Manipud Kadagiti Agbasbasa

Panagpatingga ti Kinapanglaw Pagyamanan unay iti Hunio 8, 1998 a serye ti Agriingkayo! nga “Asidegen nga Agpatingga ti Kinapanglaw.” Talaga a tinulongannak a maaddaan iti umiso a panangmatmat ken impaamirisna a reklamadoraak. Awan trabahok ken adda bassit urnongko. Pagarupek a napanglawak. Saan gayam! Impakita daytoy nga artikulo a nakarkaro pay ti kasasaad dagiti sabsabali ngem siak. Rumbeng nga agyamanak koman kadagiti adda kaniak​—taraon, kawes, kinasalun-at ken, kangrunaanna, ni Jehova. Padpadaanak unay ti panagpatingga ti kinapanglaw. Desididoak nga itultuloyko a sapulen ti Pagarian ni Jehova ken isardengkon ti kinareklamadorak.

C. W., New Zealand

Selibasia Sumagmamano a tawenen nga agbasbasaak kadagiti magasinyo. Diak anamongan ti mangidumduma a komentoyo maipapan kadagiti doktrina ti Iglesia Katolika iti artikulo a “Ti Panangmatmat ti Biblia: Maipaalagad Kadi ti Selibasia Kadagiti Kristiano a Ministro?” (Hunio 8, 1998) Awan ti “inkapilitan a selibasia” iti Iglesia Katolika! Ti laeng boluntario a selibasia ti maipaannurot iti maysa a propesion. Agul-ulbod ti siasinoman nga agkuna a naipapilit kenkuana ti selibasia.

R. G., Alemania

Patienmi nga adda napateg a nagdumaan ti sasao nga inkapilitan a selibasia ken ti ideya a dagiti tattao ket mapilit a mangalagad iti selibasia. No kas pagarigan ipaalagad ti maysa a korporasion ti pagannurotan maipapan iti panagkawkawes ken awatenna laeng dagidiay mayat a mangalagad iti dayta ngem isesantena dagidiay mangsalungasing iti dayta, mabalin ngarud a makuna a ti korporasion ket addaan iti “inkapilitan” a pagannurotan maipapan iti panagkawkawes. Iti umasping a pamay-an, nainkalintegan a kunaen nga adda “inkapilitan a selibasia” iti kinapadi dagiti Katoliko. Nupay kasta, impatuldo laeng ti artikulomi ti kinaawan ti Nainkasuratan a nakaibasaran ti panangipaannurot iti selibasia kadagiti Kristiano a ministro. (1 Timoteo 3:2) Imbes a babalawenna dagidiay inkeddengda ti agwaywayas aginggat’ tungpal biagda, impakita ti artikulo a daytoy ket “napaneknekan a makagunggona ken makapnek a wagas iti naespirituan a panagbiag para kadagiti dadduma.”​—ED.

Ti Pinilik iti Dua nga Amma Naammuak ti kinapudno ti Sao ti Dios manipud iti gayyem ken kaeskuelaak idi 14 ti tawenko. Ti panagadalko ket binusor dagiti nagannak kaniak, nangnangruna ni tatangko. Naimbag laengen ta saanna a pinaypayso ti pangtana a papanawennak idiay balay. Nagtultuloy ken nabautisaranak lima a tawenen ti napalabas. Kas iti kabsat iti artikulo (Hunio 8, 1998), sapay koma ta addanto aldaw a patien dagiti nagannak kaniak ti namnamak nga agbiagakto iti nalinteg a baro a lubong ni Jehova.

W. S. L., Brazil

Nakasangitak idi binasak ti artikulo. Desidido ni tatangko a mangbusor iti pammatik. Nupay makapagdikusionkami no dadduma, no madakamat ti tema ti Biblia wenno dagiti Saksi ni Jehova, maam-amakak iti panagungetna. Namin-adun a kinabilnak. Ngem ti artikulo pinaregtanak unay nga agtalinaed a sititibker, nupay mapasarak ti kasta a rigat.

I. H., Alemania

Naparegtaak unay gapu iti artikulo. Tangay dimmakkelak iti nasinasina ti relihionna a pamilia, maawatak ti emosional a panagsagaba ti baro a napilitan a mangaramid iti kasta a narigat a panagpili.

A. M., Italia

Fibromyalgia Pagyamanan unay iti artikulo a “Pannakaawat ken Panangibtur iti Fibromyalgia.” (Hunio 8, 1998) Innem a tawenen nga ib-ibturak ti fibromyalgia. Detalyado ken umiso ti artikulo. Naparegtaak met unay kadagiti teksto ti Biblia iti kahon.

N. M., Estados Unidos

Adu ti nangapresiar iti artikulo. Namnamaenmi a mangipablaakkami iti ad-adunto pay a komento iti masakbayan a ruar.​—ED.