“Insuratyo ti Maipapan iti Biagko!”
Adu a tawen a nakaipablaaken ti Agriingkayo! kadagiti artikulo maipapan iti nadumaduma a sakit. Siempre, ti Agriingkayo! ket saan a warnakan maipapan iti salun-at, isu a dina ibaga a nasaysayaat ti maysa nga agas ngem iti sabali. Kaskasdi, no salaysayenna ti maysa a sakit, ikagumaan daytoy a magasin a deskribiren ti an-annayen, ibaga dagiti makagapu, ken mangipaay iti Nainkasuratan ken praktikal a pammagbaga tapno magunggonaan dagiti agsagsagaba ken dagiti agay-aywan kadakuada.
Kas pagarigan, naipablaak iti ruar a Hunio 8, 1998, ti artikulo a “Pannakaawat ken Panangibtur iti Fibromyalgia” ket natignay ti intero a lubong nga agkomento iti dayta. Kinapudnona, adu a surat ti panangapresiar ti naawat uray kalpasan ti adu a bulanen a pannakaipablaak ti artikulo. “Kas man la nabagkat ti aw-awitek a bantay,” insurat ti maysa a babai. “Kas man la insuratyo ti maipapan iti biagko!” kinuna ti sabali, ket innayonna, “Ita, ammokon no kasano a daerak daytoy a sakit.”
Inapresiar met dagiti propesional ti artikulo. Kastoy ti insurat ti nabayagen a bise presidente a mangtamtaming iti pakaseknan ti medisina para iti Arthritis Foundation iti Estados Unidos: “Pagarupek a natimbeng, kompleto, ken nagsayaat ti artikulo maipapan iti fibromyalgia. Anamongak met ti pannakainayon dagiti naadaw a teksto iti Biblia ken ti kinapateg ti pammati iti kastoy a kasasaad ken iti amin a dadduma pay nga an-annayen.”
Adu pay ti naawat a sabali a surat. Adtoy ti kababagas ti sumagmamano.
“Pinaregtanak ti doktorko a mangbasa iti amin a masarakak a pagbasaan maipapan iti sakit. Ti artikuloyo ti kasayaatan a nabasak.”—L. R.
‘Adut’ nagsaludsoden kaniak maipapan iti sakitko. Gagangay nga ikkak ida iti bokleta. Ita, direkta nga ibagak kadakuada daytoy a ruar ti Agriingkayo! Talaga nga awanen ti sabali pay a makaliwliwa a kas iti daytoy!’—K. K.
‘Impanamnama kaniak ti artikulo a saanak nga inutil ken ipatpategnak pay ni Jehova.’—D. C.
“Ita laeng a nariknak nga adda dagiti makaawat iti sagsagabaek.”—C. H.
‘Makaliwliwa a maammuan a saan laeng a dakdakami ti agsagsagaba.’—C. A.
‘Maladingitanak ta diak maaramiden dagiti dati nga ar-aramidek. Idulinko daytoy nga artikulo iti abay ti kamak tapno ulit-ulitek a basaen no kasapulak ti pammaregta.’—K. B.
‘Agingga ita, diak ikankano ti ut-ot no maibturak, agtrabahoak agingga iti kabaelak, ket kalpasanna makusboakon. Kasla nasaysayaat ti pamay-anyo.’—M. C.
“Agtawenak iti 14, ket natakuatan nga adda sakitko a fibromyalgia idi agtawenak iti 12. Makasangitak a makaammo a maseknan ni Jehova kadakami. Pangngaasiyo ta itultuloyyo ti agsurat kadagiti makaparegta nga artikulo a kas iti daytoy!”—K.A.M.