Ti Rekado a Naggapu iti Bangir ti Lubong
BABAEN TI KORESPONSAL TI AGRIINGKAYO! IDIAY HUNGARY
“NAGIMASEN a gisado! Ania ti pinangtimplam iti dayta?” Mabalin a kastoy ti reaksionmo no maramanam ti naimas a gagangay a Hungarian goulash. Ti naisalsalumina a ramanna ket maigapu iti paprika, maysa a rekado a naggapu iti mula a sili, a nakagteng ditoy Hungary manipud iti bangir ti lubong.
Ipatuldo ti historia a ti Abagatan nga America ti immuna a naggapuan ti sili. Dagiti damili a nasarakan kadagiti tanem ti Inca—a mapapati a rinibu a tawenen ti kabayagna—ket naarkosan kadagiti ladawan ti mula a sili. Karaman pay ketdi dagiti sili kadagiti taraon a naitanem a kadua dagiti mummy dagiti Inca.
Patien ti dadduma a historiador a maysa a doktor a naglayag a kadua ni Columbus a napan idiay America ti nangyawid idiay España idi 1493 kadagiti bukel ti sili. Aniaman ti napasamak, ti España ti immuna a pagilian ti Europa a nagmula iti adu a sili. Naggapu sadiay ti mula a sili a naipan idiay Britania ken abagatan a Francia. Sadiay ad-adda a naglatak a kas masetas ngem kas rekado wenno taraon! Idi agangay, intugot dagiti agtagtagilako a Griego dagiti mula a sili kadagiti pagilian iti intero a Mediteraneo ken iti Black Sea.
Nalataken ti mula a sili ditoy Hungary nanipud idi maika-16 a siglo. Ti maysa a naganna a “sili dagiti Turko,” ipasimudaagna a mabalin a daytat’ insangpet dagiti Turko kadakami. Aniaman ti napasamak, agingga itatta, ti natayengteng a nalabaga, naayamuom, ken nabanglo a paprika ti Hungary ti paborito dagiti managayat ti rekado iti intero a lubong.
Agtubo dagiti mula a sili kadagiti patag a talon a lumabbaga, nadarat a daga a main-inaran. Rugian nga isagana dagiti mannalon ti daga a pagmulaan iti naladawen a kalgaw, kalpasan la unay ti panagapit iti napalabas a tawen. Dadduma a sili ti maimula a bukel; dadduma ti maimula a palakay. Masapul a maaywanan dagiti palakay a sili iti kontrolado nga aglawlaw kas iti nasayaat ti bentilasionna a greenhouse. Sadiay a maaywanan dagiti palakay ken masibugan a naimbag, maabunuan, ken mairuotan. Sakbay a maimulada iti sabali a disso, in-inut a mairuamda iti kasasaad iti ruar.
Kalpasan ti innem agingga iti walo a lawas, panawenen a maimula dagiti palakay iti bangkag. Ditoy Hungary, maaramid daytoy bayat ti umuna a sumagmamano nga aldaw ti Mayo. Iti daytoy a tiempo, masapul a siaannad a maasikaso pay la dagiti mula—masapul a sibugan ken ispreyan dagiti agmulmula dagitoy ken sukayenda ti aglawlawda no kayatda ti agapit kadagiti de kalidad a sili.
Mangrugi ti panagapit iti arinunos ti Agosto wenno iti kattapog ti Setiembre. Ti berde a sili ket agbalin a nalabaga a nabanglo ti ayamuomna no maluom. Malaksid no aggigiddan nga agluom ti sili, masapul a maburasda babaen ti ima imbes a makina. Aniaman ti mausar a panagburas, adu ti pisikal ken kemikal a panagbalbaliw a maaramid kadagiti sili sakbay a maidasar iti lamisaanmo. Kas pagarigan, kalpasan a maburas, kumbet ti sili, sa bumassit ti asukarna ken bitamina C.a
Kalpasan a maburas, mapamagaan wenno mapakebbet pay dagiti sili. Gagangay a maibitin dagitoy iti maysa a lubid. Ngem itatta, kadawyanen a maisako dagiti sili iti atiddog nga addayo ti pannakaabelna a sako, tapno serken ti angin. Maibitin dagiti sako iti pagsab-itan wenno maikamarin. Apaman a kimbetdan, magilingen dagiti sili tapno mapulbos ket agbalin a naimas a pagtimpla a maawagan iti sao a Hungariano a paprika para iti sili.
Nakagasgasang ti dadduma a kita ti paprika gapu iti kemikal a maawagan capsaicin. Daytoy a natural a produkto ket maus-usar pay a pangagas iti di natunawan ken ut-ot ti rayuma. Aniaman ti kasasaad, ti naisangsangayan a raman ti paprika—nakagasgasang man wenno kalkalainganna—ket maysa laeng kadagiti kalidadna. Ti pagsayaatanna ket makaay-ayo a kitaen ti kolor a patauden ti paprika. No mainayon iti pagpakan iti manok, ti paprika pagitlogenna pay dagiti manok kadagiti nataytayengteng ti duyawna nga itlog!
Kayatmo kadi a ramanan ti putahe a natimplaan iti paprika? Apay a dika padasen ti goulash a nailanad iti baba? Kas kunaenmi a taga Hungary, jó étvágyat!—tagiragsakem ti pannanganmo!
[Footnote]
a Ti maysa laeng a sili ket mabalin nga addaan iti lima agingga iti innem a daras a kaadu ti bitamina C kas iti maysa a kahel wenno lemon.
[Kahon iti panid 11]
HUNGARIAN GOULASH
1⁄4 a kilo a lasag ti baka, nagerret iti kuadrado
1 a kutsara a manteka
1 a kalkalainganna ti kadakkel a sibuyas, natadtad
2 a dadakkel a bawang, napitpit
2 a kutsara a nabanglo a paprika
2 a kutsarita nga asin
1⁄4 a kutsarita a bukel ti caraway (no kayatmo)
2 a kalkalainganna ti kadakkel a patatas, nabugguan, naukisan, ken nagerret iti kuadrado
1 a bassit a berde a sili, naikkat ti bukelna ken natadtad
2 a babassit a kamatis, naukisan, naikkat dagiti bukelna, ken nagergerret
100 a gramo a namaga nga egg noodles
Papudotem ti manteka iti kaserola. Igisam ti sibuyas agingga a lumukneng. Nayonam iti bawang ken paprika, ken bassit a danum tapno di makset. Kalpasanna, ipisokmon ti baka ken asin, sa kiwarem a naimbag. Kalubam ti kaserola ket pagburekem. Kiwarem sagpaminsan, nayonam iti danum no kasapulan tapno di makset. Inayonmo ti bukel ti caraway, no kayatmo. No naluknengen ti baka, ipisokmon dagiti sili, kamatis, ken dua a litro a danum. Pagburekem, kalubam, ken lutuem iti 15 a minuto. Nayonam iti patatas ket pagburekem agingga a maluto ti patatas (10 agingga iti 15 a minuto). Asinam sigun iti kayatmo a kaapgad. Idasarmo a napudot a kadua ti naisagana nga egg noodles. Mabalin a kanen dayta ti uppat agingga iti innem a tattao.