Ti Piliem a Panangagas
ITI librona maipapan iti alternatibo a panangagas, impaganetget ni Dr. Isadore Rosenfeld daytoy a punto: “Aniaman nga addang a mangpasalun-at wenno mangagas iti naiparna ti pannakapilina a grupo dagiti tattao a napanamnamaan nga ‘agkurri’ dayta ket mabalin nga agtungpal iti masansan nga iyiimbag ti kagudua iti intero a bilangda.”
Maaw-awagan daytoy a placebo effect, a kaipapananna a mabalin a nasamay uray ti pildoras nga asukar no patien ti maysa a tao a nasamay dayta. Ti placebo effect ket mabalin a mangep-ep kadagiti marikna a sintoma a pakairamanan ti ut-ot, panagrurusok, pannakabannog, panagulaw, panagdanag, ken panagleddaang. Ania ti ipalgak daytoy a kinapudno?
Ti maysa ket ipakitana nga iti kaaduan a kaso, napateg iti iyiimbag ti panagtalek iti aniaman a mayagas iti maysa a tao. Mabalin a nainsiriban met nga usigen no agasan ti maysa a kita ti panangagas ti pakaigapuan ti sakit ken saan laeng a dagiti sintoma. Maaramid daytoy babaen ti panangtingiting kadagiti epekto ti panangagas babaen ti makita a pamay-an, kas kadagiti panangeksamen ti laboratorio ken X ray.
Nupay kasta, ad-adu pay ti maaramidan ti maysa a tao no agpilpili iti maysa a kita ti panangagas.
Dagiti Napateg nga Addang nga Aramiden
Nainsiriban ti agsirarak sakbay nga agdesision. Agimtuodka. Ania dagiti manamnama a resulta? Ania dagiti pagimbaganna, pagdaksanna, ken manamnama a gastos ken kapaut ti panangagas? Kasaritam dagiti tattao a naagasanen wenno nagpaagasen iti kasta a pamay-an. Damagem no nakatulong dayta kadakuada. Ngem laglagipem a mabalin a makaallilaw ti ebidensia a naibasar iti sarsarita.
Mabalin a saan a maiparegta ti maysa a kita ti di gagangay a panangagas no gapu iti dayta ket itantan ti maysa ti panangagas a napaneknekanen a nagballigi, uray no limitado ti panagballigi ti gagangay a panangagas. Naidatag ti ebidensia a mabalin a tumaud ti peggad iti impadamag ti The New England Journal of Medicine. Dineskribir ti magasin a kimmaro ti kanser ti dua nga ubbing a pasiente a nagkitakit iti gagangay a panangagas bayat a nagusarda kadagiti alternatibo a pamuspusan. Natay ti maysa kadagitoy a pasiente.
Dagiti tattao nga addaan iti nakaro a sakit wenno mamagpeggad-biag a sakit ket nainsiriban a kanayon koma nga agalerto a mabalin a nalaka ida a puntiriaen dagiti manangallilaw a mangitandudo iti sinsinan a panangagas. Agannadka iti aniaman a produkto a mangikarkari a maagasanna ti nadumaduma a sakit. Ti nabiit pay a pagarigan inramanna ti baro a bitamina a naibaga a “nakatulongen a nangpukaw iti amin a sakit manipud kadagiti sakit a nainaig iti panaganges ken panaglaladut agingga kadagiti mamagpeggad-biag a sakit.” Naduktalan idi nausig ti “bitamina” a naapgad a danum la gayam dayta.
Di pagduaduaan a makagunggona ken makapasalun-at ti dadduma a kita ti alternatibo a panangagas. Nupay kasta, agbalinka a realistiko kadagiti namnamaem. Nainsiriban a kanayon a manganka iti nasustansia, maturogka iti umdas, agehersisioka iti kalkalainganna, ken agannadka iti piliem a panangagas.
Panangragpat iti Kalat
Nabatad nga awan ti natauan a panangagas a mamagpatingga iti sakit ken ti tungpalna nga ipapatay. Ngamin, natawidtayo amin dagitoy iti immuna nga amatayo a ni Adan. (Job 14:4; Salmo 51:5; Roma 5:12) Mabalin a makatulong dagiti aniaman a pamay-an ti panangagas ngem temporario laeng ti maaramidanda a mabalin a mangpaunday iti biag ken mamagbalin iti dayta nga ad-adda a makaay-ayo iti limitado a panawen. Nupay kasta, adda sierto a pangagas iti an-annayen, ket minilion ti nakasaraken iti dayta.
Dayta a pangagas ket impaay ti Namarsua kadatayo a ni Jehova a Dios, ti Naindaklan a Mangngagas. Babaen ti panamati kenkuana ken panangaprobetsar iti bileg ti makaabbong iti basol a daton a pangsubbot ti Anakna a ni Jesu-Kristo, masagrapmonto ti naan-anay a salun-at ken biag nga agnanayon iti awanan sakit a lubong! (Mateo 20:28) Ikari ti Biblia nga iti dayta a baro a lubong, “awanto ti agtataeng nga agkuna: ‘Masakitak.’”—Isaias 33:24, NW.
[Blurb iti panid 12]
Minilion ti nakasaraken iti kakaisuna a sierto a namnama iti naan-anay a salun-at