Ti Panangmatmat ti Biblia
Maipaalagad Kadi ti Selibasia Kadagiti Kristiano a Ministro?
ITI direkta a pannao, ti selibasia ket ti di naasawaan a kasasaad. Nupay kasta, sigun iti The New Encyclopædia Britannica, ti termino “ket kadawyan a mausar mainaig iti indibidual nga akem ti selibe kas opisial, espesialista, wenno napeklan iti relihion.” Ti termino a “selibe” ti pangawag “kadagidiay a ti di naasawaan a kasasaadda ket resulta ti sagrado a kari wenno tignay a panangilusulos wenno ti panamati a daytat’ kaykayat ti tao gapu iti narelihiosuan a takder wenno kasasaad ti narelihiosuan a kinapasnekna.”
Adda idi tiempo nga impaalagad ti sumagmamano a prominente a relihion ti selibasia kadagiti ministroda. Ngem, awanen ti sabali a relihion iti Kakristianuan nga ad-adda a mabigbigbig ti selibasia no di ti Katolisismo. Ita, talaga nga adda supiat maipapan iti selibasia kadagiti Katoliko. Kinuna ti The Wilson Quarterly a “nadlaw ti adu a naisayangkat a panagadal a ti inkapilitan a selibasia, maysa a pagannurotan para kadagiti Katoliko a papadi nanipud idi maika-12 a siglo, ti ramut dagiti parikut iti simbaan maipapan iti panangawis ken panamagtalinaedda kadagiti papadi.” Sigun iti sosiologo a ni Richard A. Schoenherr, “dagiti makakombinsir a kinapudno iti historia ken ti panagbalbaliw ti kagimongan ket ti ibubusor iti prinsipio a dagiti laeng selibe a lallaki ti mapalubosan a sumrek iti Katoliko a kinapadi.” Ania ti panangmatmat ti Biblia iti selibasia?
Panagasawa Wenno Panagwaywayas?
Iti intero a historia, adun a napasnek a lallaki ken babbai, iti adu a nagduduma a relihion, ti nangikeddeng nga agbalinda a selibe. Apay? Iti adu a kasasaad, daytat’ gapu iti panamatida a dagiti nainlasagan, material a banag “ti sentro ti kinadakes.” Namataud daytoy iti pilosopia a ti naespirituan a kinadalus ket posible laeng babaen ti panangliklik iti amin a seksual nga aramid. Nupay kasta, saan a kastoy ti panangmatmat ti Biblia. Iti Biblia, ti panagasawa ket mamatmatan kas nadalus, nasantuan a sagut manipud iti Dios. Ti salaysay ti Genesis maipapan iti panamarsua silalawag a deskribirenna ti panagasawa kas “nasayaat” iti imatang ti Dios ken nabatad a saan a tubeng iti nadalus a naespirituan a pannakirelasion iti Dios.—Genesis 1:26-28, 31; 2:18, 22-24; kitaenyo met ti Proverbio 5:15-19.
Kasado ni apostol Pedro ken dagiti dadduma pay a naanamongan nga adipen ti Dios nga addaan iti rebbengen iti immuna a kongregasion Kristiano. (Mateo 8:14; Aramid 18:2; 21:8, 9; 1 Corinto 9:5) Agminar daytoy kadagiti instruksion ni apostol Pablo ken Timoteo maipapan iti pannakadutok dagiti manangaywan iti kongregasion, wenno “dagiti obispo.” Insuratna: “Ti obispo masapul nga awan pakababalawanna, asawa ti maymaysa a babai.” (Kuami dagiti italiko; 1 Timoteo 3:2, Revised Standard Version, Katoliko nga Edision) Usigenyo a dina pulos ipasimudaag a saan a maiparbeng a makiasawa ti “maysa nga obispo” iti aniaman a pamay-an. Basta impasimudaag ni Pablo a ti “maysa nga obispo” rumbeng a saan a poligamo; no kasado, masapul a maymaysa laeng ti asawana. Kinapudnona, kuna ti Cyclopedia of Biblical, Theological, and Ecclesiastical Literature, da McClintock ken Strong: “Awan paset iti B[aro a] T[ulag] a mabalin a maibuksilan a maiparit ti panagasawa dagiti klero babaen iti pangkaaduan a sagudayen dagiti Ebanghelio.”
Nupay nangato ti panangipategna iti panagasawa, sigurado a saan a kondenaren ti Biblia ti panagwaywayas no siwayawaya nga ikeddeng dayta. Isingasing ti Biblia dayta kas makaay-ayo a kurso para kadagiti dadduma. (1 Corinto 7:7, 8) Imbaga ni Jesu-Kristo a dadduma a lallaki ken babbai igagarada a pilien ti kurso ti panagwaywayas. (Mateo 19:12) Apay? Saan a gapu ta adda banag a nainkasigudan a narugit maipapan iti panagasawa a mangtubeng iti naespirituan nga irarang-ayda. Pilienda daytoy a kurso agsipud ta kayatda nga ipamaysa ti panagreggetda nga agaramid iti pagayatan ti Dios iti maawatanda a naganat a panawen.
