Manipud Kadagiti Agbasbasa
Dagiti Bomba a Naimula iti Daga Natignayak iti serye a “Dagiti Bomba a Naimula iti Daga—Ania ti Maaramidan?” (Mayo 8, 2000) Makapasidduker ti kasta unay a kaadu dagiti inosente a sibilian a magudas iti kada tawen gapu kadagiti bomba a naimula iti daga.
E. U., Finland
Mabainak idi nabasak ti maipapan kadagitoy a nagranggas nga armas nga us-usaren dagiti tattao a pangdangran iti padada a tattao. Adda nainkalintegan a rason ti Dios a bumallaet ken mangpukaw iti kinadakes iti dagatayo.
G. S., Brazil
Naisangsangayan daytoy a serye, tangay ipakaammona ti maysa a dakkel nga isyu iti publiko. Epektibo unay ti ladawan iti akkub a mangtukay iti interes.
R. H., Estados Unidos
Panangagas nga Awan ti Nayalison Impalagip kaniak ti artikulo a “Mataykan!” (Mayo 8, 2000) ti kapadasan ni tatangko. Adu a tawen ti napalabasen idi naistrok bayat nga agmanmaneho iti kotsena. Nabaliktad ti kotsena, ket idi nakapuot, imbaga ti doktor kenkuana a masapul a mayalisonan iti dara. Idi nagkitakit ni tatangko, kinuna ti doktor: “Matayka no dika agpayalison.” Kaskasdi a nagkitakit ni tatangko. Kabigatanna, immay ti doktor iti siledna ket inimtuodna: “Komustaka?” Kinuna ni tatangko: “Sibibiagak!” Sibibiag pay laeng ni tatangko ken agserserbi ken Jehova iti amin a kabaelanna.
T. M., Estados Unidos
Addaanak iti karkarna a kanser iti dara, ket idi nadayagnos, imbaga kaniak ti doktor nga agbiagak laengen iti innem a bulan no saanak nga agpayalison a dagus iti dara. Dayta ket idi tawen 1991. Nakasarakak iti doktor a nangraem iti pammatik maipapan iti dara, ket siak a mismo ti nangikeddeng, babaen ti panangiwanwanna, nga agpaineksionak iti erythropoietin iti kada lawas, a nakatulong iti ingangato ti blood count-ko.
E. G., Estados Unidos
Nabasak ti pakasaritaan ni Leanne Karlinsky, ket kas maysa a doktor, nagsiddukerak iti naan-anay a kinaawan asi dagidiay nangbaybay-a kenkuana kalpasan a naopera [gapu ta di nagpayalison iti dara]. Narigat a panunoten ti kaadda dagita a di mannakaawat a tattao!
C. C., Estados Unidos
Panangdaer iti Kinaawan Namnama Tangay malmaldaangak, binasak ti artikulo a “Ti Panangmatmat ti Biblia: No Kasano a Daeran ti Kinaawan Namnama” (Mayo 8, 2000) apaman a naawatko dayta. Kas kinunayo, makaparegta unay ti pannakisarita iti tao nga agimdeng a buyogen ti pannakaawat. Kayatko nga iyebkas ti panagyamanko gapu kadagiti ekselente nga artikuloyo.
A. D., Lithuania
Lactose Intolerance Nagpadoktor ni baketko ta nakaro dagiti sintoma a sagsagabaenna. Imbaga ti doktor a nalabit agsagsagaba iti lactose intolerance. Diak pay pulos nangnangngeg dayta, isu nga agyamankami iti artikulo nga “Agsagsagabaka Kadi iti ‘Lactose Intolerance’?” (Mayo 8, 2000) Dimteng iti umiso a tiempo daytoy a nagsayaat nga impormasion.
E. P., Estados Unidos
Brazil Ti artikulo a “Ti Pantanal—Makakayaw a Pagtaraknan” (Setiembre 8, 1999) ti nakagutugotak a mangpasiar a mismo iti daytoy a paset kadagiti pinarsua ni Jehova. Isu nga implanomi ken ni adingko ti agpasiar idiay Brazil, ket dimteng ti artikulo a “Ti Dramatiko a Pakasaritaan ti ‘Pagilian Dagiti Agsusupadi’” (Mayo 8, 2000) dua a lawas sakbay a simmangpetkami sadiay. Nagserbi dayta a nagsayaat a giya maipapan kadagiti kapintasan a pagpasiaran.
E. V., England
Dagiti Tumatayab ken Balud Naragsakanak a nangpadakkel—ken nangibulos manen iti kabakiran—iti adu a tumatayab. Ti artikulo nga “Ania ti Maisuro ti Tumatayab iti Balud?” (Mayo 8, 2000) ti namagpanunot kaniak no kasano kaadu ti maisuro kadatayo uray ti nagbassit a parsua ni Jehova.
E. D., Estados Unidos