Dagiti Nasursuro Manipud iti Panagsao Met Laengen ni Loida
ADU kadagiti agbasbasa iti daytoy a magasin ti natignay nga agsurat gapu iti artikulo a “Makapagsao Met Laengen ni Loida.” (Mayo 8, 2000) Adu a puso ti natukay unay daytoy pudno a pakasaritaan ti agtutubo a babai nga addaan iti cerebral palsy a nangrugi laeng nga agsao idi agtawen iti 18. Adtoy ti sumagmamano kadagiti naawatmi a komento.
“Diak malapdan ti panagsangitko idi nabasak dagiti imbaga ni Loida iti pamiliana idi makapagsao met laengen. Ikagumaak a tuladen ti kinatured ken panagibturna agpapan pay iti narigat a kasasaadna.”—K. G.
“Nakasalsalun-atak, ngem no dadduma, agreklamoak maipapan iti nadumaduma a banag. Kalpasan a nabasak ti maipapan ken Loida, nagkararagak ken Jehova ket kiniddawko a pakawanennak gapu iti diak panangapresiar kadagiti adda kaniak.”—R. H.
“Idi 1980, naipasngay ti adiek a lalaki nga aduan iti sakit, agraman iti cerebral palsy, isu a di makasao. Daytoy a kapadasan ti nangparegta iti pamiliak a di pulos a sumuko, uray no kasano karigat dagiti kasasaad.”—L. W.
“Maysaak a balasitang nga agtawen iti 14, ket sangkapanunotko idi a sisiak ti addaan kadagiti problema. Kayatko a makita a sumalun-atton ni Loida tapno makasaritak idiay Paraiso. Isu ti maysa kadagiti inlistak a tattao a kayatko a maam-ammo ken magayyem iti agnanayon.”—R. K.
“Daytoy nga artikulo natukayna ti pusok. Ib-ibturak ti amin a klase ti mental ken emosional a sakit. No basaek ti kasta unay a panangpadpadaan ni Loida iti baro a lubong ti Dios, lallalo a tarigagayak nga addaakto met koma sadiay.”—P. B.
“Addaanak met iti cerebral palsy, ngem saanak a marigatan nga agsao. Daytoy nga artikulo ti nangipaamiris kaniak a makita ni Jehova ti amin a mapaspasarantayo ken ipatpategna ti tunggal maysa kadatayo gapu iti aniaman a maaramidantayo nga agserbi kenkuana.”—D. J.
“Ti kangrunaan a nagustuak ket ti pannakabasak no kasano nga indedikar ni Loida ti bagina ken Jehova idi ubing pay laeng ken no kasano ti pannakipasetna iti trabaho a panangasaba. Dakami a nasalsalun-at, adu ti masursuromi ken Loida.”—A. R.
“Ti kapadasan ni Loida ti nangtignay kaniak nga ad-adda a maseknan iti sabsabali ken agpanunot iti maaramidak kadakuada. Diak kayat a laglag-anen ti pribilehiok a makisarita iti sabsabali maipapan ken Jehova a Dios.”—B. M.
“Naisangsangayan unay nga artikulo! Adda am-ammomi nga agassawa iti kabangibangmi a kongregasion a ti balasangda ket addaan iti cerebral palsy. Patulodak ida ita iti card tapno maammuanda a talaga nga apresiarek ida ken ti amin nga ar-aramidenda para iti balasangda.”—T. G.
“No maldaangak, agbalinak a managimbubukodan no dadduma, ngem naisangsangayan ti interes ni Loida iti sabsabali. Kasta ti ikagkagumaak nga aramiden. Masapul met nga ad-adda nga ikagumaak a tuladen ni Loida ket agkararagak ken Jehova no mariknak a diak maibturanen ti leddaangko.”—N. D.
“Agtawenak iti 14, ken agangkit. No dadduma, pampanunotek a ti sakitko ti kakaruan iti amin a sakit, ngem idi nabasak daytoy a kapadasan, naammuak a saan gayam a kasta. Pagyamanan iti daytoy nakalkaldaang ngem makaparagsak met a kapadasan a mangted kadakami iti namnama.”—M. C.