Panangiparang ti Naimbag a Damag—Bayat ti Panagbakasion
1 Agbakasionkayo aya iti daytoy a kalgaw? No kasta, ania ti aramidenyo? Adu dagiti mangtaming kadagiti bambanag iti pagtaengan. Dagiti dadduma ti sumarungkar kadagiti gagayyem ken kabagian. Ti tiempo iti bakasion mangted met iti gundaway a makiraman a naan-anay iti panangikasaba ti Pagarian.—Mar. 6:30-34.
NAPARANG-AY A SERBISIO ITI TAY-AK
2 Bayat iti tiempo ti bakasion, nalabit a mabalintayo ti makiraman a naan-anay iti panangikasaba iti naimbag a damag ti Pagarian. Addaankayo kadi iti listaan dagiti interesado a tattao a medio nabayagen a saanyo a nasarungkaran? Kabaelanyo aya a nayonan ti panagsarungkaryo kadakuada ken nalabit a maipasdekanyo ida iti panagadal? Planoyo kadi ti agserbi nga auxiliary payunir bayat iti panagbakasionyo? No kasta, kayatyo kadi nga awisen dagiti dadduma nga agibumbunannag a makipagtrabaho kadakayo? Amin dagitoy nga oportunidad ti mangipakita kadatayo no kasano ti napudno a panangtratotayo kadagiti tattao ken panangparang-ay iti pannakiramantayo iti ministerio.
IMPORMAL A PANANGASABA
3 Bayat nga agbiahe wenno agaliwaksaykayo, masansan a makasarakkayo iti oportunidad a maipaay iti impormal a panangasaba. Daytoy aya a benneg ti serbisio iti dakdakkel ti maaramidanyo a pakipasetan iti daytoy a kalgaw? (Juan 4:7-9, 23) Dagidiay addaan ti balligi iti daytoy a kita ti trabaho ti agkuna a kasayaatan a banag ti panagbalin a naingayyeman ken pudno a nainteres kadagiti sabsabali a tattao. Kasta met a nasayaat no maipaay iti nasakbay a panagpanunot no ania iti sawen tapno mas epektibo.
4 Bayat iti panagbiahe, adu dagiti kakabsat ti makisao kadagiti tattao. Bayat iti pannakisaoda nalaka laeng ti panangisaludsodda, “Kayatyo kadi ti agbasa?” No positibo ti sungbat a mangngegan, ituloyda a kunaen: “Adda nabasak a makapainteres unay iti daytoy a magasina. [Ipakita ti suheto ken komentuan dayta.] Nalpaskon a nabasa dayta. No kayatmo a basaen, maawiska a mangaramid iti dayta.” Maaramid daytoy kadagiti daan a ruar dagiti magasina. Maragsakan dagiti dadduma a mangted ti kontribusion a maipaay kadagiti agdama a ruar no maitukon iti kastoy a wagas. Dagidiay agkedked iti dayta ti masansan nga umawat kadagiti tract a kas regalo.
5 Ipabigbig dagiti dadduma nga isuda ket Saksi ni Jehova ken isaludsodda, “Ania ti makunayo maipapan iti Biblia ken iti isursurona?” Masansan a daytoy ti manglukat iti dalan a maipaay iti nasayaat a saritaan. No kanayonkayo a mangitugot iti tract, magasina ken agdama a tukon, masarakanyo nga adu dagiti gundaway a mangiparang kadagitoy kadagiti sabsabali a tattao.
PANANGASABA KADAGITI KABAGIAN
6 Masansan a dagiti kabagiantayo ket am-ammodan dagti Saksi ni Jehova. Nalabit a kayatda nga ammuen maipapan iti pammatitayo ngem agkedkedda laeng nga agsaludsod agsipud ta saanda a kayat ti ‘makasabaan’ wenno maisagmak iti atiddog nga diskusion. Dadduma kadagiti kakabsat ti mangaramid laeng iti maysa a sentensia maipapan iti kinapudno ket palubosan ti kabagian a mangeddeng no kayatna nga itultuloy ti diskusion. Kas pangarigan, mabalinyo a dakamaten no sadino ti timmabunuanyo a kombension wenno ipakita kenkuana iti maysa a baro a publikasion ti Sosiedad. Wenno komentuanyo maipapan iti sasaaden daytoy lubong, ti nangina a gagatangen a pagbiag wenno problema ti pamilia, a dagitoy ti masansan a manglukat iti dalan ti diskusion. Dagiti agtutubo ti masansan a makaallukoy kadagiti dumngeg a lapayag manipud kadagiti kabagian.
7 Bayat a naregtatayo iti panangasaba ken ikagumaan ti mangisawang iti maysa a sao iti umiso a tiempo, kasapulantayo a kanayon iti kinamanagusig ken kinakonsidera kadagiti dadduma. Laglagipenyo ti importansia iti kinamannakigayyem ken panangipakita iti napudno nga interes iti sabali a tao.—Prov. 15:23; 1 Ped. 3:15.