Nagbalin a Naragsak a Biag ti In-inut nga Ipapatay

KAS INSALAYSAY NI DIAMÁNTI DATSERIS

‘Nakednganen ti petsa ti ipapatayko.’ Sangkapanunotko idi dayta bayat a nakaiddaak iti ospital a mayal-alisonan iti adu a yunit ti dara. Iti nasurok a 20 a tawen, imbagada kaniak a dayta ti kakaisuna a pamuspusan tapno agtultuloyak nga agbiag​—no agpayso man nga agbiag ti kaipapanan daytoy.

DI NAGBAYAG kalpasan a naipasngayak idi 1969 idiay Ierápetra, Creta, maysa nga isla ditoy Grecia, adda makapadanag a naipadamag kadagiti dadakkelko. Imbaga dagiti doktor kadakuada nga addaanak iti beta-thalassemia, wenno Cooley’s anemia. Ti beta-thalassemia major ket matawid a nakaro a sakit iti dara, a masansan a rumsua kadagiti taga Grecia, Italia, Makintengnga a Daya, Abagatan nga Asia, wenno dagiti Africano ti kapuonanda.

Kas inlawlawag dagiti doktor iti dadakkelko, no kastoy ti kasasaad ti maysa a tao, saan nga agpataud dagiti nalabaga a selula ti bagi iti umdas a hemoglobin, ti protina a mangipan iti oksihena kadagiti selula. Kas resultana, kurang ti oksihena a magun-odan dagiti selulak. Apagbiit laeng nga agtalinaed dagiti nalabaga a selula iti darak agsipud ta dadaelen ken ikkaten ida ti dalemko ken ti ballaibik. Dagitoy a lalaem ti mangdadael kadagiti abnormal wenno nadadaelen a nalabaga a selula.

Naibaga kadagiti dadakkelko a ti regular a panangyalison iti dara ken ti panangikkat iti naurnong nga iron ti kakaisuna a pangagas iti thalassemia. Ngem kas inlawlawag dagiti doktor, ti panangagas babaen ti panangyalison ket mapakuyogan iti kanayon a pannakaurnong ti iron iti puso ken dalem, ket makapapatay daytoy. Ti panangyalison​—panangagas a manglapped iti ipapatay dagiti pasiente iti umuna a sangapulo a tawen ti biagda​—ket gagangay a mangipaay iti kangrunaan nga elemento ti pannakasabidong gapu iti iron a makapapatay unay inton agangay. Dagiti kanayon a mayalisonan a pasiente nga addaan iti thalassemia a kas kaniak ket masansan a matay gapu iti sakit iti puso sakbay nga agtawenda iti 30.

Panagbiag a “Nakednganen ti Petsa ti Ipapatayko”

Nanipud idi ubingak, kanayon a kasla asidegen ti ipapatayko. Saan nga umdas ti sasao a pangdeskribir no kasano karigat ti agbiag nga addaan iti kasta a nalidem a masakbayan. Awan idi ti planok iti masakbayan ken awan ti arapaapko a gagangay a biag ti adulto. Para kaniak, ti sakitko a thalassemia ket kasla naorasan a bomba nga asidegen a bumtak.

Nagbalin a nakaan-annad ti dadakkelko gapu ta maseknanda iti salun-atko. Napadakkelak a kanayon nga adda dagiti “maiparit” ken dadduma pay a bilin: “Saanka nga agtaray!” “Dika palaluan!” “Agan-annadka!”

Ti kasasaadko ti makagapu a nagbalin a relihiosa unay ni nanangko a miembro ti Greek Orthodox. Sipapasnek a nagpatulong kadagiti sasanto ti relihionna. Tapno umimbagak, inkuyognak kadagiti nagadayo a monasterio nga agdinamag a mangpaimbag babaen ti pammati ken inikkannak iti nadumaduma nga anib ken anting-anting. Adu ti nagastomi kadagita nga ahensia​—ngem awan ti nagmamaayanna.

Patiek ken ay-ayatek ti Dios, nupay diak ammo no kasanok a dayawen. No maup-upayak, buyogen lulua nga ikararagko idi: “Diosko, no agpayso nga addaka ken ay-ayatennak, pangngaasim ta tulongannak.”

