Manipud Kadagiti Agbasbasa
Maikaduapulo a Siglo Kablaawankayo iti makaisuro ken mangedukar a trabahoyo. Kas koresponsal iti kasasaad ti politika ken militar, kanayon nga adda makunak maipapan kadagiti mabasak nga artikulo. Ngem nagsayaat unay ti serye a “Ti Maika-20 a Siglo—Tawtawen ti Dakkel a Panagbalbaliw.” (Disiembre 8, 1999) Nagsayaat ti panangipakita ti ladawan iti akkub kadagiti kapatgan a pasamak iti daytoy a siglo.
A. P., Angola
Melatonin ken Panagleddaang Naawis ti atensionko iti damag iti “Panangmatmat iti Lubong” nga “Atiddog a Rabii.” (Marso 8, 2000) Agtartrabahoak iti maysa nga institute a madama nga agsirsirarak iti melatonin, ket nabatad a di umiso ti impadamagyo. No ti melatonin ket nainaig iti panagleddaang gapu iti paniempo, ti kasta unay a kinaadu, saan a ti panagkurang iti daytoy a hormone ti makagapu.
X. Y., Francia
Nabatad itan a saan a kompirmado ti eksakto a pannakainaig ti melatonin iti panagleddaang gapu iti paniempo—no adda man. Nabiit pay nga imparipirip dagiti managsirarak a mabalin a ti isyu ket saan a ti kaadu wenno ti panagkurang ti melatonin, no di ket no kasano a ti kurang a lawag nalabit singaenna ti siklo ti pannakapataud ti melatonin. Nabatad a kasapulan ti ad-adu pay a panagsirarak sakbay a maaramid ti aniaman a di mabalusingsing a konklusion.—ED.
Kamali iti Arte? Addaak iti ospital nga agbasbasa iti Enero 8, 2000 a ruar nga addaan serye ti akkubna a “Panangagas ken Panagopera a Di Mausar ti Dara—Umad-adu ti Agkalikagum,” idi immay ti maysa a nataengan a cardiologist ken maysa a grupo dagiti estudiante. Imbagana a baliktad ti strip ti EKG (electrocardiogram) iti akkub.
J. T., England
Artistiko ti pamay-an ti pannakausar ti strip. Naipakita dayta iti sumagmamano a trabahador a mangay-aywan iti salun-at sakbay a naipablaak; nupay kasta, agpapada ti kinuna ti dadduma pay a mangngagas a nakakita idin iti dayta a di umiso ti pannakai-drawing-na. Dispensarendakami iti dayta a kamali.—ED.
Panangisardeng iti Panagsigarilio Itay nabiit pay, dati a mannigarilio ken adiktoak iti marihuana, arak, ken cocaine. Namin-adun a pinadasko nga isardeng ngem napaayak. Idi laeng rinugiak ti nakipagadal iti maysa kadagiti Saksi ni Jehova a nariknakon nga adda serserbik. Gapu iti tulong ni Jehova, pulos a diak nagdrogan wenno nagsigarilio nanipud idi Enero. Nagrigat nga ibturan dagiti sintoma ti panangisardeng iti bisiok. Nanipud idi Enero, diak unay makaturog. Ti Marso 22, 2000 a ruar nga addaan serye a “No Kasano a Maisardengmo ti Agsigarilio” ti nakatulong kaniak a nangamiris a ti diak unay pannakaturog ket maysa a sintoma ti panangisardengko iti bisiok ken saanak nga agmauyong! Pagyamanan unay.
D. M., Estados Unidos
Idi binasak ti panangilawlawagyo maipapan ti panangisardeng iti panagsigarilio, naipalagip kaniak ti napasarak. Idi damo, sangkapanunotko ti agsigarilio. In-inut nga adu nga aldaw, kalpasanna lawlawas, ken bulbulan ti napalabas a diak napanunoten ti agsigarilio. Talaga a tinulongannak ni Jehova kalpasan nga inkarik iti bagik a pulos a diak agsigarilion. Duapulo a tawenen ti napalabas, ket kinapudnona, pulos a diak nagsigarilion.
D. A., Italia
Dagiti Simotsimot Pagyamanan unay iti panangipablaakyo iti artikulo a “No Bulsek ti Ayat,” maipapan iti simotsimot. (Marso 22, 2000) Nakakitaak iti kasta idiay arubayak. Idi adda maikadua nga immay, rinetratok. Naipabuya dayta iti maysa a lokal a TV. Apresiarek unay ti bannog ken panagsirarak nga impakatyo tapno maipaayyo dagiti magasin.
I. K., Estados Unidos
El Niño Kayatko ti agyaman kadakayo iti makaisuro nga artikulo nga “Ania ti El Niño?” (March 22, 2000) Kinaagpaysuanna, nangngegko a pagsasaritaan ti amin ti El Niño idi 1998, ket awan ti ammok maipapan iti dayta. Bueno, naawatko ti panangilawlawag iti mismo a ridawko! Ababa ti artikuloyo ngem makaisuro unay.
U. N., Estados Unidos