Ti Misterio Maipapan Kadagiti Billit-tuleng ti Britania
BABAEN TI MANNURAT TI AGRIINGKAYO! IDIAY BRITANIA
NABAYAGEN a gagangay a masarakan iti sadinoman ditoy Britania ti billit-tuleng ken mangngegan ti pamiliar nga unina. Ngem mapukpukawen—masansan a kellaat—kadagiti siudad, ken awan ti makaammo iti makagapu. Nangitukon ti periodiko ti London nga Independent iti £5,000 ($7,200) a premio agpaay iti kaunaan a nasientipikuan a salaysay ti siasinoman a makarisut iti misterio. Ti Royal Society for the Protection of Birds ken ti British Trust for Ornithology dagiti agserbinto a hurado. Manamnama a mairingpas ti proyekto iti di kumurang a dua a tawen.
Naammuan kadagiti surbey a kellaat a bimmassit ti bilang dagiti billit-tuleng kadagiti ili ken siudad iti intero a pagilian. Naan-anay nga awandan iti sumagmamano a lugar. Ngem adu pay laeng ti billit-tuleng iti dadduma a siudad iti Europa, a kas iti Paris ken Madrid. Kuna ni Dr. Denis Summers-Smith, ti sangalubongan nga eksperto iti billit-tuleng: ‘Maysa dayta kadagiti karkarna unay a misterio kadagiti tumatayab iti napalabas a 50 a tawen.’
Ti masansan a panagtalon ti maipagarup a kangrunaan a makagapu iti 65 a porsiento nga ibabassit ti populasion dagiti billit-tuleng kadagiti away. Kasta met laeng ti napasamak iti dadduma pay a klase ti tumatayab kadagiti away. Ngem di ilawlawag daytoy ti 92 a porsiento nga ibabassit ti bilang dagiti billit-tuleng kadagiti siudad. Kuna ti maysa a maseknan iti kasasaad ti aglawlaw a ni Michael McCarthy a ti kellaat a pannakapukaw dagiti billit-tuleng “ket maysa a nalawag a pakakitaan nga adda nagdakes a napasamak iti sistema ti ekolohia dagiti billit-tuleng—ket nalabit uray iti sistema ti ekolohiatayo.” Manamnama a maammuantayto no ania a talaga ti dakes a napasamak ken no kasano ti kinakarona.