Desperado a Panagsapul iti Liwliwa

Bayat a dimmakkelak, nagbiit a kimmapuy ti bagik, nangnangruna ta sobra ti iron iti darak. Kas paset ti pannakaagasko, nagusarak iti aparato a mangkissay iti iron iti darak. Kada rabii, masapul a mangitudokak iti dagum iti kudil ti buksitko tapno agpatnag a maipatedted ti iron chelator iti bagik. Kada rabii, inibturak ti isu met la nga isu a makatuok a seremonia. Masansan a kayatkon ti matay kabayatan dagiti rabii a diak makaturog. Panagriknak ket di inkankano ti Dios ti panagpakpakaasik a tulongannak.

Idi agtawenak iti 16, nangrugin a nakibarkadaak iti grupo dagiti agtutubo a pagay-ayatda ti musika a heavy metal. Gapu iti desperado a panagsapulko iti liwliwa, natakuatak a medio makaliwliwa ti musika a mangitantandudo iti kinaulpit, nakaro a kinaranggas, ken Satanismo. Total, tangay bin-ig a dakes ti adda iti aglawlawko, immanamongak iti kapanunotan a ti uniberso ket konkontrolen ti maysa a dakes a dakdakkel ti pannakabalinna. Ngem di nagbayag, bimmatad dagiti pagdaksan ti panagdroga ken Satanismo. Kanayon nga aglemlemmeng dagiti barkadak kadagiti polis.

Adu ti madlaw a marka iti bagik gapu ta kanayon a mayalisonanak iti dara. Gapu iti sobra nga iron, ngimmisit ti aglawlaw dagiti matak ken dimmuyaw ti kudilko. Saanak a pimmintas iti kawesko​—ti nangisit a kawes ken lalat a jacket-ko a naarkosan kadagiti maitudok a dekorasion ken rurog, a pakabigbigan dagiti barkadak. Naimbag laengen ta saanak a pulos a nagdroga.

Panagriknak ket siniluannak ni Satanas bayat nga intultuloyko ti dimngeg iti musika a heavy metal agraman ti panangipaganetgetna iti ipapatay, droga, demonio, espiritismo, ken dara. Maldaangak no rabii, ken masansan nga agsangitak. Iti daydi a kalilidayan a paset ti biagko a nasirayanak iti namnama.

Nagbalbaliw ti Biagko

Maysa nga aldaw, idi agtawenak iti 20, adda gayyemko a nangted kaniak iti libro a naalana kadagiti Saksi ni Jehova. Napauluan Ti Biblia​—Saot’ Dios Wenno iti Tao?a Ti gayyemko ket saan a pulos nga interesado iti libro, ngem nasdaawak idi tinaldiapak dagiti panidna. Silalawag nga insurona a mapasayaat dagiti prinsipio ti Biblia ti biag ti tao. Nasdaawak met a nakaammo maipapan iti pannakaidadanes dagiti immuna a Kristiano ken ti kinatulokda a mangisakripisio iti biagda gapu iti pammatida. Idi nabasak ti libro, kayatko nga iranud dagitoy iti sabsabali. Idin a naam-ammok ni Manolis, maysa a lalaki a makaam-ammo ken ni Jehova ken iti mensahe ti Biblia agsipud ta Saksi ni Jehova ti dadduma kadagiti kabagianna. Inkuyognak iti paggigimongan dagiti Saksi ni Jehova iti lugarmi, ket kabayatan ti kalgaw ti 1990, rinugiakon ti nakipagadal iti Biblia kadakuada.

Babaen ti panagadalko iti Biblia, naammuak nga agpayso a maseknan ti Namarsua kadatayo ken saan nga isu ti makimbasol iti sakit ken ut-ot a sagsagabaen ti adu kadatayo. (1 Pedro 5:7) Naammuak a ni Satanas ti nangirugi iti basol ken ipapatay iti daytoy a lubong ket asidegen a pukawen ni Jehova dagiti aramid ni Satanas babaen ti panangikkatna iti daytoy daan a sistema ken sukatanna iti perpekto a baro a lubong. (Hebreo 2:14) Iti sidong ti paraiso a kasasaad, maisublinton iti kinaperpekto dagiti tattao a managbuteng iti Dios. Awanton ti mangibaga iti, “Masakitak.”​—Isaias 33:24.

Naadalko pay nga ibagbaga ti Biblia nga ‘adaywantayo ti dara.’ (Aramid 15:20, 29; Genesis 9:4) Tangay ti konsiensiak ket nangrugin a natubay ken nasanay kadagiti nangato a pagalagadan ken prinsipio ti Biblia, natignayak a mangaramid iti personal a desision maipapan iti panangyalison iti dara. Inkeddengko a diak pulos agpayalisonen.

