Nakaskasdaaw nga Emperor
TI KADAKKELAN iti amin a penguin a ti emperor ket nasurok a maysa a metro ti katayagna ken 40 a kilo ti dagsenna. No agpaamianan ti dadduma a penguin tapno maliklikanda ti nakaro ken nasipnget a kalam-ekna idiay Antarctica, agpaabagatan dagiti emperor—nga agpa-Antarctica! Apay? Nakaskasdaaw man ngem tapno agpaaduda.
No agitlog ti kabaian nga emperor, dagus nga akupen ti kalakian manipud iti yelo sana ikabil kadagiti sakana. Kalpasanna, isuksokna dayta iti pannakasupot iti tianna—ti kudil iti makimbaba a tianna. Ti kabaian ti mapan iti baybay nga agsawar iti taraon. Iti las-ud ti 65 nga aldaw, kabayatan ti nagkaro a kalam-ekna, ukopan ti kalakian ti itlog. Ti taba iti bagina ti pagbiagna kabayatan dayta a panawen. Tapno mataginayon ti bara ti bagida bayat a mabagyoda iti nakaro a niebe a mabalin a makadanon iti 200 a kilometro iti kada oras, agaaripuno dagitoy a masirib a tumatayab iti dadakkel a grupo. Agsisinnublat ti tunggal maysa nga agyan iti makinruar, sada subaen ti angin iti bukotda.
Babaen ti nakaskasdaaw unay ti pannakaikeddengna a tiempo, mapessaan ti itlog apaman nga agsublin ti kabaian. Ngem kasano a masarakanna ti asawana iti tengnga ti rinibu a kalanglanga ti asawana? Babaen ti kanta. Kabayatan ti damo a panaginnaremda, kantaan ti kalakian ken kabaian ti tunggal maysa kadakuada ken ikabesada ti kanta ti tunggal maysa kadakuada. Inton agsublin dagiti kabaian, naimpusuan nga agkanta dagiti kalakian ken kabaian. Mariro la ketdi dagiti tattao iti nadumaduma ken di makaay-ayo a tono, ngem di agbayag masarakanton dagiti emperor ti asawada. Sa kalpasan a medio maal-alumiimda a mangipasublat iti kappessa a sibongda, magna ken aguyas ti mabisin unayen a kalakian a bumallasiw iti 45 a milia a kaniebian tapno agbirok iti inumen ken taraonna.
[Picture Credit Line iti panid 31]
Impaay ni John R. Peiniger