Kasapulam Aya ti Insurance?
ITI sumagmamano a pagilian, inkapilitan ti dadduma a klase ti insurance. Iti sabsabali, dandani di pagaammo ti kaaduan a klase. Maysa pay, agduduma ti gatad ken klase ti saklawen ti insurance iti nadumaduma a pagilian. Ngem pareho ti kangrunaan a prinsipio ti insurance—panangiranud iti peligro.
Natural a no ad-adu ti sanikua ti maysa a tao, ad-adu met ti mapukawna. Umasping iti dayta, no ad-adu ti responsabilidad ti maysa a tao iti pamiliana, dakdakkel ti epektona no matay wenno mabaldado. No adda insurance, dika unay madanagan no mapukaw ti sanikuam wenno mabaldadoka gapu iti aksidente.
Nupay kasta, nainsiriban aya a paggastuan ti insurance uray no mabalin nga awan a pulos ti masingirmo a benepisio? Bueno, sayang aya ti kuarta a naigatang iti reserba a pilid ti lugan, uray no saan a pulos a mausar dayta? Ti kinatalged a marikna ti tsuper pagbalinenna a makagunggona ti kanayonan a gasto a maipaay iti pilid. Nupay ti maisubli a kuarta dina malitupan ti sumagmamano a pukaw, mabalin a litupanna ti dadduma a pukaw.
Ania a klase ti pukaw ti saklawen dagiti kontrata ti insurance?
Dagiti Klase ti Insurance
Kaaduan nga insurance a ginatang dagiti tattao ti maibilang iti kategoria a property, liability, health, disability, ken life insurance.
Property insurance: Ti insurance a mangsalaknib iti pannakapukaw ti sanikua—balay, negosio, lugan, wenno dadduma pay a sanikua—ket maysa kadagiti gagangay unay a pamay-an ti panangtaming iti peligro. Daytoy nga insurance ti inkeddeng ni John, a nadakamat iti immuna nga artikulo, a dina gatangen para iti karpinteria ken kadagiti alikamenna.
Iraman ti dadduma a kontrata iti home-insurance ti dadduma a bambanag iti uneg ti balay. No daytoy a klase ti gatangem, nainsiriban no agaramidka iti imbentario dagiti naiseguro a sanikuam iti uneg ti balay ket no mabalin, uray pay dagiti retrato wenno videotape dagitoy. Daytoy nga imbentario agraman ti aniaman a resibo ti naibayad kadagita a banag ket maidulin koma iti natalged a lugar iti ruar ti balay. Nalaklaka nga amang ti agsingir iti benepisio a manglitup iti pukaw no adda dagitoy a papeles.
Liability insurance: Siasinoman nga agmaneho iti lugan, addaan iti balay wenno daga, negosio, wenno addaan kadagiti empleado ket mabalin nga agpeligro a manungsungbat gapu iti aksidente. Ket dayta nga aksidente ti mabalin a pakadadaelan ti sanikua wenno pakadangranan wenno pakatayan ti sabali a tao. Ti tsuper wenno makinkukua iti sanikua wenno negosio ket mabalin nga agbayad iti pannakatarimaan ti sanikua, pannakaagas, wenno uray pay iti panagrigat ken panagsagaba ti sabali a tao. Iti adu a pagilian, ikalikagum ti linteg kadagiti amo ken tsuper a gumatangda iti insurance tapno makatulongda nga agbayad kadagitoy a paggastosan. Uray kadagiti lugar a ti insurance ket di ikalikagum ti linteg, mabalin a nainkalintegan wenno maiparbeng a ti tsuper, makinkukua iti sanikua, wenno amo ti tumulong kadagiti biktima ti aksidente wenno kadagiti pamiliada.
Health insurance: Adu a pagilian ti addaan iti isponsoran ti gobierno nga insurance a mangipaay kadagiti benepisio a kas iti pension dagiti lallakay ken babbaketen ken pannakaaywan iti salun-at. Nupay kasta, uray kadagiti lugar nga adda kasta nga insurance, bayadan laeng ti insurance ti dadduma a nagasto iti agas wenno mabalin a sumagmamano laeng a pamay-an ti pannakaagas. Isu a dadduma a tattao ti gumatang iti kanayonan a pribado nga insurance a makatulong kadakuada a mangbayad iti nabati. Iti adu a lugar, maikkan iti health insurance dagiti trabahador kas maysa a kalikagum iti pagtrabahuanda.
