Manipud Kadagiti Agbasbasa

Dagiti Biktima ti Panangparigat Pagyamanan unay iti panangimaldityo iti artikulo a “Panangtulong Kadagiti Biktima ti Panangparigat.” (Enero 8, 2000) Ti nauneg a pannakaawat ken empatia dayta ti nakatulong kaniak a mangyaplikar iti impormasion kadagiti personal a problemak.

B. R., Estados Unidos

Sinuratannak ti maysa a gayyemko. Basta kinunana laeng: ‘Maipapan kaniak ti artikulo. Pangngaasim ta basaem.’ Naldaanganak iti daytoy a surat, tangay isu ti nangyadal kaniak iti Biblia idi rugrugi ti dekada 1970. Diak pulos impagarup. Nabang-aranak ta nangipablaakkayo iti prangka a salaysay maipapan iti pakariribukan ti panunot dagiti biktima iti intero a lubong a nagsagaba iti panangparigat dagiti dadduma.

L. W., Estados Unidos

Nakallalagip a Kanta Pagyamanan iti ababa nga artikulo a “Kanta a Dina Pulos a Nalipatan.” (Disiembre 22, 1999) Nagpintas daytoy a kanta ta agpayso a padayawanna ni Jehova ken pagsangitennak. Saan a nagamak ni Franz Schubert a nangusar iti nadayag a nagan ni Jehova.

K. C., Estados Unidos

Tapno maammuan dagiti agbasbasa, nupay narelihiosuan ti kanta a “Die Allmacht” (Opus 79, No. 2), saan a naputar tapno makanta iti simbaan. Naipadamag a pinutar dayta ni Schubert gapu ta natukay ti riknana iti kinadaeg ti kabambantayan kabayatan ti kaaddana idiay Austria.​—ED.

Disenio iti Nakaparsuaan Nasuroken a 30 a tawen nga agbasbasaak iti Agriingkayo!, ngem kayatko nga iyebkas ti panagyamanko iti serye a “Biag​—Adda Nangdisenio.” (Enero 22, 2000) Gagangay a diak magustuan dagiti nasientipikuan a tema, ngem nagustuak dagitoy a nalaka a basaen nga artikulo.

T. E., Estados Unidos

Pinarayray dagiti artikulo ti panagayat ken panangapresiarko ken Jehova. Maawatakon a saanto a makauma ti agnanayon a biag idiay Paraiso. Kanayon nga addanto dagiti nakaskasdaaw a banag a matakuatantayo maipapan iti Namarsua kadatayo. Awanto ti panagpatingga ti panagsursuro.

J.R.A., Brazil

Kasla adda kamali iti panid 7, a mangisalsalaysay iti pannakatransmision ti ngilaw. Kayatyo kadi a sawen a “pagnaigenna dagiti payak”?

P. S., Estados Unidos

Saan a kasta ti kayatmi a sawen. Pangngaasim ta dispensarem ti kamalimi. Kayatmi nga ibaga a pagnaigenna ti “makina” kadagiti payak​—ti “makina” tuktukoyenna dagiti masel iti barukong a mangpatayab kadagiti payak.​—ED.

Adun a tawen nga agtartrabahoak iti departamento ti panagsirarak iti dakkel a kompania ti computer, isu a paginteresak ti panangyaplikar kadagiti disenio a masarakan iti nakaparsuaan. Ngem diak ammo nga adda itan ti espesipiko a benneg ti siensia a mangtamtaming iti daytoy, nga isu ti biomimetics. Nakalkaldaang ta adu a mangar-aramid iti kasta a naan-anay a panangtulad iti nakaparsuaan ti saan a mangpadpadayaw iti orihinal a Diseniador.

P. G., Estados Unidos

Nagsayaat ti pannakaisurat ti artikulo. Addada positibo unay a komento ti sumagmamano kadagiti tattao nga inikkak iti dayta no kasano a naaramid ti Dios ti amin a banag a naan-anay a di mangkontaminar. Gapu iti trabahoyo, pinagbalinyo a nalaka a basaen ti narigat a material.

R.D.S., Italia

Dagiti Peggad iti Internet Balanse unay ti artikulo nga “Agimtuod Dagiti Agtutubo . . . Kasanok a Maliklikan Dagiti Peggad iti Internet?” (Enero 22, 2000) maipapan ti kinaadu ti pakausaran ken pagdaksan ti Internet. Kas inaldaw nga agus-usar iti Internet a paset ti trabahok, mapaneknekak a kanayon nga addada peggad. Anian a nagpateg ti panangliklik kadagidiay a peggad!

J. L., Estados Unidos