Carbon Monoxide—Ti Di Madmadlaw a Mammapatay
BABAEN TI MANNURAT TI AGRIINGKAYO! IDIAY BRITANIA
KADA tawen agarup 50 a tattao idiay Britania ti matay a masabidongan iti carbon monoxide gapu iti addaan depekto nga appliance a pagpapudot iti uneg ti balay. “Ti carbon monoxide ti maikadua iti asbestos a gagangay unay a pakaigapuan ti pannakasabidong iti pagtrabahuan ken iti pagtaengan,” ipadamag ti London Hazards Centre Trust. Ania ti carbon monoxide?
Ti carbon monoxide ket maysa a gas a mapataud no ti karbon wenno dadduma a fossil fuel, nangnangruna ti gas, ket saan nga uramen a naimbag dagiti makina ti lugan wenno appliance a pagpapudot. Awan ti kolor, angot, ken ramanna. Gapuna kasano a makapatay?
Dagiti nalabaga a selula ti dara awitenda ti napateg nga oksihena a mapan kadagiti tisyu ti bagi. Makasabidong ti carbon monoxide gapu ta dayta ti ad-adda nga agsepen ti nalabaga a selula ti dara ngem iti oksihena. Mapasamak ti pannakasabidong iti carbon monoxide no makurangan iti oksihena ti bagi. Ti napaut a pannakalang-ab iti saggabassit a carbon monoxide mabalin nga agbanag iti permanente a pannakadadael ti utek. Ti panagsakit ti ulo, panagtuglep, panagkakapsut, pannakaulaw, panagrurusok, ken pannakatalimudaw—ken no nakaro, nakapuy a pulso, coma, ken di pannakaanges ti karaman dagiti sintoma. No kellaat a masabidongan ti maysa a tao iti carbon monoxide, nasken a maikkan a dagus iti oksihena ken tulongan a makaanges sakbay a maawanan ti puot—tangay matay no kurang ti oksihena a mapan iti utek.
Ania ti maaramidan tapno maliklikan dagiti peggad ti carbon monoxide? Regular nga ipasukimat ken ipakabit iti eksperto dagiti amin nga appliance. No lumabagan ti segged ti paglutuan imbes nga asul, pakdaar daytan a di nasayaat ti pannakauram ti gas ken posible nga adda iruarna a carbon monoxide. Addan dagiti magatang a nadumaduma nga alarma para iti carbon monoxide iti pagtaengan. Dika pulos nga agbalin nga aleng-aleng no agus-usarka kadagiti appliance a mangiruar iti carbon monoxide.
[Ladawan iti panid 31]
Saan a nasayaat ti seggedna
[Ladawan iti panid 31]
Normal a segged
[Ladawan iti panid 31]
Addan dagiti magatang a nadumaduma nga alarma para iti carbon monoxide iti pagtaengan