Dadduma a plano nga agpaay iti pannakaaywan ti salun-at, agraman dagiti managed care arrangement ken dagiti health maintenance organization (HMOs), ket mangipaay iti adut’ saklawenna a panagpaagas para iti naikeddeng a binulan wenno tinawen a bayad. Ikagumaan dagitoy nga organisasion a kissayan ti magastos babaen ti panangipaayda iti nalaklaka a panagpaagas ken itandudoda ti panangagas a panglapped iti sakit. Nupay kasta, iti HMO, mabalin a manmano dagiti doktor wenno panangagas a pagpilian ti pasiente ngem kadagiti nabayagen a klase ti health insurance.
Disability insurance ken life insurance: Ti disability insurance ket mangipaay iti sumagmamano a pamastrekan no nadangran ti maysa a tao ken di makatrabaho. Mangipaay ti life insurance iti pinansial a tulong kadagiti supsuportaran ti maysa a tao no kas pagarigan ta matay. Gapu iti kasta nga insurance, nakabayad ti adu a pamilia kadagiti utangda ken naitultuloyda ti inaldaw a panagbiagda kalpasan a nadangran wenno natay ti kangrunaan a mangbibiag kadakuada.
Panangsapul Kadagiti Mapagtalkan a Kompania ti Insurance
Ti insurance ket naibasar iti prinsipio nga agbayadka itan tapno natalged ti panguartaam iti masakbayan, isu a di pakasdaawan a ti industria ti insurance allukoyenna ti adu a nasaur. Mapaspasamak daytoy kadagiti nadur-as ken kasta met kadagiti dumurdur-as pay laeng ti ekonomiada a pagilian. No kasta, masirib ti maysa a tao no agannad kadagiti makuna a nalaka nga insurance ken nasiglat koma a mangilasin iti aniaman nga insurance a mapagduaduaan ti planona. Awan ti naganab ti adu a gimmatang a mangnamnama nga adda maalada iti insurance-da idi saan a binayadan dagita a kompania dagiti kontratada—wenno kellaat a nagpukawdan!
Isu a kas met iti dadduma pay a napateg a gatangen, nasayaat no pagdidiligen ti adu nga insurance nga itukon ti nadumaduma a kompania, ta masansan a makasalimetmetka pay. Kas pagarigan, nababbaba ti presio nga itukon ti dadduma a kompania iti health insurance kadagiti di mannigarilio ken iti car insurance kadagidiay nakapasá iti kurso a panagmaneho. Ngem kasano a makasarak iti mapagtalkan a kompania ti agpalplano a gumatang iti insurance?
Ti umuna nga addang ket ammuem ti kapadasan ti dadduma a tattao iti nadumaduma a kompania ken ahente ti insurance. Mabalin nga ammo dagiti gagayyem ken kaarruba ti reputasion ti serbisio ti kompania wenno ti kinamapagtalkan ken personal a pannakaseknan ti ahentena. Nasayaat met no siputam dagiti damag maipapan iti adu a kompania ti insurance a mabalin nga addaan kadagiti parikut.
Maysa pay, mabalin a maammuam ti ar-aramiden ken pinansial a kasasaad ti kompania no agkonsultaka iti maysa a libraria wenno paglakuan iti libro wenno iti Internet maipapan kadagiti pakakitaan iti kasasaad ti insurance. Mabalin a masungbatanda ti salsaludsod a kas iti: Natalged kadi ti pinansial a kasasaad ti kompania? Adu kadin a tawen a naballigi iti dayta a negosio? Agdindinamag kadi gapu ta nabiit ken nainggayyeman ti panangasikasona kadagiti agsingir?
Nupay kasta, di koma maipagarup a kanayon a husto dagiti pakakitaan iti kasasaad ti insurance. Maysa a nabayagen a kompania ti insurance nga addaan iti binilion a sanikua ti kapilitan nga innala ti gobierno kalpasan laeng iti makadomingo a pannakaiwaragawagna iti nalatak a libro kas nagsayaat a kompania!
Ti Akem Dagiti Ahente ti Insurance
Gagangay a ti maysa nga ahente ti insurance ket naikumit iti maysa a partikular a kompania ti insurance. Nalabit agkonsulta ti maysa a broker, wenno agsolsolo nga ahente, iti nadumaduma a kompania tapno makasarak iti kasayaatan nga insurance para iti naikeddeng a gatad. Masapul a salimetmetanda a dua ti nasayaat a relasionda kadagiti kliente tapno mataginayon ti negosioda. No mapagtalkan ken maseknan ti ahente ti insurance, mabalin a dakkel ti maitulongna kadagiti klientena.
