Manipud Kadagiti Agbasbasa
Baldado a Manangaskasaba Diak malapdan ti panagarubos dagiti luak idi nabasak ti salaysay ni Konstantin Morozov iti artikulo a “Naragsak a Panangmatmat iti Laksid Dagiti An-annayen.” (Pebrero 22, 2000) Agsolsoloak nga ina a mangpadpadakkel iti dua nga annak. Saan a nalaka, ket no dadduma, kasla saanto a pulos nga agpatingga dagiti problemak. Ngem kaskasdi nga awan serbi dagitoy no idilig iti dadaeran ni Konstantin!
I., Russia
Maysaak nga amin-tiempo nga ebanghelisador. Kumapkapuy ti retina ti matak isu a marigatanak unay nga agbasa. Nagagetak idi nga agbasa, isu a pasaray maupay ken maldaangak itan. No panunotek ni Konstantin, mariknak a di rumbeng nga agreklamoak. Naparmekna dagiti nagdadakkel a tubeng ken agserserbi kas amin-tiempo nga ebanghelisador. Anian a pammabileg ti ipapaay ni Jehova!
W. W., India
Iti edad a 16, nagbalinak a paralitiko manipud siket agingga kadagiti sakak. Kas ken Konstantin, inaldaw a mapaspasarak ti rigat. Ngem impakita ti artikulo a kabaelan ti maysa a baldado a tao ti maaddaan iti paset iti kagimongan ken makipaset iti panagdaydayaw iti Dios. Uray no adda diperensia ti panagdengngegko ket diak unay makakita, masansan a mangasabaak a sisiak iti lansangan bayat a nakatugawak iti bangkito ken nakasadag iti pader. Kablaawak ni Konstantin gapu iti regta ken debosionna.
D. F., Côte d’Ivoire
Panangtagabo iti Kaaldawantayo Iti makapikapik a serye a “Panangtagabo iti Kaaldawantayo—Asidegen nga Agpatingga!” (Marso 8, 2000), adda a nailanad: “Awan ti makapagbalin a pudno a Kristiano ken maigiddato iti dayta siraranggas a manggundaway ken mangirurumen iti siasinoman kadagiti padana a tao.” Pagpatinggaan ti rumbeng a di pannakipaset ti maysa a Kristiano iti daytoy a nagdakes nga aramid? Kadagiti Makinlaud a pagilian, dandani imposible ti agbirok kadagiti produkto a saan a naaramid iti sidong dagiti mapagduaduaan a kasasaad.
K. H., Estados Unidos
Salsalaysayen ti artikulo ti direkta a pananggundaway dagiti agar-aramid iti produkto ken dadduma pay kadagiti padada a tattao. Saanmi kayat nga ipatuldo nga obligado ti maysa a Kristiano a mangbusbos iti adu a panawen nga agsirarak iti pannakapataud ti tunggal produkto a gatangenna. Ngem no naammuan a ti maysa a banag ket gapuanan ti panagbannog dagiti tagabo, rumbeng nga ikeddeng ti maysa a Kristiano no gatangenna dayta wenno saan. Iti daytoy a kas met laeng iti amin a banag, kayat ti maysa a Kristiano a taginayonen ti naimbag a konsiensia iti imatang ti Dios. (1 Pedro 3:16)—ED.
Balasitangak a 16 ti tawenna, ket natignayak iti artikuloyo. Am-ammok ti sumagmamano a babbalasitang nga agsagsagaba iti panangtagabo iti kaaldawantayo. Nadagsen ti trabahoda kadagiti pamilia a pagpapaayanda. Ngem dida ida a pageskuelaen—wenno ipateg. Naliwliwaak unay a nakabasa iti Biblia nga asidegen a wayawayaan ni Jehova dagiti mairurrurumen.
A. O., Burkina Faso
Pammati Binasak ita nga aldaw ti artikulo a “Ti Panangmatmat ti Biblia: Pudno a Pammati—Ania Dayta?” (Marso 8, 2000) Lohikal ti panangilawlawagna a ti pudno a pammati ket saan a kredulidad. Napno ti adu a magasin ita kadagiti anunsio ken manmano dagiti makaisuro wenno makapabileg nga artikuloda. Masapul a tagipatgenmi dagiti ipabpablaakyo para kadakami.
E. S., Italia
Video Maipapan ken Noe Kayatko nga iyebkas ti panangapresiarko iti artikulo a “Noah—He Walked With God—No Kasano a Naaramid ti Video.” (Marso 8, 2000) Sakbay pay a magna ti dua ket kagudua ti tawenna a baromi, buybuyaennan ti video. Ulit-ulitenna a buyaen ket kayatna nga i-rewind-ko ti sumagmamano a paset tapno mabuyana manen dagitoy. Nagsayaat ketdin ti maaddaan kadagiti alikamen a mangitukit iti panagayat ken Jehova kadagiti annakmi!
M.V.G., Estados Unidos