Ti Mangiturong iti Inkapilitan a Selibasia
Ngem, nagbalbaliwen dagiti kasasaad kadagiti siglo kalpasan ti panawen ni Kristo. Kabayatan ti immuna a tallo a siglo ti Kadawyan a Panawentayo, “agpadpada nga adda dagiti kasado ken di kasado a ministro,” ilawlawag ni David Rice, maysa a Dominican nga immikkat a padi tapno mangasawa. Kalpasanna, nangrugin a naimpluensiaan dagiti agkunkuna a Kristiano iti dineskribir ti maysa a relihioso a mannurat kas “kombinasion ti Griego ken naimbibliaan a kapanunotan” a namataud iti tiritir a kapanunotan maipapan iti sekso ken panagasawa.
Siempre, dadduma, kaskasdi a kaykayatda ti agwaywayas gapu laeng “ta kayatda a magun-odan ti naan-anay a wayawaya tapno maipamaysada [ti bagida] iti trabaho ti pagarian ti Dios.” Dadduma, nupay kasta, ket ad-adda nga inimpluensiaan dagiti pinapagano a pilosopia a naisuro kadakuada. Kuna ti The New Encyclopædia Britannica: “Rimsua [iti makunkuna a Kristiano a simbaan] ti pammati a ti seksual a panagdenna ket mangtulaw ken di maitunos iti kinasanto kas ti kangrunaan a pakagutugotan iti pannakaalagad ti selibasia.”
Idi maikapat a siglo, kuna ni Rice, ti simbaan “imparitna ti seksual a pannakidenna ti kasado a padi iti rabii sakbay ti panag-Komunion.” Idi inrugi ti simbaan ti inaldaw a panag-Komunion, kaipapananna a rumbeng a permanente a liklikan dagiti papadi ti seksual a pannakidenna. Idi agangay, naan-anay a naiparit ti panagasawa dagiti papadi. Nagbalin ngarud nga inkapilitan ti selibasia iti asinoman nga agbalin a ministro iti simbaan.
Namakdaar ni apostol Pablo iti kasta nga umasping a kasasaad. Nagsurat: “Ti Espiritu silalawag a kinunana a kabayatan dagiti maud-udi a panawen addanto ti sumagmamano a sumiasi iti pammati ken kayatda nga ipangag dagiti mangallilaw nga espiritu ken doktrina a naggapu kadagiti sairo . . . Ibagadanto a maiparit ti pannakiasawa.”—1 Timoteo 4:1, 3, Jerusalem Bible.
“Ti kinasirib mapaneknekan a nalinteg babaen iti ar-aramidna,” kinuna ni Jesu-Kristo. (Mateo 11:19) Ti kinamaag ti isisiasi kadagiti pagalagadan ti Dios ket napaneknekanen babaen kadagiti aramid wenno ibungana. Pinagsaludsodan ni autor David Rice ti adu a papadi iti intero a lubong maipapan iti inkapilitan a selibasia. Kinuna ti dadduma a nakasaritana: “Agtalinaedka iti kinapadi, ikagumaam nga aramiden ti aniaman a naimbag, ken gundawayam a nainsiriban ti kinamasindadaan dagiti napasnek, agrayo a babbai a situtulok a makidenna kenka.”
Iti panangdakamatna iti Mateo 7:20, kuna ni Rice: “‘Babaen kadagiti bungada mailasinyonto ida,’ kinuna ni Jesus.” Kalpasanna kinomentuanna ti trahedia nga imbunga ti inkapilitan a selibasia: “Dagiti bunga ti inkapilitan a selibasia ket doble a panagbiag dagita a rinibu a lallaki, nadadael a panagbiag ti rinibu a babbai, rinibu nga ubbing nga inlaksid dagiti papadi nga ammada, agraman dagiti papadi nga agsagsagaba ti emosionda gapu iti daytoy a pasamak.”
Inted ti Dios a bendision ti nadayaw a panagasawa. Ti inkapilitan a selibasia ket nangibunga iti naespirituan a pannakadadael. Ti siwayawaya a panangikeddeng iti panagwaywayas, iti kasumbangirna, nupay saan a kangrunaan iti kinasanto wenno pannakaisalakan, ket napaneknekan a makagunggona ken makapnek a wagas iti naespirituan a panagbiag para kadagiti dadduma.—Mateo 19:12.
[Picture Credit Line iti panid 16]
Life