Umuna, matulongan ti naimbag nga ahente wenno broker ti klientena a mangpili iti umno nga insurance manipud iti kasla nagadu a pagpilian. Ilawlawagna met dagiti detalye ti kontrata iti klientena. Kas pagaammo ti adu, komplikado unay dagiti kontrata ti insurance. Inamin ti presidente ti maysa a kompania ti insurance a dina naawatan ti dadduma a paset ti mismo a kontrata ti insurance a ginatangna para iti balayna!
Ti panangilawlawag ti ahente ket makatulong iti kliente a mangliklik kadagiti pagbabawyannanto. Kas pagarigan, adda makiskissay iti kaaduan a kontrata ti property insurance ken health insurance. Daytoy ket naikeddeng a gatad a masapul a bayadan ti gimmatang iti insurance—kas pagarigan, pangtarimaan ti lugan wenno pagpaagas—sakbay a bayadan ti kompania ti insurance ti singsingirenna. Mabalin met a makisarita ti ahente iti kompania ti insurance no marigatan nga agsingir ti kliente.
Ti Insurance ken Dagiti Kristiano
Ti aya insurance ket kasapulan ti maysa a Kristiano nga agtalek iti tulong ti Dios ken mangpadpadaan iti panungpalan ti sistema dagiti bambanag? Idi tawen 1910, kastoy ti inimtuod ti dadduma ken Charles Taze Russell, ti editor ti magasin a pagaammo itan a Ti Pagwanawanan, a kadua ti magasin nga Agriingkayo! Binigbig ni Russell nga ipakpakauna ti Biblia ti panungpalan ti agdama a sistema ti ekonomia, ket innayonna pay nga isu a mismo ket awanan iti life insurance.
“Nupay kasta, saan nga agpapada ti kasasaadtayo,” kinuna ni Russell. “Ti ama nga addaan iti asawa ken annak nga agpampannuray kenkuana—no ubbing pay dagitoy ken dida pay kabaelan a suportaran ti bagida—adda responsabilidadna kadakuada.” (1 Timoteo 5:8) Mabalin nga agurnong ti lalaki iti pondo tapno masuportaranna ti pamiliana, kinuna ni Russell. “Ngem no dina maaramid daytoy, mabalin a matungpalna ti rebbengenna kadakuada babaen ti life insurance.”
Ti maysa nga addaan rebbengen iti pamilia ket mabalin met a mangipaay iti health, disability, ken dadduma pay a klase ti insurance kadagiti miembro ti pamiliana. Adu a babbaro ken babbalasang pay ti addaan iti insurance tapno nalakada nga agpaagas ken dida makautang no bilang maaksidente wenno agsakitda.
Napateg ti panagbalin a napudno no maipapan iti insurance. Sigurado a ti pudno a Kristiano dina pulos allilawen ti kompania ti insurance, iti man tiempo a panangpirmana iti aplikasionna iti insurance wenno inton agsingir. (Hebreo 13:18) Laglagipenna a ti panggep ti insurance ket litupan ti napukaw. Dayta ket saan a tiket iti loteria—tapno adda gundawaymo a bumaknang.—1 Corinto 6:10.
Tungpalen dagiti Kristiano ti amin a linteg a mainaig kadagiti kalikagum a kas iti pananggun-od iti insurance. Agtungpalda no ibaga ti linteg a masapul nga adda umno nga insurance-da tapno makatarawidwidda iti negosio wenno makamanehoda iti lugan. (Roma 13:5-7) Ti panagbalin a napudno ken ti praktikal a kinasirib kalikagumanna met ti kanayon a panagbayad kadagiti premium. No dika agbayad, mabalin a kanselaren ti kompania ti kontrata ket di agbayad inton agsingirka. Nainsiriban no siertuem a naawatda ti imbayadmo babaen ti kanayon a direkta a pannakiuman iti kompania ken panangidulin kadagiti resibo ti nagbayadam, kas kadagiti canceled check wenno tseke a tinatakan ti banko a mangipakita a nakabayadkan.
Adda man insurance a magun-odan iti pagnanaedam wenno awan, adda dagiti kangrunaan a panagannad a makatulong kenka tapno maliklikam ti mapukawan, ket iti kasta, malisiam agraman dagiti ay-ayatem ti rigat a di maikkat ti masingirmo a kuarta iti insurance. Usigentayo ti sumagmamano kadagitoy a panagannad.
[Ladawan iti panid 7]
Ti mapagtalkan nga ahente matulongannaka nga agdesision maipapan iti insurance
[Ladawan iti panid 7]
Adda insurance ti adu a tattao, kalikaguman man ti linteg wenno saan