarigan iti kinapintas ti panamarsua ti Dios.
Siempre, tapno magunggonaan ti kaaduan, saan laeng nga agbiahe ti aramidentayo. Bassit ti masursuronto ti turista nga agbiahe iti kagudua ti aglawlaw ti lubong nga agnaed laeng iti hotel a kadua dagiti padana a turista—a kaaduan kadakuada ti kailianna—nga aglangoy iti pribado a paglanguyan wenno playa ti hotel, wenno mangan iti isu met laeng a taraon a kankanenna iti pagtaengan. Nakalkaldaang! Sigun kadagiti report, kaaduan a biahero nalawag a saan a napasnek ti panaginteresda kadagiti pagilian a bisitaenda wenno iti umili sadiay.
Umiso a Panagsagana
Kinuna ni Samuel Johnson, maysa a maika-18-siglo nga Ingles a manangputar iti salaysay ken bumiberso, a ti maysa a tao nga agbiahe “masapul nga awitenna ti pannakaammo, tapno isut’ makayawid iti pannakaammo.” Isu a no adda gundawayyo nga agbiahe, agsaganakayo maipaay iti panagbiaheyo. Agbasakayo maipapan iti destinasionyo sakbay a mapankayo. Planuenyo ti kayatyo a kitaen, ken ikeddengyo no ania ti kayatyo nga aramiden. Kalpasanna agsaganakayo a maitunos iti dayta. Kas pagarigan, no kayatyo ti agpasiar iti playa wenno mapan iti kabambantayan, mangitugotkayo kadagiti umiso a sapatos ken kawes.
Dikay padasen ti agapura unay iti eskediulyo ket iti kasta mariknayonto pay laeng ti pakasikoran iti inaldaw a panagbiag iti bakasionyo. Mangisaparkayo iti nawadwad a di naiplano a tiempo a mangaramid kadagiti di inanamaen a banag. Maysa kadagiti pudno a gunggona ti panagbakasion isut’ kaadda ti tiempo nga agpanunot ken agmennamenna nga awan dagiti pakarigatan ti nainget nga eskediul, a marikna a nawayawayaankayo kadagiti pakarigatan ken pakalappedan ti panagbiag babaen iti nainget nga eskediul.
Ti makagunggona unay a bakasion mabalin nga iramanna pay ti nadagsen a panagtrabaho. Ti panangaramid iti maysa a banag a naiduma kaaduanna isu ti sekreto ti nagsayaat a bakasion. Kas pagarigan, iyurnos ti maysa a nonprofit organization idiay Estados Unidos a naawagan Volunteer Vacations kadagiti boluntario a mangbusbos iti bakasionda a mangtaginayon kadagiti parke nasional wenno kabakiran. Kinuna ti maysa a boluntario a nagtrabaho iti nadagsen, ngem tinagiragsakna unay dayta ta inkeddengna nga uliten ti kapadasan makatawen kalpasanna.
Masansan nga usaren dagiti Saksi ni Jehova ti panagbakasion nga agbiahe a mapan kadagiti Nakristianuan a kombension wenno mangparang-ay iti ministerioda iti publiko. Dadduma usarenda dagiti bakasionda nga agtrabaho idiay headquarter wenno pasilidad ti sanga dagiti Saksi ni Jehova iti pagilianda met laeng, ket tagiragsakenda ti kapadasan. Adu kadagitoy ti agsurat kalpasanna iti surat a panangapresiar iti pribilehio.
Wen, dagiti bakasion mabalin a makaay-ayo unay, mabalin pay a kasasayaatan a lawlawas iti tawen. Awan duadua a segseggaan dagiti ubbing dagiti aldaw agingga a dumtengda! Ngem, adda dagiti banag a masapul nga annadanyo. Ilawlawag daytoy ti sumaganad nga artikulo.