Manipud Kadagiti Agbasbasa

Cocoon Ti artikulo a “No Bulsek ti Ayat” (Marso 22, 2000) dakamatenna ti maysa a simotsimot a rimmuar manipud iti supotna. Nupay kasta, dagiti kulibangbang laeng ti agaramid iti supot wenno “chrysalis” iti Ingles. Cocoon ti aramiden dagiti simotsimot.

V.L., Estados Unidos

Sigun iti “Webster’s Ninth New Collegiate Dictionary,” mabalin nga agaplikar iti pangkaaduan ti termino a “chrysalis” a ti kaipapananna ket ‘pupa wenno supot ti maysa nga insekto.’ Wen, mas gagangay a mausar ti sao a “chrysalis” no kulibangbang ti pagsasaritaan. Nupay kasta, us-usaren ti dadduma a libro dayta a termino kadagiti simotsimot.​—ED.

Vasa Kayatko nga iyebkas ti panangapresiarko gapu iti artikulo a “Ti Vasa​—Nagbalin a Makaallukoy ti Dati a Nadidigra.” (Abril 8, 2000) Kas historiador a nakapagsuraten iti daytoy a banag, mapasingkedak a nagsayaat unay ti pannakasukimat ti artikulo. Nagsayaat ti natimbeng a panangilawlawagna kadagiti pasamak.

T.W., Alemania

Panangabak Dagiti Kaso Nabiit pay a naggapuak iti korte tapno ilaban ti panangaywanko kadagiti annakko, ket ti dati a misterko pinagbalinna nga isyu ti narelihiosuan a pammatik. Nagrigat. Nagsangitak idi nabasak ti artikulo a “Ti Bakal Saanyo a Kukua, no Di ket Kukua ti Dios.” (Abril 22, 2000)

D. B., Estados Unidos

Kalpasan a nabasak ti artikulo, impabasak dayta kadagiti abogado iti lugarmi. Awan a pulos ti nagkitakit. Dadduma ti nangawis pay ketdi kaniak nga agkape kadagiti opisinada tapno ad-adu pay ti mapagsasaritaanmi. Adu ti nagkiddaw iti kanayonan a kopia para iti kakaduada nga abogado. Nasdaaw amin nga abogado idi impakitak kadakuada a nangabak ni Hayden Covington iti 36 kadagiti 45 a kaso a naisaklang iti Korte Suprema ti E.U.

C. M., Estados Unidos

Tin-edyer nga Amma Nagsuratak tapno iyebkas ti kasta unay a panangapresiarko gapu iti artikulo nga “Agimtuod Dagiti Agtutubo . . . Panagbalin nga Ama​—Pagbalinennaka Kadi a Malalaki?” (Abril 22, 2000) Agtawenak iti 28 ken awan pay asawak, ket agserserbiak kas special pioneer, wenno amin-tiempo a managebanghelio. Iti daytoy a paset ti Makinlaud nga Africa, maibilang a saan a sibilisado ken baog ti siasinoman a kataebko nga awanan asawa wenno nobia. Masansan nga uyawen ken umsiendak gapu iti daytoy. Nupay kasta, pinabileg ti artikuloyo ti determinasionko nga agtalinaed a nadalus.

A. E., Ghana

Napukaw ti kinabirhenko idi tin-edyerak ket nakiabigak iti agsasabali a lallaki. Kada makiabigak, mariknak idi a nakarugrugitak, ken masansan a magunggundawayan. Gapu itoy, nagleddaangak. Tinulongannak ni Jehova a nangdalus iti biagko, ket naragsakak itan ta naikallaysaak iti maysa a nagsayaat a lalaki. Ngem nasayaat ta mangipablaakkayo kadagiti kasta nga artikulo tapno matulongan dagiti agtutubo a lallaki a mangamiris a ti aramidenda ket mabalin a makapasakit iti maysa a babai agingga iti tungpal biagna.

F.A.S., Alemania

Nagutugotak a nagsurat tapno agyaman ta impabaklayyo uray ti kagudua man laeng a responsabilidad dagiti di naikasar nga inna kadagiti rumbeng a makin-responsabilidad​—dagiti amma! Nagadu ti mamati a tangay babbai laeng ti agsikog, gagangay nga isuda laeng ti agproblema ket di kasapulan nga ibaklay dagiti lallaki ti aniaman a responsabilidad. Itultuloyyo nga ipaamiris kadagiti lallaki ti kayat ti Dios a maiparbeng a panangtratoda iti babbai.

J.M.O., Italia