Iti nasurok a 20 a tawen, impapatida kaniak a ti regular a panagpayalisonko iti dara ti kakaisuna a pamuspusan tapno agtultuloyak nga agbiag. No tungpalek ti bilin ti Biblia, kayatna kadi a sawen nga ipamuspusakon ti mismo nga ipapatayko? Anianto ngay ti makuna ti dadakkelko iti panagkitakitko nga agpayalison iti dara? Pilitendakto ngata dagiti doktorko ken dadduma pay nga agtartrabaho idiay ospital?

Panangaramid Kadagiti Nakapatpateg a Desision

Babaen ti napasnek a kararag, impalladawko amin a pakadanagak ken Jehova. (Salmo 55:22) Inkeddengko met ti agsapul kadagiti sabali pay a makaagas a solusion. Kalpasan ti kasta unay a panangusig, natakuatak a mabalin nga isukat iti panangyalison iti dara ti naannad a panangpili iti taraon a nabaknang iti iron ken bitamina. Kangrunaanna, desididoak a mangtungpal iti linteg ti Dios a nailawlawag iti Biblia.

Natural a nakaunget unay dagiti dadakkelko. Nanipud kinamaladagak, inaramidda ti amin a kabaelanda tapno agtultuloyak nga agbiag, ket ita, diak kayaten ti agpayalison iti dara! Ngem idi agangay, imbagada a raemenda ti personal a desisionko iti dayta a banag.

Kalpasanna, inlawlawagko ti narelihiosuan a takderko kadagiti agtartrabaho idiay ospital ken impakaammok met kadakuada nga itultuloyko a suroten dagiti pamuspusan a kasandi ti panagpayalison iti dara. Nupay di kayat dagiti doktor ti kalikagumko idi damo, immannugotda met laeng idi agangay.

Bayat a nayalisonanak iti dara iti napalabas, adu ti nagayyemko nga ubbing nga addaan met iti thalassemia. Ita, masmasdaawdan maipapan iti takderko iti dara. Maysa kadakuada ti nanginsulto kaniak nga “asidegen nga adda uppat a tattao a mangbagkat kaniak”​—nga iti Griego kayatna a sawen a matayakton. Nakalkaldaang ta idi agangay, isut’ maysa kadagiti lima a pasiente a natay gapu ta nayalisonanda iti kontaminado a dara!

Nanipud idi Agosto 1991, saanakon a nayalisonan iti dara. Maisupadi iti amin a naipakpakauna, sibibiagak pay laeng ken nasayaat met ti kasasaadko. Babaen ti kanayon a pannanganko iti nabaknang iti bitamina ken iron, nataginayonko ti kalkalainganna a salun-at, nupay pasaray rumsua dagiti komplikasion ken limitado unay ti maaramidak gapu iti sakitko a thalassemia.

Ngem kangrunaan ti amin, addan panggep ti biagko, biag a napabaknang babaen ti nasinged a relasionko iti Namarsua kaniak a ni Jehova a Dios. Idi Hulio ti 1992, insimbolok ti dedikasionko ken Jehova babaen ti bautismo. Iti isu met la nga aldaw, nabautisaran ni Manolis, ti patpatgek a gayyem a nangyam-ammo kaniak iti kongregasion Kristiano dagiti Saksi ni Jehova a mangpabpabileg unay kaniak. Agarup 18 a bulan kalpasanna, nagkallaysakami. Idi agangay, naragsakanak a nakakita a nagbalinen ni nanangko ken ti adiek a babai a bautisado nga adipen ni Jehova. Nagbalbaliwen ti panangmatmat ni tatangko kadagiti Saksi ni Jehova, ket pasaray tumabunon kadagiti gimong ti kongregasion.

Naadalko a nupay ni patay ket maysa a kabusor, saan a kabusor dayta a rumbeng a pagbutngan. (Salmo 23:4) Agbiagtay man wenno mataytayo, para dayta ken Jehova. Iggemna ti biagtayo. (Roma 14:8) Kanayon nga agyamanak kenkuana ta inispalnak manipud iti manamnama a biag nga in-inut laeng a matay. Kinapudnona, inikkannak iti namnama nga agbiag nga agnanayon!​—Apocalipsis 21:1-4.

[Footnote]

[Ladawan iti panid 21]

Desperadoak idi nga agsapsapul iti liwliwa

[Ladawan iti panid 22]

Dakam ken misterko a Manolis