Ti Panangmatmat ti Biblia
Maipaay Kadi ti Siensia ti Agnanayon a Biag?
ITI napalabas nga adun a tawen, kasla minamaag ti kasta a saludsod. Ngem ita, us-usigenen a naimbag ti dadduma a tattao dayta a namnama. Nabaelanen dagiti sientista a madoble ti kapaut ti biag dagiti fruit fly ken igges babaen ti panangusarda kadagiti pamay-an a patien ti dadduma a nalabit mausarto kadagiti tattao.
Impakita ti panagsirarak a matay dagiti normal a selula ti tao ken adda pagpatinggaan ti kasansan ti pannakabingayda. Kalpasan dayta, agsardengen ti pannakabingayda. Daytat’ maysa a proseso a naidilig iti relo iti bagi a mangkontrol no kaano a lumakay, bumaket, ken matay dagiti tattao. Madama a balbaliwan dagiti sientista daytoy a relo.
Sigun iti maysa a nalatak a teoria, ti mangilawlawag no apay a mapasamak ti panaglakay ken panagbaket ket adda iti pungto ti tunggal linabag ti DNA, iti rehion a maawagan telomere. Dagiti telomere ket nayarig kadagiti plastik a pungto ti kurdon ti sapatos, a nadisenio a mangprotektar iti panagsisina dagiti linabag ti kurdon. Naobserbaran dagiti sientista a kada agbingay ti sumagmamano a selula, umababa dagiti telomere a kas iti mapupuoran a fuse. Inton agangay, kasla umababa dagiti telomere agingga nga agsardeng ti panagbingay ti selula. Ngem no adda maysa nga enzyme, saan nga umababa dagiti telomere. Isu a sigun iti teoria, daytoy ti mabalin a mangted iti gundaway kadagiti selula nga agtultuloy nga agbingay iti agnanayon. Kinuna ti opisial ti maysa a kompania a nakipaset iti daytoy a trabaho: “Ita laeng a mabalinmi a panunoten ti di ipapatay ti tao.” Ngem saan nga umanamong ti amin a sientista.
No Kasano a Dimteng ti Ipapatay
Siempre, rinibribu a tawenen a patien dagidiay mamati iti Biblia nga agbiagto nga agnanayon dagiti tattao. Saan a dagiti tattao a sientista ti pagtalkanda no di ket ti Kangrunaan a Sientista a nangparsua iti amin a sibibiag a banag a ni Jehova a Dios.—Salmo 104:24, 25.
Ipakita ti Biblia a saan a paset iti panggep ti Namarsua a matay ti tao. Naparsua ti immuna a natauan a pagassawaan a kaladladawan ti Dios ken naisaadda iti paraiso a minuyongan. Perpektoda idi ken awan depekto ti panunot wenno bagida. Gapu iti dayta, naaddaanda iti namnama nga agbiag nga agnanayon ditoy daga. Dayta ti kayat ti Dios para kadakuada. Imbilinna nga aganakda ken in-inut a pagbalinenda ti intero a daga kas Paraiso.—Genesis 1:27, 28; 2:8, 9, 15.
Kas makita iti Genesis kapitulo 3, nupay ammo ni Adan a ti dusa ket ipapatay, inggagarana ti immalsa iti Dios. Kanayonanna, gapu iti isusukirna, inyegna ti basol ken ipapatay kadagiti di pay naipasngay idi nga annakna. Kastoy ti inlawlawag ni apostol Pablo: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Iti sabali a pannao, agsipud ta nagbasol ni Adan, saanen a perpekto ti bagina. In-inut a limmakay agingga a natay. Natawid ti annakna dayta a depekto.
Ti ngarud ipapatay ti tao ti imbunga ti iyaalsa ni Adan ken ti panangsentensia ti Dios idi agangay. Saanen a mawaswas ti tattao dayta a sentensia. Nupay adun nga irarang-ay iti medisina ti naaramidan ti siensia, pudno pay laeng ti imbaga ni Moises a naisurat 3,500 a tawenen ti napalabas: “Kadakuada met laeng pitopulo a tawen dagiti aldaw ti tawtawenmi; ket no gapu iti naisangsangayan a kinabileg walopuloda a tawen, kaskasdi a ti panagreggetda agbanag laeng iti riribuk ken makapasakit a bambanag; ta masapul a sidadaras a lumabas dayta, ket tumayabkamin.”—Salmo 90:10, NW.
Ti Probision ni Jehova Agpaay iti Agnanayon a Biag
Makaparagsak ta adda namnama! Uray no matay amin a tattao iti agdama, saan a panggep ni Jehova nga agtultuloy daytoy a kasasaad iti agnanayon. Nupay maikari da Adan ken Eva a matay, ammo ti Dios nga adunto kadagiti di pay idi naipasngay nga annakna ti mangapresiar iti naayat a panangaywanna. Nangaramid iti probision tapno agbiag nga agnanayon ditoy daga dagita a tattao. Insurat ti salmista: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29, NW) Ngem kasano a maibanag daytoy?
Maibanag daytoy saan a gapu iti pannakatakuat ti tattao kadagiti misterio ti DNA. Imbes ketdi, sagut ni Jehova ti agnanayon a biag kadagidiay mangwatwat iti pammati kenkuana. Tangay naamirisna a rumbeng a maalaw ti annak da Adan ken Eva, nangaramid iti pamuspusan tapno magun-odan dagitoy ti agnanayon a biag—ti subbot a daton ni Jesu-Kristo. Dinakamat ni Jesus daytoy a probision idi kinunana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”—Juan 3:16.
Kas ken Adan, perpekto idi a tao ni Jesus. Saan a kas ken Adan, naan-anay a nagtulnog ni Jesus iti Dios. Gapuna, naidaton ni Jesus ti perpekto a natauan a biagna a pangsubbot iti basol ni Adan. Babaen daytoy naayat nga aramid, a maitunos iti pagtimbangan ti hustisia, mawayawayaan ti annak ni Adan iti pannakakondenarda ken patay. Gapuna, amin a mangwatwat iti pammati ken Jesus ti umawatto iti sagut ti Dios nga agnanayon a biag.—Roma 5:18, 19; 1 Timoteo 2:5, 6.
Saanen a kasapulan ti subbot no kabaelan ti tattao a parmeken ti kinaimperpekto ken maipaayda ti agnanayon a biag iti bagbagida. Kastoy ti nainsiriban a pammagbaga ti Biblia: “Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan. Ti espirituna pumanaw, isu agsubli iti dagana; iti dayta nga aldaw mapukaw dagiti panunotna. Naragsak daydiay a ti Dios ni Jacob ti katulonganna, a ti namnamana adda ken Jehova a Diosna, ti Nangaramid iti langit ken daga, iti baybay, ken iti isuamin nga adda kadakuada, daydiay mangsalimetmet iti kinapudno agingga iti tiempo a di nakedngan.”—Salmo 146:3-6, NW.
Ni Jehova ti makaipaay iti agnanayon a biag, saan a ti nasientipikuan a panagsirarak. Aniaman ti pinanggep ti Dios nga aramiden, aramidenna ken maibanagnanto. “Iti Dios awan ti deklarasion a saanto a mabalin.”—Lucas 1:37.
[Picture Credit Line iti panid 18]
© Charles Orrico/SuperStock, Inc.